Read Morisien Ga 1 Bible Online

Ga 1 - Morisien bible

Ga 1

¹Mwa Pol, apot, pa par volonte bann imin oubien lotorite zom, me par Zezi Kris ek Bondie Papa ki finn resisit li parmi bann mor,

²ek tou bann frer e ser ki avek mwa, Mo avoy sa let la bann legliz dan Galasi.

³Ki lagras ek lape ki sorti kot Bondie Papa ek Lesegner Zezi Kris, res ar zot.

⁴Zezi Kris, finn donn limem pou nou pese e li finn delivre nou dan sa lemonn move la dapre volonte Bondie nou Papa.

⁵Laglwar pou li pou touzour ek touzour. Amen.

⁶Sa etonn mwa avek ki vites zot finn tourn zot ledo ar Bondie ki ti apel zot par lagras Lekris, pou zot al aksepte enn lot Bonn Nouvel.

⁷Sa pa vedir ki ena enn lot Bonn Nouvel, me plito ena sertin dimoun ki pe trouble zot ek anvi sanz Bonn Nouvel Zezi Kris.

⁸Me, si noumem oubien enn anz sorti dan lesiel, vinn anons zot enn Bonn Nouvel kontrer avek saki nou, nou finn anonse, li pou modi pou sa!

⁹Nou finn deza dir, e nou pe redir li ankor: si kikenn anons enn Bonn Nouvel diferan ar saki zot finn resevwar, ki li modi!

¹⁰Asterla, eski mo pe rod faver bann imin oubien faver Bondie? Eski mo pe sey fer plezir bann imin? Si mo ti ankor pe fer plezir bann zom, alor mo pa ti pou enn serviter Zezi Kris.

¹¹Les mo dir zot, mo bann frer ek ser, sa Bonn Nouvel ki mo finn anons zot la, li pa sorti kot bann imin sa;

¹²e mo pa finn gagn li depi enn zom, e personn pa finn ansegn mwa sa, me li sorti atraver enn revelasion Zezi Kris.

¹³Zot finn tann koz mo ansien lavi kan mo ti ankor atase avek larelizion Zwif, kouma mo ti persekit legliz Bondie e mo ti rod detrir li.

¹⁴Mo ti devans tou mo bann frer Zwif ki ti dan mo laz dan pratik larelizion, sitan mo ti devoue pou tradision mo bann anset.

¹⁵Me Bondie dan so lagras finn swazir mwa avan mem ki mo finn ne e li finn apel mwa pou servi li.

¹⁶Kan li ti deside pou revel mwa so Garson, pouki mo kapav anons li ar bann payin, mo pa ti al kot personn pou demann konsey,

¹⁷mo mem pa finn mont Zerizalem kot bann ki ti apot avan mwa, me mo ti al dan Larabi, apre mo ti retourn dan Damas.

¹⁸Plitar, apre trwa-zan mo ti al Zerizalem pou vizit Pier[1] e mo ti res avek li pou kinz zour.

¹⁹Me mo pa ti trouv okenn lezot apot apar Zak, frer Lesegner.

²⁰Seki mo pe ekrir zot la, Bondie kone ki mo pa pe koz manti.

²¹Apre sa mo finn al dan bann rezion Lasiri ek Silisi.

²²Okenn manm legliz Zezi dan Lazide pa ti ankor konn mwa personelman lerla;

²³zot finn zis tann dir, “Sa zom ki avan ti pe persekit nou, asterla li pe anons sa mem lafwa ki li ti pe sey detrir la.”

²⁴E zot ti glorifie Bondie akoz mwa.