Read Morisien 1 Zn 3 Bible Online

1 Zn 3 - Morisien bible

1 Zn 3

¹Zot trouve ki kantite Bondie Papa kontan nou. So lamour li telman gran pou nou ki li apel nou zanfan Bondie; e vremem, samem ki nou ete. Ala kifer lemonn pa konn nou, parski li pa finn konn Bondie.

²Mo bann kamarad, nou deza bann zanfan Bondie, me li pa kler kouma nou pou ete apre. Me nou kone kan li pou vini nou pou resanble li, parski nou pou trouv li parey kouma li ete.

³Dimoun ki ena sa kalite lesperans dan Kris, pou rann limem pir parey kouma li.

⁴Dimoun ki fer pese, li kas lalwa Bondie; pese vedir dezobeir lalwa Bondie.

⁵Zot kone ki Lekris finn vini pou efas nou bann pese, e limem, li pena okenn pese dan li.

⁶Seki viv ini avek Kris, pa kontign fer pese; seki fer pese, pa finn trouv li, ni finn konn li.

⁷Mo bann ti zanfan, pa les personn anbet zot! Tou seki azir avek zistis, li zis parey kouma Kris ki zis.

⁸Seki fer pese, li sorti kot diab. Depi komansman diab dan pese, me Garson Bondie finn vini pou detrir travay diab.

⁹Enn zanfan Bondie pa kapav kontign fer pese, parski pwisans Bondie ki met lavi dan li. Li pa kapav kontign fer pese parski li finn pran nesans kot Bondie.

¹⁰Ala kouma nou rekonet enn zanfan Bondie ek zanfan diab: seki pa pratik lazistis, li pa sorti kot Bondie, parey kouma seki pa kontan so frer e so ser.

¹¹Samem mesaz ki zot finn tande depi komansman: ki nou bizin kontan nou prosin.

¹²Fode pa ki nou fer kouma Kain, ki ti ena diab dan li e li ti touy so frer. Kifer li finn touy li? Parski bann aksion Kain ti move e seki pou so frer ti zis.

¹³Mo bann frer, mo bann ser, pa bizin etone si lemonn air zot.

¹⁴Nou kone ki nou finn pas dan lamor pou rant dan lavi, parski nou kontan nou bann frer, nou bann ser. Dimoun ki pa kontan so prosin, li ankor prizonie pwisans lamor.

¹⁵Seki air so frer ou so ser, li enn kriminel, e zot kone ki okenn kriminel pena lavi eternel dan li.

¹⁶Ala kouma nou kone ki vedir lamour: Zezi Kris finn donn so lavi pou nou. Nou osi nou bizin donn nou lavi pou nou bann frer ek ser.

¹⁷Si kikenn ena tou seki li bizin pou viv bien e li ferm so leker ar enn lot ki pena nanye, kouma li kapav dir ki li kontan Bondie?

¹⁸Mo bann zanfan, fode pa nou kontan zis avek zoli parol ek bel-bel diskour, me montre vre lamour par nou bann aksion.

¹⁹Par sa nou kone ki nou dan laverite e nou leker kler devan Bondie.

²⁰Si nou leker kondann nou, nou kone ki Bondie pli gran ki nou leker e li konn tou kiksoz.

²¹Mo bann kamarad, si nou leker pa kondann nou, nou kapav apros Bondie avek lasirans

²²e resevwar tou saki nou dimande, parski nou obeir so komannman e fer so volonte.

²³Ala so komannman, ki nou bizin krwar dan nom so garson Zezi Kris e kontan nou prosin, parey kouma li finn komann nou.

²⁴Dimoun ki obeir komannman Bondie li res ini avek Bondie e Bondie pou prezan dan li. Ala kouma nou kone ki Bondie viv dan nou, par so Lespri ki li finn donn nou.