Read Morisien 2 Tim 1 Bible Online

2 Tim 1 - Morisien bible

2 Tim 1

¹Mwa, Pol, mo enn apot Zezi Kris par volonte Bondie. Mo finn resevwar mision pou proklam promes lavi ki gagne kan nou enn sel avek Lekris Zezi.

²Pou twa Timote, mo zanfan bieneme, Bondie Papa ek Zezi Kris nou Segner donn twa gras, mizerikord ek lape.

³Mo rann gras Bondie ki mo servi avek enn konsians kler, parey kouma mo bann anset. Lanwit, lizour mo pa aret pans twa dan mo lapriyer.

⁴Kan mo rapel to larm, mo anvi trouv twa, pou mo leker kontan.

⁵Mo touzour rapel lafwa sinser ki dan to leker. Samem lafwa ki to finn resevwar depi to gramer Lois ek to mama Enis.

⁶Ala kifer mo dimann twa gard vivan don spiritiel ki Bondie finn depoz dan to leker kan mo finn inpoz lame lor twa.

⁷Lespri ranpli nou avek lafors, lamour ek kontrol lor noumem.

⁸Pa per pou donn to temwagnaz lor nou Segner. Pa gagn onte pou mwa ki dan prizon akoz li. Pran to soufrans pou Bonn Nouvel avek lafors ki Bondie done.

⁹Li finn sov nou ek li apel nou, non pa akoz nou kapasite, me par so prop volonte. Li donn nou so la gras dan Lekris Zezi avan tou siek.

¹⁰Sa lagras la ti manifeste par larive Lekris Zezi nou Sover ki finn detrir pouvwar lamor ek donn lavi eternel par so Bonn Nouvel.

¹¹Bondie finn swazir mwa kouma enn predikater, enn apot, enn dokter.

¹²Akoz samem zordi mo pe soufer. Me mo touzour konfian, mo napa per, mo kone dan ki mo finn met mo lafwa e mo sir e sertin ki li pou vey lor mwa ziska Gran Zour la vini.

¹³Swiv touzour bann bon parol ki to finn tann mwa dir dan lafwa ek lamour lor Lekris Zezi.

¹⁴Gard bann bon lansegnman avek led Lespri Sin ki touzour prezan dan nou leker.

¹⁵To kone, tou bann ki dan provins Lazi, finn tourn ledo ar mwa, parmi ena Fizel ek Ermozenn.

¹⁶Mo dimann Bondie montre so mizerikord anver Onesifor ek so fami. Li finn touzour rekonfort mwa, zame li finn ignor mwa ki enn prizonie.

¹⁷Okontrer, kan li ariv dan Rom, li finn rod partou ziska li trouv mwa.

¹⁸Bondie beni li pou Gran Zour la. To konn bien kantite servis li finn rann mwa dan Efez.