Read Morisien Eb 7 Bible Online

Eb 7 - Morisien bible

Eb 7

¹Melkisedek, ti lerwa Salem e pret Bondie Treo. Letan Abraam sorti batay kot li ti ekraz bann lerwa, Melkisedek ti zwenn li e ti beni li.

²Abraam ti donn li enn diziem lor tou seki li ti ena. Dabor Melkisedek vedir “lerwa lazistis.” Me li osi lerwa Salem ki vedir “lerwa lape.”

³Li pena ni papa, ni mama, ni zenealozi; li pena ni komansman, ni lafin. Li parey kouma Garson Bondie e li pret pou touzour.

⁴Remarke kouma li gran; nou anset Abraam ti donn li enn diziem seki li ti ena.

⁵Dapre lalwa, bann desandan Levi, ki pret, ena drwa dimann lepep ladim, setadir zot bann prop frer ki osi desandan Abraam.

⁶Melkisedek, pa enn desandan Levi, me li ti kolekte ladim ar Abraam e anplis li finn beni Abraam ki finn resevwar promes Bondie.

⁷Pena okenn dout. Seki pli tipti resevwar benediksion avek seki pli gran.

⁸Bann desandan Levi ki resevwar ladim, zot bann dimoun mortel; tandi ki Melkisedek ki pa finn konn lamor, li finn resevwar ladim.

⁹Nou kapav mem dir ki Levi limem ki ti resevwar ladim, li ti osi donn ladim atraver Abraam.

¹⁰Kan Melkisedek ti zwenn Abraam, Levi pa ti ankor ne; dan enn fason koze, nou kapav dir ki li ti dan Abraam.

¹¹Lor baz pretriz Levitik ki lepep Izrael ti gagn lalwa; si perfeksion ti posib par sa pretriz la, kiserti atann enn lot pret dapre Melkisedek, si ena enn dapre Aaron?

¹²Kan ena sanzman dan saserdos pretriz, li osi neseser ki sanz lalwa.

¹³Sa dimoun pouki sa tex la finn ekrir, nou Segner, li apartenir a enn lot tribi kot zame personn pa finn servi kouma pret.

¹⁴Li kler ki nou Segner li enn desandan tribi Zida, me Moiz pa finn dir nanye lor sa tribi la ler li ti koz lor bann pret.

¹⁵Li pli kler ankor letan enn lot pret parey Melkisedek paret,

¹⁶kikenn ki finn vinn pret, non par bann regleman legal konsernan so desandans imin, me par pouvwar enn lavi ki pa kapav detrir.

¹⁷Ofet Lekritir dir: “To pret pou touzour dapre Melkisedek.”

¹⁸Dan enn kote ena labolision enn vie komannman parski li feb ek li initil,

¹⁹parski lalwa pa finn amenn nanye ki parfe; lot kote finn ena enn meyer lesperans, e atraver li, nou kapav apros Bondie.

²⁰Anplis ena osi serman Bondie. Lezot ki finn vinn pret pa finn fer okenn serman.

²¹Me sa dimoun la ti vinn pret par enn serman kan Bondie ti dir: “Lesegner finn fer enn serman e li pa pou sanz so lide: ‘To enn pret pou touzour.’ ”

²²Par sa serman la Zezi garanti pou nou enn meyer lalians.

²³Anplis, avan ti ena enn kantite pret, me zot pa ti kapav kontign zot travay parski lamor ti anpes zot.

²⁴Me Zezi viv pou touzour e so travay kouma pret li permanan.

²⁵Alor samem li kapav sov dimoun ki vinn kot Bondie atraver li, parski li touzour vivan pou pled dan zot faver.

²⁶Samem sa kalite gran pret la ki nou ti bizin. Kikenn ki sin, san okenn defo, ki pena pese, separe avek bann peser e ki plase pli ot dan lesiel.

²⁷Li pa kouma lezot gran pret, li pa bizin ofer sakrifis tou lezour, dabor pou so prop pese apre pou pese lepep. Sa li finn fini fer enn sel fwa pou tou, kan li finn ofer limem an sakrifis.

²⁸Lalwa Moiz etablir bann dimoun ki feb kouma gran pret. Me parol serman Bondie ki finn arive apre lalwa, etabli kouma gran pret enn Garson ki finn vinn parfe pou touzour.