Read Morisien Ef 3 Bible Online

Ef 3 - Morisien bible

Ef 3

¹Pou sa rezon la mwa, Pol, prizonie Zezi Kris pou zot ki bann non-Zwif, mo priye Bondie.

²Sirman zot finn tann koz lagras ki Bondie finn akord mwa pou realiz so mision pou zot dibien,

³setadir, ki manier par revelasion, mo finn gagn konesans so mister. Mo finn fini fer enn ti rezime lor la avan.

⁴Letan zot lir sa, zot kapav konpran konesans ki mo ena lor mister ki konsern Lekris.

⁵Bondie pa ti fer bann lezot zenerasion avan konn sa mister la. Aster li finn revel li ar so bann apot ek profet par Lespri.

⁶Ala mister la: bann non-Zwif gagn mem leritaz ki bann Zwif, zot manm mem lekor, e zot partaz mem promes dan Lekris Zezi par Bonn Nouvel.

⁷Bondie finn fer mwa serviter Bonn Nouvel par don lagras ki li ti fer mwa letan li ti azir par so pwisans.

⁸Parmi tou bann krwayan momem dernie parmi bann dernie. Malgre sa Bondie finn fer mwa enn gran faver: pou al anons bann non-Zwif larises infini ki Lekris ena,

⁹e fer tou dimoun kone ki fason Bondie, ki Kreater tou kiksoz, realiz sa mister ki li ti finn garde dan sekre depi toultan.

¹⁰Asterla atraver legliz, bann lotorite ek bann pouvwar ki lao dan lesiel kapav konn sazes Bondie dan tou so diferan form.

¹¹Tousala ti dapre plan eternel ki li finn realize par Zezi Kris nou Segner.

¹²Par Lekris ek par nou lafwa dan li nou kapav ena kouraz pou rant dan prezans Bondie ar konfians.

¹³Alor mo dimann zot napa dekouraze akoz soufrans ki mo pe pase pou zot; tousala li pou zot prop laglwar.

¹⁴Pou sa rezon la mo azenou devan Bondie Papa,

¹⁵limem Papa tou group dan lesiel ek lor later.

¹⁶Mo dimann li, dapre rises so laglwar, ki li fortifie zot leker par so Lespri.

¹⁷Mo priye ki Lekris res dan zot leker par lafwa. Mo priye ki zot bien anrasine ek bien etabli dan lamour,

¹⁸pouki zot bien sezi, ansam avek lepep Bondie, ki larzer, ki longer, ki oter e ki profonder

¹⁹lamour ki Lekris ena; enn lamour ki sirpas tou konesans, e ki ranpli zot antierman ar Bondie.

²⁰Par so pwisans ki azir dan nou, Bondie kapav fer boukou plis ki nou dimande, mem boukou plis ki nou kapav imazine,

²¹pou li tou laglwar dan legliz e dan Lekris, zenerasion apre zenerasion e pou toultan! Amen.