Read Morisien 2 Ko 11 Bible Online

2 Ko 11 - Morisien bible

2 Ko 11

¹Mo ti pou souete ki zot kapav siport mo ti fouka. Fer sa pou mwa!

²Mo ena zalouzi pou zot, otan ki Bondie ena. Mo ti finn promet pou marye zot ar enn sel mari, Lekris, e mo dezir prezant zot ar li kouma enn zennfi vierz.

³Mo bien per ki zot panse pou gate, parey kouma Ev ti les li egare par riz serpan, e ki sa antrenn zot lwin e zot perdi zot devosion sinp pou Lekris.

⁴Anefe, zot kapav toler ninport kisannla ki vinn pres enn Zezi diferan ar seki nou finn anons zot; zot pare pou resevwar enn lot lespri e enn lot Bonn Nouvel ki diferan ar Lespri e Bonn Nouvel ki nou finn anons zot.

⁵Mo panse ki mo pa inferyer dan okenn fason ar zot “siper-apot.”

⁶Li posib ki mo pena sa don pou fer gran koze anpiblik, me mo ena konesans. Nou finn montre zot sa klerman toultan e dan tou kondision.

⁷Eski mo ti ena tor letan mo ti abes mwa pouki zot gagn linportans, parski mo finn anons zot Bonn Nouvel Bondie gratis?

⁸Pandan ki mo ti pe travay parmi zot, bann lezot legliz ki ti pe soutenir mwa. Dan enn fason koze, koumadir mo ti pe kokin bannla pou ed zot isi.

⁹Pandan ki mo ti kot zot e mo ti mank kiksoz, mo pa ti vinn enn fardo pou zot, parski bann frer e bann ser ki sorti Masedwann ti donn mwa tou saki mo ti bizin. Mo finn fer ansort ki mo pa enn fardo pou zot, e mo pou kontign koumsa dan lavenir.

¹⁰Par laverite Lekris ki dan mwa, mo kapav dir ki personn dan rezion Akai pa pou kapav aras sa fierte ki mo ena pou zot la.

¹¹Kifer? Parski mo pa kontan zot? Bondie ki kone!

¹²Mo pou kontign fer seki mo pe fer pou anpes lezot “apot” gagn enn pretex pou deklare ki zot parey kouma nou.

¹³Sa bannla pa bann vre apot; zot bann foser ki finn degize kouma apot Lekris.

¹⁴Nou pa etone! Satan limem degize kouma anz lalimier.

¹⁵Li pa etonan ki so bann serviter degiz zotmem pou paret kouma serviter lazistis. Zot pou pey saki zot merite.

¹⁶Mo repete, ki personn pa pran mwa pou enn fouka. Me si zot fer li, aksepte mwa kouma zot ti pou aksepte enn fou, pouki mwa osi mo tap mo tanbour enn tigit.

¹⁷Dan sa zafer vantardiz la, mo pa pe koz kouma Lesegner ti pou souete, me kouma enn fou.

¹⁸Me parski ena boukou lezot dimoun pe fer fezer lor zot kalite pou bann rezon imin, mwa osi mo fer parey.

¹⁹Zot ki saz, zot aksepte seki fou.

²⁰Ofet, zot siport ninport ki, ki tret zot kouma esklav, ki explwat zot, ki depouy zot, ki fer fezer, ki klak zot dan figir.

²¹Mo onte pou dir sa, me nou, nou finn tro timid pou azir koumsa! Si kikenn oze fer so vantar, e la mo pe koz kouma enn fou, mwa osi mo pou oze fer sa.

²²Bannla Ebre? Mwa osi. Izraelit? Mwa osi. Desandan Abraam? Mwa osi.

²³Bannla serviter Lekris? Mo pou dir enn foli la: mo meyer serviter ki zot. Mo finn travay plis ki zot; mo finn fer plis prizon ki zot; mo finn plis gagn bate, e mo finn pas pre ar lamor plis ki zot.

²⁴Sink fwa bann Zwif finn fwet mwa trant-nef kout;

²⁵trwa fwa bann Romin finn bat mwa kout dibwa; enn fwa finn lapid mwa; trwa fwa mo finn fer nofraz; mo finn pas enn zour ek enn nwit dan lamer.

²⁶Dan mo bann vwayaz mo finn pas par danze larivier deborde, danze bann brigan, danze mo prop pep, ek bann non-Zwif, danze dan lavil, danze dan dezer, danze parmi bann fos kamarad.

²⁷Mo finn konn travo penib ek bann eprev bien dir; souvan mo finn pas lanwit san somey; mo finn pas par lafin, par laswaf; souvan mo pa finn ena manze ditou, dan freser, san linz.

²⁸Apar tou leres ki mo pa pou mansione, ena osi presion lor mwa toulezour akoz traka legliz.

²⁹Si kikenn feb, mo santi mwa feb osi; si kikenn tonbe, mo santi douler la.

³⁰Si mo bizin fer vantar, mo pou vant mo febles.

³¹Bondie ki Papa Lesegner Zezi, ki beni pou leternite, kone ki mo pa pe koz manti.

³²Letan mo ti Damas, gouverner ki ti anba lerwa Aretas, ti plas bann gard devan laport lavil pou aret mwa.

³³Me bann dimoun ti desann mwa dan enn panie par enn trou dan miray, e mo finn sape.