Read Morisien Tit 1 Bible Online

Tit 1 - Morisien bible

Tit 1

¹Mwa Pol, serviter Bondie, mo enn apot Zezi Kris ki finn swazir pou amenn bann krwayan dan lafwa ek gid zot dan laverite.

²Zot pou gagn lesperans lavi eternel ki Bondie finn promet depi lontan. E Bondie zame koz manti.

³Kan finn ariv lemoman, Bondie nou Sover finn manifeste so parol par enn proklamasion ki finn konfie mwa par so lord.

⁴Mo adres sa let la pou twa Tit, mo vre zanfan dan lafwa. Mo priye Bondie nou Papa ek Lekris Zezi nou Sover: ki li amenn lagras ek lape lor twa.

⁵Mo finn les twa dan Kret, pou terminn lorganizasion legliz ek etablir bann ansien dan sak lavil. Pa bliye seki mo finn dir twa:

⁶enn pret bizin ireprosab, mari enn sel fam. So zanfan bizin krwayan ek ena bon repitasion ek bon kondwit.

⁷Enn levek, antan ki enn zeran Bondie, bizin ireprosab: fode pa ki li arogan, fer koler, biver, batayer, kontan kas.

⁸Okontrer, li bizin akeyan, fer dibien, ekilibre, enn dimoun zis, devoue, ki konn kontrol limem.

⁹Li bizin tini ferm dan mesaz ki vre, parey kouma ti finn ansegne, pouki so lansegnman ed dimoun ek koriz bann ki opoz zot.

¹⁰Wi, ena boukou, sirtou parmi bann sirkonsi, ki ena lespri rebel ek tronp lezot par bann bel-bel diskour kot zot koz ninport.

¹¹To bizin ferm zot labous. Sa bann dimoun la amenn boulversman dan bann fami ek zot pran kas.

¹²Ena enn parmi, enn zot profet, ki finn dir, “Bann Kretwa enn bann manter; zot gourman ek pares kouma bebet!”

¹³Sa temwagnaz la, li vre. Sa kalite dimoun la fode pa tolere. Bizin fer zot grandi dan lafwa.

¹⁴Pa pret atansion ar tou sort kalite zistwar ki bann Zwif pe rakonte ek bann komannman imin ki fer dimoun tourn ledo ar laverite.

¹⁵Tou kiksoz pir pou dimoun ki gard zot pir. Me pou bann ki inpir e ki pena lafwa, nanye pa pir. Zot lespri mem e zot konsians pa prop.

¹⁶Zot dir ki zot konn Bondie, me par zot bann aksion, zot renie li. Zot enn bann rebel ki Bondie deteste ek zot pa vo nanye pou enn sou.