Read Morisien 2 Ko 7 Bible Online

2 Ko 7 - Morisien bible

2 Ko 7

¹Mo bann kamarad, tou sa bann promes la valab pou nou. Akoz sa nou bizin pirifie noumem, separ nou avek tou seki kapav sali nou lekor ek nou lam; e anou viv enn lavi konpletman sin, dan respe pou Bondie.

²Fer plas dan zot leker pou nou. Nou pa finn fer ditor personn, nou pa finn koronp personn, nou pa finn explwat personn.

³Mo pa pe dir sa pou kondann zot, parski mo finn fini dir depi avan: ki zot dan nou leker, nou ansam pou lavi-lamor.

⁴Mo ena gran konfians dan zot, mo get zot avek gran fierte. Dan nou detres, mo ankor ena boukou lankourazman ek mo ena lazwa.

⁵Ofet, letan nou ti ariv Masedwann nou pa ti konn okenn repo, nou ti aflize; otour nou ti ena konfli, andan nou leker ti ena lafreyer.

⁶Me Bondie ki konsol bann ki abat, ti konsol nou par vizit Tit,

⁷me pa selma par so larive, me osi par konsolasion ki zot ti donn li. Li ti rakont nou kouma zot anvi trouv mwa, komie zot tris, komie zot pare pou defann mwa; akoz sa mo lazwa li vremem gran.

⁸Mem si mo finn rann zot tris par let ki mo finn ekrir, mo pa regrete ki mo finn ekrir li. Ofet, wi, mo ti regrete letan mo ti rann mwa kont ki sa ti finn fer zot tris, pou enn letan.

⁹Asterla mo dan lazwa, pa akoz mo finn rann zot tris, me parski tristes la finn fer zot repanti. Bondie finn servi sa tristes la, koumsa nou pa finn koz zot okenn ditor.

¹⁰Tristes ki Bondie servi li amenn enn sanzman leker ki sov nou e ki pena okenn regre; tristes dapre lemonn li amenn lamor.

¹¹Get enn kou rezilta tristes selon Bondie: wi, gete ki kalite bonn volonte zot ena, komie zot prese pou defann zotmem, ki indignasion zot ena, lafreyer osi, dezir pou retrouv mwa, zel ki zot ena, lanvi pou pini lemal. Zot finn prouve ki zot inosan dan sa zafer la.

¹²Si mo finn ekrir zot, li pa akoz sa dimoun ki finn fer ditor la, ni akoz dimoun ki finn sibir lofans la. Me pouki zot rann zot kont devouman ki zot ena pou nou devan Bondie.

¹³Ala seki finn ankouraz nou. Pa selman nou ankouraze, nou ankor dan plis boner letan nou trouve komie Tit ti dan lazwa lor manier zot ti konsol so lespri.

¹⁴Mo finn konplimant zot avek fierte ar Tit, e zot pa finn fer mwa perdi pwin. Me parey kouma tou kiksoz mo finn dir zot, li vre, dan mem fason eloz ki nou finn fer lor zot ar Tit, li vre.

¹⁵So lafeksion pou zot pli gran ankor letan li rapel ki zot tou ti obeisan, kouma zot ti akeyir li avek respe, avek imilite.

¹⁶Mo dan lazwa parski mo kapav kont lor zot dan tou kiksoz.