Read Morisien 1 Tes 5 Bible Online

1 Tes 5 - Morisien bible

1 Tes 5

¹Li pa neseser ki nou ekrir zot, mo bann frer e ser, konsernan ler ek moman ki sa pou arive.

²Parski zotmem zot bien kone ki Lesegner, so zour pou arive parey kouma enn voler dan lanwit.

³Kan dimoun pou dir, “Ena lape ek sekirite,” lerlamem maler pou fini zot enn sel kou parey kouma douler enn madam ansint ki pe akouse. Zot pa pou kapav sove.

⁴Me zot, mo bann frer e ser, zot pa dan sa marenwar la pouki sa zour la may zot antret kouma enn voler.

⁵Zot tou zanfan lalimier e zanfan lizour; nou pa apartenir ni ar lanwit ni ar fernwar.

⁶Alor anou pa dormi kouma lezot, me anou res eveye ek kalm.

⁷Bann ki dormi, zot dormi aswar, bann ki bwar pou soule, zot bwar aswar,

⁸me nou ki viv dan lalimier lizour, nou bizin res kalm e kontrol noumem. Pran lafwa ek lamour kouma kwiras e lesperans ek delivrans kouma enn elmet lor nou latet.

⁹Bondie pa finn fer nou pou soufer pinision me pou gagn delivrans par nou Segner Zezi Kris,

¹⁰ki finn mor pou nou, pou ki nou kapav viv ini avek li mem si nou eveye ou pe dormi.

¹¹Alor ankouraz zotmem e fortifie zot bien, parey kouma zot deza pe fer.

¹²Mo bann frer e ser, nou pe dimann zot pou respekte bann ki pe travay parmi zot, ki instrir zot, e ki ansarz zot dan Lesegner.

¹³Ena boukou estim pou zot akoz travay ki zot fer. Ki ena lape parmi zot.

¹⁴Nou pe sipliy zot, frer ek ser, pou averti bann ki pares, ankouraz bann ki gagn per, ed bann feb, ena pasians pou zot tou.

¹⁵Asir zot ki personn pa rann lemal par lemal, me rod touzour fer seki bien ant zot e pou tou lezot dimoun.

¹⁶Res touzour dan lazwa.

¹⁷Priye toultan.

¹⁸Rann gras dan ninport ki sirkonstans, parski samem volonte Bondie pou zot dan zot lavi avek Zezi Kris.

¹⁹Pa met baryer dan travay Lespri Sin.

²⁰Pa mepriz mesaz bann profet;

²¹examinn tou kiksoz avek disernman e gard seki bon.

²²Evit tou seki asosie ar lemal.

²³Ki Bondie lape rann zot sin limem dan tou fason, ki li gard ferm zot lespri, ek zot lekor san okenn repros letan Zezi Kris nou Segner pou retourne.

²⁴Seki apel zot li fidel e li fer seki li dir.

²⁵Mo bann frer e ser, priye osi pou nou.

²⁶Fer konpliman tou bann frer e ser, anbras zot tou.

²⁷Mo sipliy zot lor nom Lesegner, lir sa let la avek tou zot bann frer e ser.

²⁸Ki lagras Zezi Kris nou Segner res avek zot.