Read Morisien 2 Pi 3 Bible Online

2 Pi 3 - Morisien bible

2 Pi 3

¹Mo bann frer ek ser, sa fer deziem let ki mo ekrir zot. Dan toulede, mo finn sey rapel zot bann souvenir pou stimil zot lespri avek bon panse.

²Zot bizin rapel bann parol ki bann sin profet ti dir, e komannman ki Lesegner ek Sover ti koze atraver bann apot.

³Premie dabor, zot bizin konpran ki dan bann dernie zour, sertin dimoun lespri traver pou mok zot,

⁴zot pou dir, “Kot li ete saki ti promet pou revini? Depi ki nou anset finn mor tou finn res parey kouma depi komansman kreasion!”

⁵Zot bliye ki bien lontan Bondie finn kre lesiel ek later par so parol. Later li finn fer li apartir dilo e avek dilo;

⁶e li osi par dilo linondasion, ki sa vie lemonn la finn detrir.

⁷Me, sa mem parol la finn rezerv lesiel ek later zordi pou dife. Zot finn bien prezerve pou zour zizman ek destriksion bann peser.

⁸Me, mo bann bieneme, fode pa ki zot bliye ki pou Lesegner, enn zour li parey kouma mil an, e mil an li parey kouma enn sel zour.

⁹Lesegner, li pa tarde pou realiz so promes, parey kouma sertin dimoun panse, me li pasian avek zot, parski li pa anvi ki enn parmi zot tonbe, me ki zot tou repanti.

¹⁰Zour Lesegner pou vini kouma enn voler dan lanwit; lerla lesiel pou disparet avek enn gran fraka e tou bann zetwal anflam pou dezintegre, e later ek tou saki lor li pou disparet.

¹¹Si tou kiksoz pou bizin disparet dan sa fason la, alor ki kalite dimoun nou bizin ete? Zot bizin ena enn lavi sin e respektab devan Bondie.

¹²Letan ki zot pe atann zour Lesegner, zot bizin fer tou zefor pouki li vinn pli vit. Sa zour la, lesiel pou pran dife e disparet e bann zetwal pou fonn ar saler.

¹³Me, dapre promes Bondie, nou atann enn nouvo lesiel ek enn nouvo later kot pou ena lazistis.

¹⁴Akoz samem, mo bann bieneme, letan ki zot pe atann sa zour la, fer tou seki zot kapav pouki zot res san tas, san okenn pese e ki li trouv zot pe viv anpe avek li.

¹⁵Zot bizin konsider pasians nou Segner kouma enn lokazion pou nou akeyir delivrans Bondie, parey kouma nou frer Pol finn ekrir avek lasazes ki Bondie finn donn li.

¹⁶Samem ki li dir nou dan tou so bann let. Ena sertin pasaz ki difisil pou konpran, ki bann ignoran oubien bann ki latet fatige pou deform so sans, kouma zot fer avek lezot pasaz dan Lekritir sin. Sa pou amenn zot destriksion.

¹⁷Me zot, mo bann bieneme, zot deza averti. Fer atansion, pa les zot antrene par lerer bann move dimoun ki rod destabiliz zot.

¹⁸Kontigne progrese dan lagras ek konesans nou Segner ek Sover Zezi Kris. Laglwar pou li azordi ek dan leternite. Amenn.