Read Morisien 2 Ko 6 Bible Online

2 Ko 6 - Morisien bible

2 Ko 6

¹Antan ki bann travayer ki kolabor ar Bondie, nou sipliy zot: pa negliz lagras ki zot finn resevwar ar li.

²Bondie dir, “Ler moman favorab mo finn ekout twa, kan zour arive pou sov twa, mo finn vinn sekour twa.” Ekoute, asterla, samem moman pou resevwar faver Bondie; azordi, zour liberasion, kot Bondie sov nou.

³Nou pa pe met okenn obstak pou kre skandal lor sime personn, pouki nou minister li san repros.

⁴Okontrer, nou prezant noumem dan tou sirkonstans kouma bann serviter Bondie; nou siport bann soufrans, detres, angwas,

⁵bate, prizon, rayot, fatig travay, mank somey, res san manze.

⁶Nou montre noumem kouma serviter Bondie par lapirte, konesans, pasians, labonte, par Lespri Sin, lamour vre,

⁷par parol laverite, e par pwisans Bondie; avek zarm lazistis dan nou lame drwat e dan nou lame gos[1].

⁸Nou gagn laglwar e nou gagn dezoner, nou gagn insilt e nou gagn louanz. Tret nou kouma manter, pourtan nou dir laverite;

⁹tret nou etranze, mem ki bien konn nou; tret nou kouma bann ki pe mor, pourtan nou bien vivan; nou soufer boukou pinision, me nou pa mor;

¹⁰mem dan sagrin nou toultan zwaye; nou pov, me nou anrisi boukou dimoun; li paret ki nou pena nanye, me anverite nou posed tou kiksoz!

¹¹Nou finn koz fran ar zot, bann kamarad Korintien, nou finn ouver nou leker angran ar zot.

¹²Pa nou ki finn ferm nou leker ki ena boukou lafeksion pou zot; zot ki finn ferm zot leker ar nou.

¹³Mo koz ar zot kouma mo bann zanfan: anretour ouver zot leker ar nou zot ousi.

¹⁴Pa al asosie zot avek bann non-krwayan. Kouma seki drwat kapav fer partner ar seki move? Oubien, kouma lalimier kapav asosie li ar teneb?

¹⁵Kouma Lekris kapav tom dakor ar diab? Ki relasion ena ant enn krwayan ek enn non-krwayan?

¹⁶Ki lakor ena ant tanp Bondie ek bann idol? Parski noumem ki tanp Bondie vivan, kouma Bondie finn dir, “Mo pou res parmi mo pep, mo pou mars avek zot, Mo pou zot Bondie, e zot pou mo pep.”

¹⁷Lesegner dir: “Separ zot ar sa bannla, res alekar, pa tous nanye ki inpir, e mo pou akeyir zot.

¹⁸Momem, mo pou enn Papa pou zot, e zot, zot pou mo garson, zot pou mo tifi.”