Read Morisien 2 Ko 1 Bible Online

2 Ko 1 - Morisien bible

2 Ko 1

¹Mwa Pol, enn apot Zezi Kris par volonte Bondie, ek Timote nou frer, Mo pe ekrir zot, legliz ki dan Korint, ek tou bann krwayan ki partou dan Akai:

²ki Bondie nou Papa ek Zezi Kris nou Segner donn zot lagras ek lape.

³Anou loue Bondie ek Papa Zezi Kris, Papa ki ena mizerikord ek toultan konsol nou.

⁴Li rekonfort nou dan nou detres pouki nou kapav rekonfort lezot ki pas par tou kalite problem, avek rekonfor ki limem li finn donn nou.

⁵Parey kouma nou ena enn gran par dan soufrans Lekris, dan mem fason nou gagn gran rekonfor atraver li.

⁶Si nou dan soufrans, li pou zot, pouki zot gagn rekonfor ek delivrans; si nou trouv rekonfor, li pou zot, pouki zot resevwar konsolasion letan zot siport avek pasians bann mem soufrans ki nou pe viv.

⁷Nou lespwar pou zot li tini ferm parski nou kone ki, parey kouma zot partaz nou soufrans, zot ousi partaz nou rekonfor.

⁸Nou oule ki zot kone, bann frer ek bann ser, ki kantite difikilte nou finn gagne dan provins Lazi. Nou finn akable plis ki nou lafors ti kapav tini, nou ti mem perdi tou lespwar pou res vivan.

⁹Nou ti ena linpresion ki finn kondann nou amor. Me sa finn arive pouki nou pa depann lor noumem, me depann zis lor Bondie ki relev seki finn mor.

¹⁰Dan sa kalite danze lamor la ki li finn sap nou, e li pou kontigne delivre nou. Nou finn met nou lespwar dan li; nou sir ki li pou sap nou ankor.

¹¹Ki zot kontign asiste nou par zot lapriyer. Bondie pou reponn lapriyer ki boukou dimoun finn fer pou nou, e li pou beni nou. Zot lapriyer pou vinn enn fason pou dir Bondie mersi.

¹²Rasinn nou fierte, se temwagnaz nou konsians: nou konportman dan lemonn e avek zot li nouri par sinserite ek pirte ki Bondie donn nou. Nou pa gide par sazes imin me par lagras Bondie.

¹³Nou pa ekrir zot kiksoz ki pa kler; nou oule zot konpran bien seki zot lir. Mo espere ki zot pou konpran klerman

¹⁴seki ziska ler zot pe konpran anparti selma: ki zour Lesegner zot pou trouv fierte dan nou, parey kouma nou trouv fierte dan zot.

¹⁵Mo ti telman sir lor sa size la, ki mo ti finn fer plan pou vizit zot pouki zot gagn doub benediksion.

¹⁶Mo ti pou vizit zot lor mo larout pou al Masedwann, ek revizit zot letan mo sorti Masedwann. Lerla zot ti pou ed mwa pourswiv mo larout pou al Zide.

¹⁷Eski mo finn pran sa desizion la san reflesi? Kan mo fer plan, eski li par motivasion egois? Eski mo balans ant “Wi” ek “Non” anmemtan?

¹⁸Bondie mo temwin: nou parol li pa ezitasion ant “Wi” ek “Non.”

¹⁹Zezi Kris, Garson Bondie, ki nou - momem, Silas ek Timote - nou finn anonse parmi zot, li pa finn dans-danse ant “Wi” ek “Non”; okontrer li toultan “Wi.”

²⁰Li reprezant “Wi” ki konfirm tou bann promes Bondie. Pou sa rezon la, atraver li nou dir nou “Amen” pou glorifie Bondie.

²¹Bondie limem ki finn fer nou vinn ferm ansam avek zot dan nou lavi avek Lekris. Bondie limem donn nou lonksion,

²²li finn met enn sele lor nou pou montre ki nou so zanfan, li finn met Lespri Sin dan nou leker kouma enn garanti bann dibien ki rezerve pou nou.

²³Mo pran Bondie kouma temwin, mo finn refiz retourn Korint pou pa donn zot tro boukou traka.

²⁴Nou pa rod inpoz lor zot seki zot bizin krwar; nou kone ki zot ferm dan zot lafwa, me nou anvi kontribie pou zot boner.