Read Morisien 2 Zn 1 Bible Online

2 Zn 1 - Morisien bible

2 Zn 1

¹Mwa, Ansien, mo pe ekrir sa Madam ki Bondie finn swazire ek so bann zanfan, ki vremem mo kontan. Pa mo tousel ki kontan zot, me tou bann dimoun ki konn laverite,

²parski laverite res dan nou e pou res avek nou pou toultan.

³Ki Bondie Papa, ek Zezi Kris, so Garson, akord nou lagras, lamizerikord ek lape dan laverite ek lamour.

⁴Sa finn fer mwa enn gran lazwa pou trouv inpe parmi to bann zanfan pe mars dan laverite parey kouma Bondie Papa inn komann nou.

⁵Asterla Madam, mo pa pe ekrir twa enn nouvo komannman, me samem komannman ki nou finn gagne depi komansman. Mo dimann twa ki: “Sakenn kontan so kamarad.”

⁶Lamour vedir ki nou mars dapre komannman Bondie. Komannman ki zot finn tande depi komansman: mars dapre sime lamour.

⁷Boukou manter finn vinn dan lemonn, bann ki pa aksepte ki Zezi Kris inn vinn imin; sa bann dimoun la, zot enn bann manter, zot antikris.

⁸Zot bizin fer atansion pou zot pa perdi fri zot travay, me ki zot resevwar zot rekonpans plin-plin.

⁹Tou dimoun ki depas limit e pa gard lansegnman Kris, zot pena Bondie dan zot. Dimoun ki gard so lansegnman, zot ini avek Bondie Papa ek so Garson.

¹⁰Si kikenn vinn kot zot e li pa amenn sa lansegnman la, pa bizin zot akeyir li, ni resevwar li.

¹¹Seki akeyir enn dimoun koumsa, li pe partisip dan so bann move aksion.

¹²Mo pou ena ankor boukou kiksoz pou dir zot, me mo prefer pa servi papie ek lank. Mo espere vinn kot zot e koz avek zot fasafas, pouki nou lazwa li konplet.

¹³Zanfan to ser ki Bondie finn swazir, fer zot tou konpliman.