Read Morisien 3 Zn 1 Bible Online

3 Zn 1 - Morisien bible

3 Zn 1

¹Mwa Ansien, mo pe ekrir Gais ki mo vremem kontan.

²Kamarad, mo souete ki tou pas bien pou twa e ki lasante to lekor li osi bon ki lasante to lespri.

³Mo ti bien kontan kan enn bann frer ti vini, e ti rakont mwa to fidelite e kouma to pe mars dan laverite.

⁴Pena nanye ki fer mwa pli kontan ki tann dir ki mo bann zanfan pe mars dan laverite.

⁵Kamarad, to azir dapre to lafwa vizavi to bann frer ek ser, mem si zot bann etranze.

⁶Zot finn donn temwagnaz lor to lamour dan legliz. To pou azir bien si to ed zot dan zot vwayaz dan enn fason ki pou fer plezir Bondie;

⁷parski sa vwayaz la, zot finn fer sa lor so Nom e zot pa finn gagn okenn led avek bann non-krwayan.

⁸Alors, bann dimoun koumsa, nou bizin soutenir zot pouki nou kapav vinn bann kolaborater laverite.

⁹Mo finn ekrir enn ti mo legliz; me Diotref, ki kontan touzour met li anavan, pa finn aksepte nou lotorite.

¹⁰Ler mo pou vini, mo pou denons so move manier. Li pe malparl nou e fer enn bann palab lor nou. Limem li refiz akeyir bann frer e bann ser, li anpes bann lezot ki anvi akeyir zot e met zot deor dan legliz.

¹¹Kamarad, pa bizin imit saki mal me imit saki bien. Dimoun ki pratik lebien li avek Bondie; dimoun ki pratik lemal li pa konn Bondie.

¹²Tou dimoun ti rann bon temwagnaz lor Dimitris. Laverite osi ti rann temwagnaz dan so faver. Nou osi, nou rann temwagnaz dan so faver, e to kone ki sa temwagnaz la li vre.

¹³Mo ena boukou kiksoz ankor pou ekrir twa, me mo prefer pa fer li avek plim ek lank.

¹⁴Mo espere trouv twa biento e nou va koz ansam fasafas.

¹⁵Mo souet twa lape. To bann kamarad avoy twa zot soue. Fer salam bann kamarad laba enn par enn.