Read Morisien 2 Ko 9 Bible Online

2 Ko 9 - Morisien bible

2 Ko 9

¹Li pa vremem neseser ki mo ekrir zot lor size led ki bizin avoy bann krwayan ki dan Zide.

²Mo konn zot bon lintansion, ek avek fierte mo finn dir bann Masedonien ki Akai finn pare depi lane dernier, ek sa finn ankouraz bannla pou azir.

³Mo pe avoy bann frer e bann ser kot zot, pouki sa fierte ki mo ena pou zot la, li pa bann parol dan vid. Kouma mo finn dir, zot vremem finn pare.

⁴Selma, si bann Masedonien vinn avek mwa e zot dekouver ki nanye pa finn pare, nou pou vremem onte; san mansione komie zot, zot pou dan laont, telman nou ti ena lasirans letan nou ti koze.

⁵Mo panse li pli bon demann bann frer e bann ser la vizit zot avan mwa, pou okip sa don zenere ki zot finn promet la. Koumsa li pou finn fini pare letan mo vini e sa pou prouve ki zot done avek zenerozite e non akontreker.

⁶Mazinn sa bien: seki plant tigit pou rekolte tigit, seki plant boukou pou rekolte boukou.

⁷Sakenn bizin donn dapre seki li finn deside dan so leker, san regrete ek san presion lor li. Bondie kontan dimoun ki donn avek lazwa.

⁸Bondie ena pouvwar donn twa plis ki bizin, pouki toultan to ena seki neseser, ek anplis pou to partaz dan bann bonaksion.

⁹Kouma Lekritir dir, “Li donn bann pov avek abondans, so bonker res gran pou touzour.”

¹⁰Bondie, ki fourni semans pou planter ek dipin pou manze, pou fourni zot avek semans, e pou miltipliye li pouki zot zenerozite li donn boukou fri.

¹¹Li pou toultan fer zot ena ase larises pouki zot res zenere; koumsa atraver nou, enn kantite dimoun pou remersie Bondie pou bann don ki zot finn done.

¹²Sa kontribision la, li pa zis konble seki lepep Bondie pe manke, me li fer enn debordman aksiondegras pou dir Bondie mersi.

¹³Akoz prev ki zot montre par zot servis, enn kantite pou glorifie Bondie pou zot fidelite anver Bonn Nouvel Lekris, zot gran zenerozite pou partaz zot dibien avek bannla, e avek tou lezot ankor.

¹⁴Bannla pou priye pou zot avek enn gran lafeksion akoz lagras extraordiner ki Bondie akord zot.

¹⁵Anou loue Bondie pou so don inkonparab!