Read Morisien 1 Pi 1 Bible Online

1 Pi 1 - Morisien bible

1 Pi 1

¹Mwa, Pier, enn apot Zezi Kris, mo pe ekrir zot, pep ki Bondie finn swazir e ki pe viv anexil inpe partou dan Pon, Galasi, Kapados, Lazi ek Bitini.

²Dapre so plan, Bondie Papa finn swazir zot, e zot finn vinn enn pep sanktifie par so Lespri, pou obeir Zezi Kris ki finn pirifie zot par so disan. Ki lagras ek lape ranpli zot tou.

³Ki Bondie, Papa nou Segner Zezi Kris, li beni; parski dan so gran mizerikord, li finn donn nou enn nouvo lavi ler li resisit Zezi depi bann mor, e li donn nou enn lesperans vivan;

⁴enn leritaz ki finn rezerve pou zot dan lesiel, ki pa pou disparet, ni gate oubien fletri.

⁵Ki pwisans Bondie gard zot dan lafwa, pouki zot fer lexperyans delivrans ki pou revel li dan lafin letan.

⁶Sa bizin rann zot zwaye, mem si asterla, pou enn tigit letan, zot bizin pas par toutsort kalite difikilte.

⁷Zot lafwa, li pli presie ki lor. Li pou pas dan leprev kouma lor ki fonn kan li pas dan dife pou prouv so vre valer. Lerla zot pou kapav dekouver lalouanz, laglwar ek loner kan Zezi Kris pou revel li.

⁸Mem si zot pa finn trouv li, zot kontan li; e mem si zot pa trouv li asterla, zot krwar dan li e zot rezwir dan enn lazwa extraordiner ki pa kapav exprime,

⁹parski zot pe rekolte fri zot lafwa; delivrans zot lam.

¹⁰Bann profet finn fer resers lor sa delivrans la, e zot finn profetiz lor size lagras ki finn rezerve pou zot.

¹¹Zot finn fer zefor pou dekouver ki lepok e dan ki sirkonstans ki Lespri Kris ki dan zot, ti predir soufrans ki Kris ti pou soufer ek laglwar ki ti pou swiv apre.

¹²Bondie ti revel ar bann profet ki zot pa ti pe servi zot prop lintere, me ti pou zot ki li ti transmet sa mesaz ki ti finn deza anonse par pwisans Lespri Sin depi dan lesiel. Mem bann anz ti anvi konn sa mesaz la.

¹³Akoz samem zot bizin pare pou azir ar enn lespri eveye; met tou zot lesperans dan lagras ki Zezi Kris pou donn zot kan li pou revel li.

¹⁴Parey kouma bann zanfan, zot bizin obeir Bondie e pa sviw zot bann move dezir ki zot ti ena lontan kan zot ti dan lignorans.

¹⁵Okontrer, parey kouma Bondie ki finn apel zot, li sin, zot osi zot bizin vinn sin dan zot konportman.

¹⁶Lekritir dir, “Zot bizin sin parski mo sin.”

¹⁷Si zot priye Bondie kouma Papa ki ziz tou dimoun parey dapre so aksion, zot bizin ena respe pou li letan ki zot lor later.

¹⁸Zot kone, li pa pou nanye ditou ki zot finn sove dan zot move manier viv, ki zot finn erite ar zot anset. Pa larzan ou lor ki ti sov zot,

¹⁹me par disan presie Zezi Kris, parey kouma enn annyo ki pena okenn defo.

²⁰Bondie finn swazir li davans, avan mem kreasion lemonn e li finn revel li dan sa dernie letan la pou zot prop bien.

²¹Par li, zot krwar dan Bondie ki finn resisit li parmi bann mor e finn donn li laglwar pouki zot lafwa ek zot lesperans repoz dan Bondie.

²²Aster ki zot finn pirifie zot lam par obeisans ki zot ena pou laverite, pratik enn lamour sinser. Kontan touzour zot kamarad ar enn leker kler.

²³Avredir, zot finn ena enn nouvo lavi, ki pa sorti dan bann paran mortel me dan enn semans ki pa lamor ek koripsion parski li sorti dan parol Bondie ki vivan e eternel.

²⁴Parski finn ekrir: “Tou dimoun, zot kouma lerb e zot laglwar parey kouma bann fler dan karo; lerb sek e so fler tonbe,

²⁵me parol Bondie li la pou touzour. Sa Parol la, samem Bonn Nouvel ki finn anons zot.”