Read Morisien Kol 4 Bible Online

Kol 4 - Morisien bible

Kol 4

¹Bann met, tret zot esklav dan enn fason zis ek korek, parski zot kone ki zot ousi zot ena zot Met dan lesiel.

²Pa aret priye; se sa ki pou gard zot lespri vif e dan remersiman.

³Kan zot priye, priye ousi pou nou: ki Bondie ouver enn laport pouki nou gagn lokazion anons mister Lekris; se pou sa ki mo dan prizon:

⁴pou temwagn mister Lekris kouma bizin.

⁵Rod meyer latitid anver bann non-Kretien; sezi tou lokazion.

⁶Ki zot parol touzour bienveyan, enn koze ki ena gou pou ekoute, e ki zot konn reponn sakenn kouma bizin.

⁷Zot pou gagn tou mo nouvel par Tisik, enn frer ki mo kontan, enn serviter fidel, mo konpagnon servis dan Lesegner.

⁸Mo avoy li expre pou donn zot nouvel e rekonfort zot.

⁹Onezim, sa frer fidel e bieneme, pe akonpagn li; li sorti kot zotmem li. Sa de la pou met zot okouran tou seki pe pase isi.

¹⁰Aristark ki dan prizon ek mwa dir zot bonzour, Mark ousi kouzin Barnabas — zot finn gagn bann instriksion lor li, si li vinn kot zot, akey li bien.

¹¹Zezi ousi ki apel Zistis avoy zot so bonzour. Parmi bann Zwif, zot tousel travay ek mwa pou Rwayom Bondie, zot mo konsolasion.

¹²Epafras, ki enn parmi zot e enn serviter Zezi Kris, dir zot bonzour. Li touzour priy pou zot avek tou so leker, pouki zot res ferm, avek bann konviksion for, e ki zot donn enn wi total pou fer volonte Bondie.

¹³Mo finn temwin ki li pran boukou lapenn pou zot, pou bann ki Laodise ek Ierapolis.

¹⁴Lik nou kamarad dokter ek Demas dir zot bonzour.

¹⁵Dir bonzour bann frer e bann ser ki dan Laodise; dir bonzour Ninfa ek legliz ki reyni dan so lakaz.

¹⁶Kan zot fini lir mo let, pas li dan Legliz Laodise. Lir ousi let ki mo finn avoy Laodise.

¹⁷Pa bliye dir Arsip, “Vey lor minister ki to finn resevwar dan Lesegner e fer ansort akonpli li bien.”

¹⁸Mwa Pol, mo ekrir sa bonzour la ek mo lame: Pa bliye mo dan prizon. Bondie li bon pou zot!