Read Morisien Fil 3 Bible Online

Fil 3 - Morisien bible

Fil 3

¹Asterla mo bann frer ek ser, mo souet zot lazwa dan Lesegner. Li pa enn problem pou mwa repet seki mo finn deza dir zot,

²fer atansion sa bann move dimoun kouma lisien la, zot pa fer nanye e zot pratik enn fos sirkonsizion.

³Nou, nou bann vre sirkonsi. Nou loue Bondie par so Lespri. Nou laglwar trouv dan Zezi e nou pa met nou konfians dan okenn imin.

⁴Pourtan mo ena ase rezon pou reklam sa bann privilez la. Si kikenn fer sa reklamasion la mo pou ankor pli for ki li.

⁵Mo finn sirkonsi lor witiem zour, e mo sorti dan ras Izraelit, dan tribi Benzamin. Mo enn Ebre pirsan e kouma enn Farizien, mo obeir lalwa.

⁶Mo ti telman kontan pratik lalwa pouki mo finn rann lavi dimoun legliz amer. Personn pa kapav repros nanye lor mo lavi.

⁷Tou sa bann kiksoz la ti pou mwa kouma enn profi, me asterla mo konsider zot kouma enn pert akoz Kris.

⁸Ler mo konpar grander dibien ki mo gagne dan konesans Zezi Kris, mo konsider tou kiksoz kouma enn lapert. Akoz li mo finn perdi boukou kiksoz ki mo konsider kouma enn bann salte pou mo kapav gagn Kris,

⁹e mo ini avek li. Mo pa kapav dir ki mo zis akoz mo pratik lalwa. Mo lazistis li baze lor lafwa dan Kris, enn lazistis ki sorti kot Bondie, baze lor lafwa.

¹⁰Mo ena enn dezir pou konn Kris ek pwisans so rezireksion, partisip dan so soufrans, e vinn parey kouma li dan so lamor,

¹¹avek lespwar ki mwa osi mo pou kapav resisite parmi bann mor.

¹²Mo pa pe pretann ki mo finn deza rant dan bit oubien vinn parfe. Me mo pe kontign al anavan pou gagn sa pri la, parski Zezi Kris limem finn sezi mwa.

¹³Mo bann frer ek ser, mo pa dir ki mo finn deza gagn pri la; mo ena enn sel sousi: bliye tou seki deryer mwa e mo fons devan pou gagn seki devan mwa.

¹⁴Mo galoup vit pou rant dan bit pou resevwar pri ki Bondie ofer mwa dan lesiel par Zezi Kris.

¹⁵Nou, bann adilt dan lafwa, nou bizin ena mem preokipasion. Me si zot ena enn lot lopinion lor ninport ki size, Bondie pou ekler zot.

¹⁶Me kot nou finn arive, anou kontigne tini ferm dan mem direksion.

¹⁷Mo bann frer, mo bann ser, zot tou bizin imit mwa. Nou finn donn bon lexanp, alor obzerv bien bann ki kondir zot dapre sa bon lexanp la.

¹⁸Mo finn deza dir zot e avek larm dan mo lizie mo pe redir zot ankor ki ena boukou dimoun ki viv kouma lennmi lakrwa Kris.

¹⁹Zot pe al ver zot destriksion; zot vant samem zot Bondie, zot fier pou kiksoz ki ti bizin fer zot onte; zot mazinn zis bann zafer sa lemonn la.

²⁰Me nou, nou bann sitwayin lesiel e nou pe atann nou Sover ek Segner Zezi Kris vini, li ki sorti depi laba.

²¹Grasa so pwisans ki kapav kontrol tou kiksoz, li pou transform nou lekor mortel pou rann li parey kouma so lekor glorifie.