Read Morisien Eb 9 Bible Online

Eb 9 - Morisien bible

Eb 9

¹Asterla, mem dan premie lalians, ti ena bann rit konsernan ladorasion ek sanktyer ki ti lor later.

²Ti instal enn doub latant. Dan so premie parti kot ena sandelie, enn latab avek dipin sakre, ti apel li landrwa sin.

³Deryer deziem rido, ena sa lot parti ki apel “Pli sin ki sin”.

⁴Ti ena laba enn lotel an-or kot bril lansan. Ena la osi enn kof lalians an-or. Dan kof la ti ena enn ti vaz an-or ki kontenir lamann ek baton Aaron ki ti finn fleri ek bann komannman lalians grave lor ros.

⁵Parlao li, ti ena bann Seribin ki avek zot lonbraz ti kouver landrwa kot ti ofer disan pou pardonn pese. Me ler pa ankor arive pou koz tousala andetay.

⁶Kan tou kitsoz finn pare koumsa, bann pret rant regilierman dan sa premie parti la pou fer zot servis.

⁷Me dan deziem parti, selman gran pret ki ti rant laba enn fwa par an. Li bizin amenn avek li disan ki li ofer pou limem ek pou bann fot ki lepep finn komet involonterman.

⁸Par sa, Lespri Sin pe montre ki sime ki amenn dan sanktyer pa ankor ouver, osi lontan ki premie latant ankor la.

⁹Sa enn sinbol pou letan aster, pou montre ki sakrifis ki pe ofer pa pirifie dimoun ki pe ofer li.

¹⁰Me li konsern selman manze, bwar ek diferan seremoni pirifikasion, enn bann rit imin ki finn inpoze ziska ki tou pou sanze pou toultan.

¹¹Me kan Kris, gran pret tou bann dibien fitir[1] finn vini, li finn travers enn latant pli gran e pli parfe, ki pa finn fabrike par lame imin, setadir ki pa fer parti sa kreasion la.

¹²Li finn rant enn fwa pou tou dan sanktyer, non pa avek disan bouk oubien toro, me avek so prop disan. Koumsamem li finn delivre nou pou toultan.

¹³Avredir si nou fann disan bouk ek toro, oubien lasann enn zenis lor dimoun pou pirifie zot,

¹⁴asterla, ki kantite disan Kris pli efikas! Par Lespri eternel, li finn ofer limem ar Bondie kouma enn sakrifis parfe, pou pirifie nou konsians; nou pena pou fer bann rit initil, me nou kapav servi Bondie vivan.

¹⁵Ala kifer li mediater enn nouvo lalians, pouki bann ki finn apele kapav resevwar leritaz eternel ki finn promet, parski finn ena enn lamor ki finn vinn efas fot ki zot finn komet anba ansien lalians.

¹⁶La kot ena enn testaman, li neseser prouv lamor sa dimoun ki finn fer sa testaman la.

¹⁷Ofet enn testaman pena okenn lefe osi lontan ki dimoun konserne la ankor vivan. Li valid selman apre so lamor.

¹⁸Akoz samem premie lalians pa finn rant anviger san ki disan verse.

¹⁹Apre ki Moiz ti prezant lepep tou bann komannman dapre lalwa, li ti pran disan ti toro ek bouk, avek delo e li ti servi enn fey lizop ek enn bout lalenn rouz pou fann sa lor liv lalwa ek lor tou dimoun.

²⁰Li dir, “Samem disan lalians ki Bondie finn komann zot pou respekte”.

²¹E dan samem fason avek sa disan la, li ti aroz latant ek tou bann resipian ki servi pou lapriyer.

²²Dapre lalwa preske tou kitsoz bizin pirifie avek disan e bann pese pa pou pardone si disan pa verse.

²³Si bann kopi kitsoz dan lesiel bizin pirifie par sa bann rit la, alor bann realite lesiel merit meyer sakrifis ki sa.

²⁴Kris pa finn rant dan enn sanktyer ki finn konstrir par bann imin, ki nek enn kopi, me li finn rant dan lesiel mem, pouki asterlamem li prezant li devan Bondie dan nou faver.

²⁵Kris pena pou ofer li plizir fwa parey kouma gran pret ki rant dan sanktyer lane apre lane avek disan ki pa pou li;

²⁶sinon li ti pou bizin soufer ankor ek ankor depi fondasion lemonn. Me la kouma li ete, li finn paret enn fwa pourtou ziska lafin pou efas pese par sakrifis so prop lekor.

²⁷Parey kouma tou dimoun pou bizin mor enn sel fwa, apre sa Bondie pou ziz zot.

²⁸Alor Kris, ki finn ofer limem enn sel fwa pou efas pese enn kantite dimoun, li pou paret enn deziem fwa, non pa pou efas pese, me pou sov bann ki pe vremem atann so retour.