Read Morisien 1 Tes 1 Bible Online

1 Tes 1 - Morisien bible

1 Tes 1

¹Mwa Pol, ansam avek Silas ek Timote, nou pe ekrir legliz pep Bondie Papa ek Segner Zezi Kris, dan Tesalonik. Ki lagras ek lape res ar zot.

²Toultan nou pe remersi Bondie pou zot tou e nou pa fini pans zot dan nou lapriyer.

³Devan nou Bondie ek Papa nou rapel seki zot finn fer akoz zot lafwa, kouma zot finn travay dir akoz zot lamour pou Zezi e kouma zot finn tini ferm dan lesperans pou Zezi Kris.

⁴Mo bann frer ek ser, nou kone ki Bondie kontan zot e li finn swazir zot,

⁵parski kan nou finn amenn zot mesaz Bonn Nouvel, li pa zis par laparol, me li osi avek pwisans ek led Lespri Sin e avek enn gran konviksion. Zot kone kouma nou finn viv parmi zot pou zot prop dibien.

⁶Zot finn imit nou ek Lesegner, malgre boukou soufrans, e zot finn resevwar laparol avek lazwa dan Lespri Sin.

⁷Alor, zot finn vinn enn lexanp pou tou bann krwayan dan Masedwann ek Akai.

⁸Parol Lesegner ki sorti kot zot, pa finn zis propaze dan Masedwann ek Akai, me nouvel zot lafwa osi finn fane partou. Alor nou pena nanye pou koze.

⁹Tou dimoun pe rakonte ki kalite lakey nou ti gagne kot zot e kouma zot ti abandonn bann idol pou servi vre Bondie vivan,

¹⁰e pou atann so Garson Zezi dan lesiel, limem ki Bondie ti resisite parmi bann mor pou sov nou depi zizman Bondie ki pe aprose.