Read Morisien Ef 2 Bible Online

Ef 2 - Morisien bible

Ef 2

¹E zot, zot ti spiritielman mor akoz zot fot ek zot pese.

²Lontan zot ti pe viv sa lavi la; sa lepok la zot ti pe swiv bondie sa lemonn la, sa prins ki ant lesiel ek later, sa lespri ki pe azir aster parmi bann ki opoz Bondie.

³Nou osi, nou tou ti parmi sa bann la, nou ti pe viv dapre bann dezir natir pese, nou ti pe fer volonte nou natir e swiv so bann inpilsion. Nou ti vwe pou gagn koler Bondie kouma lezot.

⁴Me akoz Bondie ena boukou-boukou konpasion, e li ena enn gran lamour pou nou,

⁵letan nou ti spiritielman mor akoz nou bann fot, li ti donn nou lavi avek Lekris. Par lagras Bondie ki nou sove.

⁶Li finn resisit nou avek Lekris pou fer nou regne avek li lao dan lesiel.

⁷Par sa, Bondie anvi montre pou bann siek ki pe vini, rises so lagras, exprime par so bonte pou nou dan Zezi Kris.

⁸Par lagras ki zot sove, par mwayin lafwa; zot, zot pa finn fer nanye, sa enn kado Bondie sa.

⁹Li pa vinn atraver aksion imin, koumsa personn pa kapav fer fanor.

¹⁰Nou, nou louvraz Bondie, li finn fasonn nou, li finn kre nou dan Zezi Kris pouki nou realiz bann bonaksion ki Bondie finn prepare davans.

¹¹Rapel seki zot ti ete lontan. Zot non-Zwif par nesans. Bann ki ti konsider zotmem bann “sirkonsi” - par enn loperasion lor zot lekor - ti apel zot bann non-Zwif, bann ki “pa sirkonsi.”

¹²Rapel ki sa lepok la zot ti separe ar Lekris, zot ti andeor lepep Bondie, zot ti bann etranze. Zot pa ti ena okenn par dan bann lalians fonde lor promes Bondie. Zot ti san lesperans e san Bondie dan lemonn.

¹³Me aster dan linion avek Zezi Kris, zot ki lontan ti lwin, finn koste zot pre par disan Lekris.

¹⁴Lekris, limem nou lape. Dan so laser li fer de pep ki divize vinn enn sel. Li finn kraz miray ostilite ki separ bann lennmi.

¹⁵Li finn aboli lalwa, ek so komannman ek so bann regleman. Li ti oule apartir Zwif ek non-Zwif kre enn nouvo pep dan linion avek li, ek etablir lape.

¹⁶Par mwayin lakrwa li ti rekonsilie toulede dan enn sel lekor avek Bondie. Par lakrwa li ti touy laenn.

¹⁷Lekris finn vinn anons lape ar zot ki ti lwin ek ar bann ki pre.

¹⁸Par Lekris nou tou, Zwif ek non-Zwif, nou kapav prezant nou devan Bondie Papa dan enn sel Lespri.

¹⁹Ala kimanier zot nepli etranze, ni imigre, me zot sitwayin ansam ar bann krwayan e manm lafami Bondie.

²⁰Zot finn integre dan konstriksion ki ena bann apot ek bann profet pou fondasion, ek Zezi Kris limem ros ki tini tou.

²¹Limem ki solidite sa konstriksion la anantie; sak bout marye ansam pou mont enn tanp ki konsakre pou Lesegner.

²²Dan linion avek li, zot osi zot fer parti ansam avek lezot pou vinn enn lakaz kot Bondie abite par so Lespri.