Read Morisien Zid 1 Bible Online

Zid 1 - Morisien bible

Zid 1

¹Zid, serviter Zezi Kris ek so frer Zak pe ekrir sa let la tou bann dimoun ki finn apele par Bondie e ki viv dan lamour Bondie Papa anba proteksion Zezi Kris.

²Ki zot resevwar boukou mizerikord, lape ek lamour.

³Mo bann kamarad, mo ti pe fer tou pou ekrir zot lor size ladelivrans ki nou ena ankomin, me mo finn trouv li neseser pou adres zot sa let la, pou ankouraz zot pou lite dan lafwa ki Bondie finn donn so pep sin.

⁴Ofet ena sertin dimoun malonet ki finn infiltre parmi zot. Zot finn abiz bonte Bondie pou zistifie zot aksion imoral e zot finn osi rezet Zezi Kris nou sel Met ek Segner. Depi lontan Lekritir finn anons sa kondanasion ki pe ariv zot la.

⁵Mem si zot konn tousala, mo anvi rapel zot kouma Lesegner finn sov so pep depi later Lezip enn fwa pou tou, me pli tar li ti detrir bann ki pa ti krwar.

⁶Zot rapel bann anz ki pa ti gard zot pozision, zot ti kit zot lakaz, e zot finn res toultan ansene dan prizon teneb ziska gran zour zizman Bondie.

⁷Zot rapel Sodom ek Gomor ek lezot lavil dan lezanviron; kot bann abitan ti pe amenn enn lavi dezord e zot ti pe swiv zot prop dezir imoral. Sa enn lexanp ki zot toultan anba pinision.

⁸Dan mem fason, sa bann dimoun ki fer vizion la, zot sali zot lekor, rezet lotorite ek insilte bann kreatir ki viv dan laglwar eternel Bondie.

⁹Mem larkanz Mikael, letan li ti pe lager avek diab pou gagn lekor Moiz, li pa ti oze kondann e insilte diab; me li ti zis kapav dir: “Ki Bondie pini twa!”

¹⁰Me sa bann dimoun la denigre seki zot pa konpran, e sa bann kiksoz ki zot kone par linstin, kouma bann zanimo sovaz, samem ki fini zot.

¹¹Maler lor zot parski zot finn swiv sime Kain. Lakoz larzan, zot finn egare kouma Balam e zot finn mor dan zot revolt kouma rebelion Kore.

¹²Zot prezans li enn skandal dan zot bann repa fraternel, kot zot fer lafet san okenn laont e zot nek okip zot mem. Zot parey bann niaz ki pena lapli e ki divan pe pouse. Zot parey bann zarb ki mem dan lotonn pa donn fri, enn fwa derasinn zot, zot mor pou toultan.

¹³Zot parey bann vag feros lamer, so lekim pe kras zot bann aksion laont. Zot parey bann zetwal ki Bondie finn rezerv enn plas pou touzour dan lanwit.

¹⁴Enok, setiem desandan Adam ti profetize, li dir: “Gete, Lesegner pe vini avek dis mil anz,

¹⁵pou exekit zizman lor tou dimoun, pou kondann zot pou zot move aksion ek bann zafer terib ki bann peser finn dir kont li.”

¹⁶Sa bann dimoun la, zot toultan plegne, zot pa kontan zot sor; zot swiv zot prop dezir; zot dir bann parol ranpli ar lorgey e zot flat dimoun par intere.

¹⁷Me zot, mo bann kamarad, rapel bien predikasion bann apot Zezi Kris nou Segner.

¹⁸Zot finn dir zot, “Dan bann dernie letan, pou ena bann dimoun ki pou mok zot e pou swiv zot move dezir”

¹⁹Sa mem bann dimoun ki fer divizion. Zot swiv zot linstin natirel, zot pena Lespri Sin.

²⁰Me zot, mo bann kamarad, zot bizin kontigne ed zot kamarad pou konstrir lor mesaz ki Bondie finn donn zot. Zot bizin priye avek led Lespri Sin;

²¹gard zot touzour dan lamour Bondie; atann nou Segner Zezi Kris ki pou donn zot lavi eternel.

²²Pran pitie pou bann ki ezite.

²³Sov zot, tir zot dan dife; pitie lezot me fer atansion, evit tou kontak avek mem zot linz tase par zot move dezir.

²⁴Pou Sa Enn ki anpes zot tonbe e fer zot tenir san okenn fot dan prezans so laglwar avek rezwisans,

²⁵pou sel Bondie ek Sover, atraver Zezi Kris nou Segner, laglwar, lamazeste, pwisans ek lotorite asterla e pou touzour. Amen.