Read Morisien Eb 11 Bible Online

Eb 11 - Morisien bible

Eb 11

¹Lafwa vedir enn lasirans dan bann kitsoz ki to pe atann e enn konviksion dan kitsoz ki to pa trouve.

²Akoz zot lafwa, Bondie ti aprouv bann gran dimoun lontan.

³Par lafwa nou konpran ki Bondie finn kre liniver par so parol, pou sa rezon la seki nou pe trouve finn fer apartir seki nou pa trouve.

⁴Par lafwa, Abel finn ofer Bondie enn meyer sakrifis ki Kain. Akoz so lafwa li finn gagn faver Bondie kouma enn zom zis, parski Bondie limem finn aprouv so sakrifis. Li finn mor, me par so lafwa li ankor pe koze.

⁵Par lafwa, Enok finn anleve lao dan lesiel kot Bondie e li pa finn mor. Personn pa ti kapav trouv li parski Bondie finn pran li. Lekritir dir ki avan Enok ti finn anleve, Bondie ti aprouv li kouma kikenn ki finn fer li plezir.

⁶San lafwa, personn pa kapav fer Bondie plezir. Parski kikenn ki apros Bondie bizin krwar ki li existe e ki Bondie rekonpans dimoun ki rod li.

⁷Par so lafwa, Noe finn tann warning Bondie lor kitsoz ki pou arive, ki li pa ankor trouve. Li finn obeir Bondie e finn ranz enn bato, e sa bato la finn permet li sov lavi so fami. Par sa Noe finn kondann lemonn, e akoz so lafwa, Bondie finn konsider li kouma enn eritie lazistis.

⁸Par lafwa, Abraam ti obeir ler Bondie ti apel li pou al dan pei ki li ti bizin resevwar kouma eritaz. Li kit so prop pei san ki li kone kot li pe ale.

⁹Par lafwa, li finn viv dan enn pei etranze ki Bondie ti promet li. Li ti res anba latant avek Izaak ek Zakob, ki ti erit mem promes Bondie kouma li.

¹⁰Abraam ti pe atann sa lavil avek enn fondasion solid la, ki Bondie limem arsitek e konstrikter.

¹¹Par lafwa, Sara, malgre so vieyes, ti resevwar pouvwar pou gagn zanfan parski li ti krwar dan fidelite Bondie ki ti finn fer sa promes la.

¹²Atraver enn sel zom, Abraam ki ti pratikman mor, finn donn nesans enn kantite desandan parey bann zetwal dan lesiel, parey kouma kantite lagrin disab lor laplaz ki pa kapav konte.

¹³Zot tou finn mor dan lafwa san ki zot finn resevwar bann promes Bondie, me zot finn kontan parski zot finn trouv li delwin. Zot ti konfese ki zot bann etranze ek exile lor later.

¹⁴Dimoun ki ti koz koumsa montre ki zot ti pe ankor rod enn pei pou zot etabli.

¹⁵Si zot ti ena antet pei ki zot ti finn kite, zot ti pou ena lokazion pou retourn laba.

¹⁶Me anrealite, zot ti anvi enn pei pli meyer, setadir, enn pei dan lesiel mem. Akoz samem Bondie pa onte ki zot apel li zot Bondie; parski li finn prepar enn lavil pou zot.

¹⁷Kan Bondie ti teste Abraam, par lafwa li ti ofer Izaak kouma sakrifis. Abraam ki finn resevwar promes Bondie, ti pre pou sakrifie so sel garson.

¹⁸Bondie ti dir li, “Atraver Izaak ki to pou gagn sa bann desandan ki mo finn promet twa la.”

¹⁹Abraam ti rekonet ki Bondie kapav redonn lavi dimoun ki finn mor, e dan enn sertenn fason sinbolik, li vre ki Abraam ti regagn Izaak.

²⁰Par lafwa Izaak ti beni Zakob ek Esai pou zot lavenir.

²¹Par lafwa Zakob, letan li ti pre pou mor, ti beni sak garson Zozef. Li ti “apiy lor so baton pouki li kapav ador Bondie.”

²²Par lafwa Zozef, letan li ti pre pou mor, li ti koz lor depar bann Izraelit depi Lezip, e li ti dir ki bizin fer avek so lezo apre so lamor.

²³Par lafwa, bann paran Moiz ti kasiet li trwa mwa apre so nesans, parski zot ti trouv zanfan la bien zoli e zot pa ti per pou dezobeir lord lerwa.

²⁴Par lafwa, Moiz ler li finn grandi, li ti refiz apel li garson tifi Faraon.

²⁵Li ti prefer gagn maltrete ansam ar pep Bondie olie ki fer so leker kontan par plezir pese, ki zis pou enn ti moman.

²⁶Li ti konsidere ki soufer pou Lemesi ena boukou plis valer ki bann trezor Lezip, parski li ti gard so lizie fixe lor rekonpans ki pou vini apre.

²⁷Par lafwa, Moiz ti kit Lezip, san ki li gagn per lakoler lerwa; li ti tini ferm parski li finn trouv Bondie invizib.

²⁸Par lafwa, li ti selebre fet Pak e li ti donn lord pou fann disan lor laport bann lakaz pouki anz destrikter pa touy bann tibaba premie-ne dan Izrael.

²⁹Par lafwa, bann Izraelit ti travers Lamer Rouz koumadir later sek; me kan bann Ezipsien ti sey pase, lamer ti refoule e zot tou ti mor.

³⁰Par lafwa, miray Zeriko ti tonbe, apre ki bann Izraelit ti mars otour li pandan set zour.

³¹Par lafwa, Raab, ki ti enn prostitie, pa ti mor avek lezot ki ti dezobeir Bondie parski li ti akey bann espion kot li.

³²Ki mo kapav dir ankor? Letan pa ase pou mo koz lor Zedeon, Barak, Sanson, Zefta, David ek Samiel ek lezot profet.

³³Par la fwa, zot finn gagn laviktwar lor bann rwayom, zot finn fer seki drwat ek resevwar bann promes Bondie. Zot finn ferm lagel bann lion;

³⁴zot finn tegn gran-gran dife violan, zot finn sap dan lamor par lepe, malgre zot febles zot ti repran lafors, zot ti inbatab dan lager e zot finn fer bann larme etranze sove.

³⁵Par lafwa, bann fam ti retrouv zot fami ki ti lev depi lamor. Ena ti tortire e zot ti refiz zot delivrans parski zot ti anvi gagn enn lavi meyer apre zot rezireksion.

³⁶Lezot ti soufer bann mokri e ti gagn bate kout fwet; lezot ti ansene e ti zet zot dan prizon.

³⁷Lezot ti mor kout ros; ena, ti koup zot ar lasi; ena, ti koup zot an-de ar lepe. Lezot bouz isi, bouz laba avek zis lapo mouton ou kabri lor zot kouma linz. Zot pena nanye, zot persekite ek maltrete;

³⁸lemonn pa ti dign pou zot, e zot ti al viv dan bann dezer, bann montagn bann kavern ek bann lakav.

³⁹Akoz zot lafwa, zot tou finn resevwar enn bon temwagnaz, me pourtan zot pa finn trouv promes Bondie realize.

⁴⁰Ofet Bondie finn prevwar kitsoz meyer pou nou, pouki selma ansam ar nou, zot pou vinn parfe.