Read Morisien 1 Zn 2 Bible Online

1 Zn 2 - Morisien bible

1 Zn 2

¹Mo bann ti zanfan, mo pe ekrir zot tousala pouki zot pa fer pese. Me si kikenn fer pese nou ena enn avoka kot Bondie Papa: Zezi Kris ki zis.

²Li finn ofer limem kouma sakrifis pou nou pese, pa zis pou nou tousel me osi pou pese lemonn antie.

³Si nou gard so komannman, lerla nou sir ki nou konn li.

⁴Dimoun ki dir, “Mo konn li,” me pa gard so komannman, li enn manter e pena laverite dan li.

⁵Me dimoun ki gard so parol, lamour Bondie pou vremem parfe dan li. Koumsamem nou kone ki nou vremem ini avek li.

⁶Dimoun ki dir li ini avek li, bizin mars parey kouma li.

⁷Mo bann frer ek ser bieneme, mo pa pe ekrir zot enn nouvo komannman, me enn vie komannman ki zot ti deza resevwar depi komansman. Sa vie komannman la, limem parol ki zot finn deza tande.

⁸Ankor enn fwa, mo pe ekrir zot enn nouvo komannman ki trouv so laverite dan Lekris ek dan zot osi. Vremem, teneb pe disparet e vre lalimier pe briye.

⁹Dimoun ki dir, “Mo dan lalimier,” apre li air so frer ek so ser, li ankor dan teneb.

¹⁰Dimoun ki kontan so frer ek so ser, li pe viv dan lalimier, e pena nanye dan li ki kapav fer li ek lezot tom dan pese.

¹¹Me dimoun ki air so frer e so ser, li dan teneb, li mars dan teneb, e li pa kone kot li pe ale, parski teneb finn fer li vinn aveg.

¹²Mo bann zanfan, mo pe ekrir zot parski zot pese finn pardone akoz nom Zezi Kris.

¹³Mo pe ekrir zot, gran dimoun, parski zot konn Sa Enn ki existe depi komansman. Mo pe ekrir zot, bann zenes, parski zot finn vink lemal.

¹⁴Bann zanfan, mo pe ekrir zot, parski zot konn Bondie Papa. Bann gran dimoun, mo pe ekrir zot parski zot konn Sa Enn ki existe depi komansman. Bann zenes, mo pe ekrir zot parski zot for, parol Bondie li abit dan zot, e zot finn vink lemal.

¹⁵Pa bizin zot kontan lemonn, ni bann kiksoz materyel lemonn. Dimoun ki kontan lemonn, li pena lamour Bondie Papa dan li.

¹⁶Tou seki sorti dan lemonn, kouma move dezir natir imin, lanvi posed seki nou trouve, ek lorgey baze lor larises, pa vinn depi Bondie Papa me depi lemonn.

¹⁷Lemonn avek so bann dezir pe al fini, me bann ki fer volonte Bondie pou viv pou touzour.

¹⁸Mo bann zanfan, lafin pe aprose. Zot finn tande ki antikris pe vini, asterlamem ena boukou lennmi Lekris ki finn fini vini. Koumsamem nou kone ki lafin li pre.

¹⁹Sa bann zans la finn sorti kot nou me zot pa ti vremem ar nou, lakoz samem zot inn kit nou; parski si zot ti ar nou, zot ti pou res avek nou, me zot finn fer li kler ki personn parmi zot pa ar nou.

²⁰Me zot, zot finn resevwar lonksion sorti kot Sa Enn ki Sin e zot ena konesans laverite.

²¹Mo pe ekrir zot, pa parski zot pa konn laverite, me parski zot bien konn li e zot kone osi ki okenn mansonz pa kapav sorti depi laverite.

²²Kisannla ki manter? Pa sa dimoun ki rezet Zezi kouma Lekris? Limem lennmi Lekris, li rezet toulede, Bondie Papa ek so Garson.

²³Kikenn ki rezet Bondie Garson li pena Bondie Papa dan li. Tou dimoun ki aksepte Bondie Garson li ena osi Bondie Papa.

²⁴Gard bien mesaz ki zot finn tande depi komansman. Si zot gard sa mesaz la, lerla zot pou res ini avek Bondie Garson ek so Papa osi.

²⁵Samem ki li finn promet nou: lavi eternel.

²⁶Mo pe ekrir sa lor size bann dimoun pe rod tronp zot.

²⁷Me zot, sa lonksion ki Lekris finn vers lor zot la, li kontign res ar zot. Kouma zot ena so Lespri dan zot, zot pa bizin enn lot dimoun pou ansegn zot. Anfet, Lespri ansegn zot lor tou kiksoz e tou seki li ansegn zot li vre, li pa fos. Samem zot bizin obeir lansegnman sorti kot Lespri: res touzour ini avek Lekris.

²⁸Asterla mo bann zanfan, res ini avek li, pouki ler li revel li, nou kapav ranpli ar lasirans, e nou pa onte devan li zour ki li vini.

²⁹Si zot kone ki Lekris zis, alor zot osi rekonet ki tou dimoun ki fer seki zis, li enn zanfan Bondie.