Read Morisien 2 Pi 1 Bible Online

2 Pi 1 - Morisien bible

2 Pi 1

¹Mwa Simon Pier, serviter ek apot Zezi Kris. Mo pe adres zot, bann dimoun ki finn resevwar don presie lafwa kouma nou, atraver lazistis Bondie e nou Sover Zezi Kris:

²Ki zot konesans Bondie ek nou Segner Zezi grandi, ki zot resevwar lagras ek lape anabondans.

³Pwisans Bondie finn donn nou tou seki nou bizin pou viv enn lavi sin; li fer nou konn sa kikenn ki finn apel nou par so laglwar ek lafors so laksion.

⁴Koumsamem ki li donn nou sa bann don presie ki li finn promet, pouki atraver sa, zot pou evit tom dan piez move dezir e zot pou kapav partisip dan so natir divinn.

⁵Pou sa rezon la, zot bizin fer tou zefor posib pou ki avek zot lafwa zot azout enn bon konportman, e avek zot bon konportman vre konesans Bondie.

⁶Avek konesans azout kontrol lor zotmem, avek kontrol lor zotmem azout landirans, avek landirans azout latasman ar Bondie,

⁷avek latasman ar Bondie azout lafeksion ki zot ena ant zot, avek lafeksion ki zot ena ant zot azout lamour.

⁸Sa bann kalite la, si zot ena li anabondans, pou fer zot vinn aktif e progrese dan konesans nou Segner Zezi Kris.

⁹Me dimoun ki pena sa bann kalite la, li pa trouv lwin e li parey kouma dimoun aveg ki finn bliye ki tou so bann pese avan finn lave.

¹⁰Alor mo bann frer ek ser, double zot zefor pou montre vremem ki Bondie finn swazir ek apel zot; ler zot fer sa, zame zot pa pou tom dan lemal.

¹¹Dan sa fason la, zot pou gagn enn gran privilez pou rant dan rwayom eternel Zezi Kris nou Segner ek Sover.

¹²Akoz samem mo panse li normal ki mo kontigne rapel zot sa bann kitsoz la, mem si zot deza konn li e ki zot bien atase ek laverite ki zot ena asterla.

¹³Me mo krwar ki li normal ki mo revey zot memwar letan ki mo ankor vivan.

¹⁴Mo kone ki mo pou mor biento, parski Lesegner Zezi Kris finn fer mwa enn revelasion lor la.

¹⁵Mo pou fer tou mo posib pouki, zot kapav rapel tou sa lansegnman la apre mo depar.

¹⁶Ofet, nou pa finn aranz enn zistwar baze lor bann kontdefe pou fer zot konn pouvwar Zezi Kris ek so retour, me noumem, nou finn trouv so grander ek nou prop lizie.

¹⁷Parski Li finn resevwar loner ek laglwar Bondie nou Papa kan ti ena enn lavwa depi laglwar siprem Bondie, ki ti dir: “Samem mo garson, mo bieneme, dan ki mo met tou mo lazwa.”

¹⁸Noumem, nou finn tann sa lavwa sorti dan lesiel, letan nou ti avek li lor montagn sakre.

¹⁹Alor nou kapav ena plis konfians dan mesaz sorti kot bann profet. Li dan zot lavantaz pou fer bien atansion parski li parey enn lalanp ki briye dan marenwar ziska lizour kan zetwal gramatin leve pou ekler zot leker.

²⁰Avan tou, zot bizin konpran ki personn pa kapav par limem interpret bann profesi Lekritir,

²¹parski okenn profesi pa finn vini par volonte imin, me plito bann dimoun anba linflians Lespri Sin ki finn proklam mesaz Bondie.