Read Morisien 2 Ko 2 Bible Online

2 Ko 2 - Morisien bible

2 Ko 2

¹Alor mo finn deside ki mo pa pou retourn kot zot parski mo pa oule fer zot tris.

²Si mo fer zot tris, kisannla pou donn mwa lazwa, sinon zotmem ki mo finn plonz dan latristes?

³Ala kifer mo finn ekrir zot sa manier la, koumsa kan mo vini mo pa pou sibir tristes par dimoun ki ti bizin donn mwa lazwa. Mo ena lasirans ki si mo dan lazwa, zot tou pou dan lazwa.

⁴Mo finn ekrir zot avek boukou langwas, leker lour, ek boukou larm; pa pou fer zot tris, me pouki zot kone ki kantite mo kontan zot.

⁵Si kikenn finn koz ditor, li pa finn fer sa ar mwa, me, san exazere, li finn fer sa ar zot tou.

⁶Pinision ki mazorite parmi zot finn donn sa dimoun la, li ase.

⁷Asterla, zot bizin pardonn li ek ankouraz li, pouki li pa tom dan enn tristes ki fer li abandonn tou.

⁸Alor mo sipliye zot, fer li kone ki zot kontan li.

⁹Mo finn ekrir zot sa let la pou teste si pa zot toultan pare pou obeir mo bann instriksion.

¹⁰Ninport kisannla ki zot pardone, mwa osi mo pardonn li. Kan mo pardone, si ena kiksoz mem pou pardone, mo fer li pou zot devan Lekris.

¹¹Nou fer sa pouki Satan pa may nou dan lak. Nou kone ki li pe maniganse.

¹²Letan mo ti vinn Troas pou anons Bonn Nouvel Lekris mo ti dekouver ki Lesegner ti ouver enn laport pou mwa

¹³me mo lespri pa ti anpe parski mo pa ti trouv nou frer Tit. Alor mo finn dir orevwar bann kamarad Troas e mo finn a Masedwann.

¹⁴Nou loue Bondie parski li toultan antrenn nou dan kortez viktwar Lekris. Bondie servi nou pou fer konn Lekris partou kouma enn parfin ki fane partou.

¹⁵Anefe nou enn parfin ki Lekris ofer Bondie. Nou sa bon loder parfin la pou seki Bondie pe sove ek seki lor sime perdision.

¹⁶Pou sertin li enn loder lamor akoz zot pe mor, pou lezot ki pe viv li enn parfin lavi.

¹⁷Nou pa kouma boukou lezot ki fer trafik marsandiz ar parol Bondie; okontrer parski Bondie finn avoy nou, nou koz avek sinserite dan so prezans kouma serviter Lekris.