Read Morisien 1 Zn 5 Bible Online

1 Zn 5 - Morisien bible

1 Zn 5

¹Tou dimoun ki krwar ki Zezi limem Lekris, li enn zanfan Bondie; e tou dimoun ki kontan enn papa li osi kontan zanfan papa la.

²Ala kouma nou kone ki nou kontan bann zanfan Bondie: kan nou kontan Bondie e nou obeir so bann komannman.

³Kan nou kontan Bondie, nou obeir so komannman. So komannman pa difisil pou swiv,

⁴parski tou zanfan Bondie ena laviktwar lor lemonn. Nou lafwa donn nou mwayin pou gagn laviktwar lor lemonn.

⁵Kisannla ki gagn laviktwar lor lemonn? Zis dimoun ki krwar ki Zezi li Garson Bondie.

⁶Zezi Kris, limem ki finn vini avek dilo so batem ek disan so lamor. Li pa finn vinn avek zis dilo, me avek dilo ek disan; e Lespri li rann temwagnaz ki sa vre, parski Lespri limem laverite.

⁷Ena trwa temwin:

⁸Lespri, dilo ek disan, e touletrwa dakor.

⁹Si nou aksepte temwagnaz bann zom, temwagnaz Bondie ena plis pwa; parski samem temwagnaz ki li finn fer lor so Garson.

¹⁰Dimoun ki krwar dan Garson Bondie, li ena sa temwagnaz la dan so leker. Dimoun ki pa krwar dan Bondie, li finn fer li pas pou enn manter, parski li pa finn krwar temwagnaz ki Bondie finn done lor so Garson.

¹¹Ala temwagnaz la: Bondie finn donn nou lavi eternel, e sa lavi la li trouv dan so Garson.

¹²Dimoun ki ena Garson Bondie ena lavi la; dimoun ki pena Garson Bondie, pena lavi.

¹³Zot ki krwar dan nom Garson Bondie, mo pe ekrir tousala pou fer zot kone ki zot ena lavi eternel.

¹⁴Ala lasirans ki nou ena dan li: tou seki nou demande, li pou akord nou dapre so volonte.

¹⁵Si nou kone ki li ekout nou lapriyer, nou sir ki li pou donn nou seki nou demann li.

¹⁶Si kikenn trouv so frer oubien so ser pe komet enn pese ki pa mortel, li bizin priye e Bondie pou donn lavi sa dimoun la. Sa li aplik pou tou pese ki pa mortel. Ena pese ki mortel; mo pa pe dir zot priye pou sa.

¹⁷Tou bann move aksion apel pese, me ena pese ki pa mortel.

¹⁸Nou kone ki dimoun ki pran nesans kot Bondie, pa fer pese, parski Sa-Enn ki finn pran nesans kot Bondie la protez li, e Lemal pa kapav tous li.

¹⁹Nou kone ki nou zanfan Bondie, e lemonn antie li dan pouvwar Lemal.

²⁰E nou kone ki Garson Bondie finn vini, li finn donn nou lintelizans pouki nou konn vre Bondie. Nou res ini avek vre Bondie, ini avek so Garson Zezi Kris. Limem vre Bondie e lavi eternel.

²¹Mo bann ti zanfan, fer atansion bann fos bondie.