Read Morisien Ef 4 Bible Online

Ef 4 - Morisien bible

Ef 4

¹Mwa ki prizonie parski mo servi Lesegner, mo sipliy zot viv enn lavi ki dign sa lapel ki zot finn gagne la,

²ar limilite, douser ek pasians. Ki zot soutenir zot kamarad avek amour.

³Fer zefor pou gard linite Lespri par lape ki tini zot ansam.

⁴Ena enn sel lekor, enn sel Lespri, e Bondie ti apel zot pou enn sel lesperans.

⁵Ena enn sel Segner, enn sel lafwa, enn sel batem;

⁶enn sel Bondie, Papa tou dimoun, li Segner lor tou, li azir dan tou, li abit dan tou.

⁷Selma, sakenn parmi nou finn gagn lagras dapre zenerozite Lekris.

⁸Kouma Lekritir deklare: “Li ti mont dan oter, li ti amenn bann prizonie ar li, li ti fer don bann dimoun.”

⁹Aster, kisavedir “Li ti mont dan oter”? Savedir ki li ti finn osi desann dan bann profonder later.

¹⁰Alor sa dimoun ki finn desann la, limem dimoun ki finn mont pli ot ki tou lesiel ki ena, pou li ranpli liniver.

¹¹Limem ki finn fer don; ena li finn fer apot, lezot profet, evanzelis, paster ek ansegnan,

¹²pouki bann krwayan ena kapasite akonplir zot minister, pou grandi lekor Lekris.

¹³Koumsa nou ariv ansam dan linite nou lafwa, dan nou konesans Garson Bondie; nou devlope pou vinn bann krwayan adilt ziska nivo grander Lekris.

¹⁴Lerla nou pa pou kouma bann zanfan, ki balote, ki sakouye dan siklonn toukalite doktrinn ki bann dimoun rize servi pou antrenn lezot dan lerer.

¹⁵Okontrer, nou bizin koz laverite dan lamour pouki dan tou domenn nou grandi dan Lekris, limem ki latet.

¹⁶Par li bann diferan parti lekor vinn ansam; lekor antie tini ansam par bann zwentir; alors koumsamem li grandi e li devlope dan lamour.

¹⁷Dan nom Lesegner, mo averti zot: zot bizin aret viv kouma bann non-krwayan viv; bannla zot panse pena okenn valer,

¹⁸zot lespri dan teneb; bannla napa viv lavi ki Bondie oule parski zot ranpli ar lignorans ki sorti depi zot leker ros.

¹⁹Zot finn perdi tou santiman laont; zot viv enn lavi debos e zot ena enn dezir pou fer toukalite inpirte.

²⁰Pa koumsa ki zot ti aprann konn Lekris!

²¹Sirman antan ki Krwayan zot finn tann koz li, e zot finn gagn lansegnman lor laverite dan Zezi.

²²Alor zot bizin abandonn zot ansien natir, manier zot ti pe viv avan e ki pouri par bann fos dezir.

²³Fodre ki zot leker ek zot lespri renouvle konpletman.

²⁴Abiy zot avek enn nouvo natir, ki kre dapre resanblans Bondie dan vre lazistis e lapirte.

²⁵Rezet mansonz. Koz laverite ar zot prosin, parski nou tou manm enn sel lekor.

²⁶Si zot ankoler, pa fer pese. Pa les zot koler res ziska ki soley al kouse.

²⁷Pa donn diab okenn sans may zot.

²⁸Voler bizin aret kokin; okontrer li bizin fer travay onet ar so prop lame pouki li kapav ena seki bizin pou partaz ar bann pov.

²⁹Napa koz move koze, me servi bann parol ki fortifie e ki donn seki neseser pou dibien bann dimoun ki tann zot.

³⁰Pa fer Lespri Sin Bondie vinn tris, parski Lespri enn stanp ki Bondie finn met lor zot pou montre ki limem propriyeter; sa enn garanti ziska sa Zour kot Bondie pou delivre zot.

³¹Met dekote tou zot lamertim, zot koler, zot laraz, zot insilt, zot mesanste; tousala bizin disparet.

³²Zot bizin ena bonte ek boukou lafeksion pou lezot; pardonn zot prosin kouma Bondie finn pardonn zot par Lekris.