Read Morisien 1 Ko 9 Bible Online

1 Ko 9 - Morisien bible

1 Ko 9

¹Eski mo pa lib mwa? Eski mo pa enn apot, mwa? Eski mo pa finn trouv Zezi nou Segner? Eski zot pa rezilta travay ki mo finn fer dan Lesegner?

²Mem si lezot pa konsider mwa kouma enn apot, mo sir ki pou zot mo vremem enn apot! Zotmem laprev mo apostola, parski zot ini avek Lesegner.

³Ala mo defans pou bann ki pe ziz mwa.

⁴Nou pena drwa manze-bwar?

⁵Eski nou pena drwa amenn nou madam Kretienn ar nou, kouma bann lezot apot fer, kouma bann frer Lesegner ek Kefas fer?

⁶Oubien selma Barnabas ek mwa ki bizin travay pou gagn nou lavi?

⁷Kisannla ki servi dan larme kouma enn solda lor so prop fre? Kisannla ki plant pie rezin me ki li pa manz fri la? Kisannla ki okip enn troupo me li pa gagn dile pou bwar?

⁸Pa zis dan lavi toulezour ki mo tir bann lexanp. Lalwa Moiz osi dir sa.

⁹Dan Lalwa finn ekrir, “Pa atas lagel enn bef kan li pe kraz dible ar so lapat.” Dan sa lexanp la, eski Bondie konserne par bann bef?

¹⁰Anrealite, eski pa pou nou ki Bondie pe dir sa? Wi, sa finn ekrir pou nou, parski kan enn planter pe travay later, ek kikenn pe kraz lafarinn, zot ena lespwar pou gagn enn par dan rekolt ki pou fer.

¹¹Nou finn sem bann semans spiritiel dan zot; eski li tro demande ki nou rekolte enn par dibien materyel?

¹²Si lezot kapav gagn zot soutien, eski nou, nou pa merit li plis ankor? Me nou pa finn servi sa drwa la. Okontrer nou finn siport tou pouki pena okenn obstak ki blok Bonn Nouvel Lekris.

¹³Zot pa kone ki seki travay dan tanp, gagn so manze depi sa tanp la? E seki servi lor lotel gagn enn par lor seki pe ofer lor lotel la?

¹⁴Dan mem manier, Lesegner finn komann ki seki anons Bonn Nouvel gagn so lavi ar sa Bonn Nouvel la.

¹⁵Mwa mo pa finn servi okenn sa bann drwa la. E mo pa pe ekrir dan lespwar ki zot pou fer kik privilez pou mwa. Mo ti a prefere mor, ki mo les kikenn pran sa fierte la ar mwa.

¹⁶Mo pa bizin fer vantar ki mo anons Bonn Nouvel. Enn obligasion lor mwa pou fer sa. Maler lor mwa si mo pa anons Bonn Nouvel.

¹⁷Si mo ti swazir sa travay la par momem mo ti pou ena drwa enn saler. Me si sa finn inpoze lor mwa, alor mo oblize pran sa sarz la pou nanye, san gagn lapey.

¹⁸Alor, ki mo rekonpans? Satisfaksion ki mo gagne pou anons gratwitman Bonn Nouvel san ki mo profit drwa ki sa Bonn Nouvel la donn mwa.

¹⁹Mo enn dimoun lib, e mo pa esklav personn; pourtan mo fer mwa esklav tou dimoun pouki mo kapav gagn pli boukou fidel posib.

²⁰Kan mo parmi bann Zwif, mo viv kouma Zwif, pou gagn bann Zwif. Kan mo ar bann ki swiv lalwa, mo kouma enn ki swiv lalwa pouki mo gagn bannla; ofet, mwa mo pa anba lalwa.

²¹Ar bann ki ignor lalwa, mo viv kouma zot pouki mo kapav gagn zot. Sa pa vedir ki mo indiferan ar lalwa Bondie, parski mo pe viv lalwa Lekris.

²²Ar bann feb, mo viv kouma enn feb pou gagn zot. Mo donn tou mo posib pou sov inpe dimoun par sa manier la.

²³Mo fer tousala pou Bonn Nouvel pouki mo gagn enn par.

²⁴Zot pa kone ki dan enn lekours boukou kourer galoupe, me pri, enn sel ki gagne?

²⁵Dan lantrennman sak atlet inpoz limem enn disiplinn bien sever. Zot fer sa pou gagn enn kouronn ki pa res pou toultan; me nou, nou fer nou travay pou gagn enn kouronn ki so valer zame gate.

²⁶Mo galoupe pou terminn lekours, mo pa galoupe kouma enn aveg. Dan labox parey, mo pa tap bonavini dan ler.

²⁷Mo treyn mo lekor dir, mo kontrol li kouma mo esklav, pouki mo pa pres lezot laparol, apre mo trouv momem diskalifie.