Read Morisien Eb 13 Bible Online

Eb 13 - Morisien bible

Eb 13

¹Kontigne kontan zot kamarad kouma bann frer ek ser.

²Pa refiz pou akeyir bann etranze dan zot lakaz. Dimoun ki finn fer sa, zot finn akeyir bann anz kot zot san ki zot kone.

³Mazinn bann ki dan prizon, fer koumadir zot osi, zot ansam dan prizon e parski zot enn mem lekor, partaz soufrans bann ki pe gagn maltrete.

⁴Respekte lavi maryaz. Bann ki finn marye bizin res fidel avek zot lalians parski Bondie pou ziz bann ki azir enn fason imoral ek komet adilter.

⁵Ki lamour pou larzan pa determinn zot lavi, kontant zot avek seki zot ena, parski Bondie finn dir “Zame mo pa pou kit twa, ni abandonn twa.”

⁶Akoz samem nou kapav dir avek konfians, “Lesegner, limem mo sekour, Mo pa pou per nanye. Ki dimoun kapav fer kont mwa?”

⁷Mazinn zot bann ansien dirizan ki finn anons zot parol Bondie. Mazinn fason ki zot ti pe viv e kouma zot finn mor, e imit zot lafwa.

⁸Zezi Kris, li parey yer, zordi ek pou touzour.

⁹Pa les tousort lansegnman etranze anbet zot. Li bon ki zot fortifie zot leker avek lagras Bondie, e non pa par bann regleman konsernan manze. Bann ki finn obzerv sa bann regleman la pa finn tir okenn benefis ladan.

¹⁰Bann pret ki servi dan sanktyer pena drwa manz sakrifis ki ena lor lotel.

¹¹Gran pret amenn disan zanimo dan sanktyer pou ofer sakrifis pou efas pese; me lekor sa bann zanimo la ti brile andeor zot landrwa kot zot ti reste.

¹²Pou sa rezon la, Zezi ti mor andeor lavil pou pirifie lepep avek so prop disan.

¹³Alor anou al ver li andeor kan pou partaz so imiliasion.

¹⁴Nou pena enn lavil permanan isi lor later; me nou pe atann sa lavil ki pe vini la.

¹⁵Alor anou kontign ofer Bondie nou louanz kouma enn sakrifis, setadir fri bann parol ki rekonet li kouma Segner.

¹⁶Pa bliye pou fer dibien ek partaz seki zot ena, parski samem bann sakrifis ki fer plezir Bondie.

¹⁷Obeir zot dirizan e swiv zot lord, parski bannla pe vey lor zot lam, zot bann dimoun ki bizin rann kont Bondie. Fer zot travay avek boukou lazwa e non pa avek tristes parski sa pa pou amenn okenn lavantaz pou zot.

¹⁸Priye pou nou. Nou sir ki nou ena enn konsians kler ek enn volonte pou azir kouma bizin.

¹⁹Mo dimann zot pou priye spesialman pouki Bondie retourn mwa pli vit ankor kot zot.

²⁰Bondie, lasours lape, finn resisit nou Segner Zezi, gran Berze bann mouton, ki finn vers so disan ki garanti enn lalians eternel.

²¹Ki sa Bondie lape la, fer zot pratik tou seki bon pou zot fer so volonte; ki li realiz dan nou seki bon devan so lizie atraver Zezi Kris, pou li laglwar pou touzour.

²²Mo bann frer ek ser, mo fer enn lapel ar zot; ekout sa mesaz lankourazman la avek pasians, parski seki mo finn ekrir; li pa tro long.

²³Mo anvi fer zot kone ki nou frer Timote finn sorti dan prizon. Si li pa tarde pou vini, mo pou kapav amenn li avek mwa kan mo vinn get zot.

²⁴Fer konpliman tou zot dirizan, ek tou pep Bondie. Bann frer e bann ser an Itali fer zot konpliman.

²⁵Ki lagras Bondie res ar zot tou.