Read Morisien 1 Tim 5 Bible Online

1 Tim 5 - Morisien bible

1 Tim 5

¹Pa fer brit ar enn vie dimoun, me koz ar li kouma to koz ar to papa.

²Tret bann ti zenes kouma to frer, bann vie madam kouma to mama, bann zennfi kouma to ser, avek respe.

³Pran swin bann vev, sirtou seki retrouv zot dan labandon.

⁴Si enn vev ena zanfan ou tizanfan, zot bizin montre li kouma met anpratik zot lafwa anver zot fami e rann zot paran ou gran paran seki zot dwa. Vremem, sa pou fer plezir Bondie.

⁵Bann vre vev, bann seki tousel, bizin met zot lesperans zis dan Bondie tousel ek priye, lanwit-lizour, priye e demann Bondie ed zot.

⁶Me seki nek pans zis lamizman li deza enn kadav ki pe viv.

⁷Tousala, to bizin dir afin ki zot san repros.

⁸Si kikenn pa pran swin so fami, li finn fini renie so lafwa, e sa li pir ki enn dimoun ki pa krwar.

⁹Pou ki enn vev inskrir li lor lalis ofisyel, fodre ki li ena plis ki swasant-an e ki li finn marye enn sel fwa.

¹⁰To bizin gete si li ena bon repitasion, si li finn bien elve so bann zanfan, si li finn konn akey dimoun, si li finn met limem oservis bann frer ek ser ki vini, si li finn aport sekour bann malere, si li finn fer dibien ek bann bonaksion.

¹¹Parkont, pa met bann zenn vev lor lalis.

¹²Kan zot pa kapav tini ek ki zot le remarye, zot met Zezi Kris dekote e zot kas zot premie lalians.

¹³Anplis zot pena nanye afer, zot nek marse, al dan tou lakaz, fer palab, koz ninport.

¹⁴Preferab zot remarye, gagn zanfan e okip zot lakaz pouki bann adverser pa koz nou koze.

¹⁵Deza lamem, ena ki finn pran move sime e pe swiv Satan.

¹⁶Si enn madam krwayan ena vev dan so fami, li bizin pran li ansarz e pa fie lor legliz parski legliz bizin okip bann vev ki tousel.

¹⁷Bann ansien ki diriz bien legliz merit enn doub saler, sirtou bann ki bizin travay dir pou prese ek ansegne.

¹⁸Lekritir dir, “Pa met enn mizelier avek enn bef ki pe kraz dible,” e “Enn zouvrie merit so saler.”

¹⁹Napa les fer akizasion kont enn ansien si pena de ou trwa temwin.

²⁰Si kikenn fer pese, repran li anpiblik koumsa lezot pou fer atansion.

²¹Mo sipliy twa, anprezans Bondie e Zezi Kris, devan tou bann anz beni, obzerv sa bann regleman la dan enn fason strik, san fer faver personn.

²²Pa inpoz lame vit-vit lor personn, sinon to pou konplis pese lezot. Pran to distans, gard twa prop.

²³Aret bwar zis dilo, pran inpe divin pou to lestoma, sa pou evit twa gagn febles.

²⁴Ena dimoun zot pese deor letan get zot; ena lekontrer, aprekou ki dekouver zot pese.

²⁵Mem zafer pou bann bonaksion, pou trouv zot klerman; mem seki pa tro vizib difisil pou kasiet.