Read Morisien 2 Ko 5 Bible Online

2 Ko 5 - Morisien bible

2 Ko 5

¹Nou kone ki sa latant dan ki nou pe viv la, setadir, nou lekor letan nou lor later, si li konn destriksion, Bondie rezerv enn lakaz dan lesiel, enn lakaz ki pa fer ar lame imin.

²Asterla nou soupire, telman nou ena dezir pou rekouver nou ar lakaz ki sorti dan lesiel.

³Koumsa nou pou retrouv nou abiye, e nou pa pou touni.

⁴Osi lontan ki nou res dan sa latant ki nou ena lor later la, nou pou akable, parski nou pa oule res san linz lor nou, me nou anvi met enn lot linz lor nou afin ki seki mortel li anglouti par lavi.

⁵Bondie limem finn prepar nou pou sa, e finn donn nou so Lespri kouma enn garanti pou seki li rezerve pou nou.

⁶Alors nou toultan ena konfians; e nou kone ki tanki nou dan sa lekor la, nou lwin ar Lesegner.

⁷Nou viv par lafwa, nou pa viv par seki lizie trouve.

⁸Wi, nou ena plin kouraz e nou prefer kit lanvlop dan ki nou ete pou al viv ansam ar Lesegner.

⁹Ki nou dan sa lekor la ou andeor li, nou anvi fer nou Segner plezir. Sa nou pli gran dezir sa.

¹⁰Nou tou pou bizin dibout devan zizman Lekris, pouki sakenn gagn so rekonpans dapre seki li finn fer letan li ti dan sa lekor la, ki li bon kiksoz, ki li move kiksoz.

¹¹Parski nou bien kone ki savedir ena reverans pou Lesegner, alor nou sey konvink lezot. Bondie bien konn nou, e mo espere ki dan zot leker zot osi zot konn mwa.

¹²Nou pa pe rekomann noumem ar zot ankor enn fwa. Nou zis anvi donn zot lokazion santi enn fierte pou nou, pouki zot ena enn repons pou donn bann ki met plis linportans lor laparans deor ki lor seki ena dan leker.

¹³Si nou latet pa bon, pou Bondie ki nou koumsa; si nou lespri bien korek, li pou zot ki nou koumsa.

¹⁴Anefe, lamour Lekris kontrol nou, parski nou ena lasirans ki ena enn sel ki finn mor pou tou lezot; savedir ki tou lezot ena enn par dan so lamor.

¹⁵Li finn mor pou tou dimoun, afin ki seki viv, li nepli viv pou limem me li viv pou Sa-Enn ki finn mor pou zot la, e ki finn resisite pou zot.

¹⁶Alor depi aster nou nepli konsider okenn dimoun dapre manier imin. Mem si avan nou ti konsider Lekris dan enn manier imin, nou pa get li koumsa asterla.

¹⁷Si kikenn ini ar Lekris, li vinn enn nouvo kreasion; seki vie finn disparet, seki nouvo ki la.

¹⁸Tousala travay Bondie, ki rekonsilie nou ar limem par Lekris, e li finn donn nou sa minister rekonsiliasion la.

¹⁹Par Lekris, Bondie finn azir pou rekonsilie tou bann imin ar li, san pran konsiderasion zot bann fot, e li finn donn nou responsabilite pou al anons mesaz rekonsiliasion.

²⁰Alor dan nom Lekris, nou vinn bann anbasader, komsi Bondie pe fer so lapel atraver nou; dan nom Lekris nou sipliye zot: les zot rekonsilie avek Bondie.

²¹Lekris pa ti ena pese, me Bondie finn met nou pese lor li, pouki letan nou ini ansam ar li, nou rant dan enn lavi akseptab devan Bondie.