Read Morisien 1 Tes 3 Bible Online

1 Tes 3 - Morisien bible

1 Tes 3

¹Finalman, ler nou ti nepli kapav tini ankor, nou finn deside pou res tousel dan Atenn;

²e nou finn avoy nou frer Timote, kolaborater Bondie pou anons Bonn Nouvel Zezi Kris, pou ankouraz zot pou tini ferm dan zot lafwa,

³pouki personn parmi zot pa les zot abat par bann eprev ki nou pe fer fas. Zotmem, zot kone ki bann eprev parey fer parti plan Bondie pou nou.

⁴Letan nou ti ankor kot zot, nou ti prevenir zot ki nou pou gagn persekite. Kouma zot kone, samem ki finn arive.

⁵Pou sa rezon la, letan mo ti nepli kapav siporte, mo ti avoy Timote pou pran ransegnman lor zot lafwa. Mo ti per ki diab tant zot e tou sa lapenn ki nou finn done la, finn tom dan dilo.

⁶Me Timote fek retourne depi kot zot avek bann bon nouvel lor zot lafwa ek zot lamour. Li finn dir nou osi ki zot pe touzour pans nou e pe anvi retrouv nou parey kouma nou osi nou anvi retrouv zot.

⁷Mo bann frer e ser, akoz samem dan tou nou detres ek soufrans nou finn gagn boukou kouraz akoz zot lafwa.

⁸Aster la nou pe kapav viv parski zot finn tini ferm dan zot latasman avek Lesegner.

⁹Ki manier nou kapav remersi Bondie pou zot pou tou sa lazwa ki nou finn santi devan Bondie akoz zot.

¹⁰Lanwit-lizour, nou pe priye Bondie pouki nou kapav trouv zot fas a fas e azout seki manke dan zot lafwa.

¹¹Ki Bondie nou Papa limem ek nou Segner Zezi diriz nou lor sime ki amenn nou kot zot.

¹²Ki Bondie ogmant lamour ki zot ena ant zot e pou tou dimoun, parey kouma lamour ki nou ena pou zot.

¹³E ki li fortifie zot leker, e fer li vinn sin pouki zot kapav dibout san repros devan Bondie nou Papa ler nou Segner Zezi retourne avek tou bann sin. Amen.