Read Morisien 2 Tim 4 Bible Online

2 Tim 4 - Morisien bible

2 Tim 4

¹Mo dimann twa, anprezans Bondie ek Lekris Zezi ki bizin vini pou ziz bann vivan ek bann mor par so manifestasion ek so regn,

²proklam laparol, insiste touletan pou konvink. Fer repros ou donn ankourazman ki bizin kan to donn lansegnman. Pa perdi pasians.

³Ler pou arive kot dimoun pou nepli anvi ekout bon lansegnman. Zot pou prefer swiv zot dezir ek ekout bann predikater ki pou vinn met dan zot zorey seki zot anvi tande.

⁴Zot pou tourn ledo ar laverite pou ekout toutsort kalite zistwar.

⁵Me twa, gard to lespri kler. Siport leprev, fer to travay predikasion Bonn Nouvel. Ranpli to servis.

⁶Pou mwa letan finn sone pou gran sakrifis. Mo ler finn arive pou kit sa lavi la.

⁷Mo finn konbat bon konba. Mo finn galoup mo lekours, mo finn gard mo lafwa.

⁸Asterla, finn ler pou mo gagn kouronn lazistis ki Lesegner, sel bon ziz, pou donn mwa zour zizman. Pa mo tousel, me tou seki finn atann so zour dan lamour.

⁹Fer enn demars vinn zwenn mwa pli vit ki to kapav.

¹⁰Demas finn prefer lemonn prezan, li finn abandonn mwa; li finn rant dan Tesalonik. Kresenns finn al Galasi, Tit finn al Dalmasi.

¹¹Selma Lik avek mwa. Pran Mark, amenn li ar twa. Li pou kapav ed mwa isi.

¹²Mo finn avoy Tisik Efez.

¹³Kan to vini, amenn mo palto ki mo finn lese dan Troas avek Karpis. Amenn bann liv osi sirtou bann roulo papie.

¹⁴Alexand, forzron, finn bien bles mwa; Lesegner pou pini li selon seki li finn fer.

¹⁵To osi, fer atansion ar li, parski li enn adverser terib kont nou predikasion.

¹⁶Premie fwa kan mo ti ena pou prezant mo defans, pa ti ena personn pou soutenir mwa. Zot tou ti abandonn mwa. Bondie pardonn zot.

¹⁷Me Lesegner ti avek mwa, li ti donn mwa lafors pou proklam so mesaz devan tou bann payin. Li ti tir mwa dan zot grif.

¹⁸Lesegner pou delivre mwa ankor depi tou bann piez ek li pou gard mwa pou so rwayom. Laglwar pou li dan leternite. Amen.

¹⁹Salye Prisil ek Akila ek osi lafami Onesifor.

²⁰Erast finn res dan Korint. Mo finn les Trofim malad dan Mile.

²¹Fer demars vini avan liver. Ebril, Pidens, Lin, Klodia ek tou bann frer e bann ser salye twa.

²²Mo priye ki Lesegner beni to lavi e donn twa so Lagras.