Read Morisien Eb 4 Bible Online

Eb 4 - Morisien bible

Eb 4

¹Pandan ki promes pou rant dan repo Bondie touzour valab, anou pran kont pouki personn parmi zot pa perdi sa lokazion pou rant ladan la.

²Bonn Nouvel finn vinn kot nou parey kouma kot bannla ki ti dan dezer. Me mesaz ki zot finn tande pa finn benefisie zot, parski zot pa finn aksepte mesaz la avek lafwa.

³Nou ki finn krwar, nou finn resevwar sa repo ki Bondie ti promet la, ler li ti dir; “Dan mo koler mo ti fer serman, zame zot pa pou rant dan mo repo.” Li ti dir sa, mem si so travay ti finn konplete depi kreasion lemonn.

⁴Parski konsernan setiem zour, kikpar dan Lekritir finn dir, “Bondie ti repoze setiem zour apre tou so travay.”

⁵Lor sa zafer la, finn osi dir, “Zame zot pa pou rant dan mo repo.”

⁶Promes pou rant dan repo li touzour valab, e bann ki finn resevwar sa promes la anpremie, pa finn reysi parski zot pa finn obeir.

⁷Alor Bondie finn met anplas enn lot zour ki apel “zordi”. Boukou lane apre li ti dir atraver David: “Zordi kan zot tann so lavwa pa ferm zot leker.”

⁸Ofet si Zozwe ti finn kondir lepep dan sa repo la, Bondie pa ti pou koz lor enn lot zour.

⁹Alor ena enn repo ki parey kouma saba ki res anrezerv pou pep Bondie;

¹⁰parski dimoun ki rant dan repo Bondie, li osi pran repo dan so travay parey kouma Bondie osi finn fer.

¹¹Anou fer tou zefor pou rant dan sa repo la pouki personn ant nou pa tonbe akoz dezobeisans parey kouma nou anset ti fer.

¹²Avredir Parol Bondie, li vivan ek li ena lefe. Li pli fite ki enn lepe koup de kote. Kan li perse, li al dan fon, mem ziska kot nou lam separe ar nou lespri; ziska nou zwentir ek lamwel. Li analiz seki ena dan panse ek leker imin.

¹³Dan kreasion, nanye pa invizib pou lizie Bondie. Devan li nou touni, so lizie trouv tou e zis avek limem ki nou bizin rann kont.

¹⁴Parski nou ena enn gran pret, Zezi Garson Bondie, ki finn travers lesiel ziska dan prezans Bondie, anou tini ferm dan lafwa ki nou konfese.

¹⁵Nou pena enn gran pret ki pa kapav sinpatiz ar nou dan nou febles, me nou ena enn ki finn konn tantasion dan tousort fason, me ki pa finn fer pese.

¹⁶Avek konfians, anou apros tronn Bondie pou resevwar so mizerikord ek so lagras pou ed nou kan nou bizin.