Read Morisien Rev 10 Bible Online

Rev 10 - Morisien bible

Rev 10

¹E mo trouv enn anz bien pwisan sorti dan lesiel vini, anvlope dan niaz, avek enn larkansiel lor so latet; so figir kouma dife, so lipie kolonn dife.

²Li pe tini enn ti liv ouver dan so lame. Li poz so lipie drwat lor lamer ek so lipie gos lor later,

³li kriye bien for kouma enn lion. Letan li kriye, sa set loraz la ti fer tapaz.

⁴E ler sa set loraz ti fini fer tapaz, mo ti prepare pou al ekrir, me mo ti tann enn lavwa sorti depi lesiel ki ti dir, “Gard mesaz set loraz sekre, pa ekrir nanye.”

⁵Anz, ki mo ti trouv pe dibout lor lamer ek later la, lev so lame drwat anler ver lesiel

⁶e li fer enn serman lor nom Bondie vivan pou touzour, ki finn kre lesiel ek tou saki ladan, later ek tou saki ladan, ek lamer ek tou saki ladan: “Pa pou ena okenn retar ankor.

⁷Me ler setiem anz pou soufle so tronpet, mister Bondie pou akonpli kouma li ti anonse ar so bann serviter profet.”

⁸Apre, sa lavwa ki mo ti tande sorti dan lesiel la, ti koz ar mwa ankor, li ti dir, “Al pran sa liv ouver la, ki dan lame anz ki pe dibout lor lamer ek later.”

⁹Alor mo ti al kot anz la, mo ti dir li donn mwa ti liv la; lerla li ti dir mwa, “Pran li, manze; pou to lestoma li pou amer, me dan to labous li pou dou kouma dimiel.”

¹⁰Mo ti pran ti liv la dan lame anz e mo ti manz li; li ti dou kouma dimiel dan mo labous, me ler mo ti fini manz li, mo lestoma ti brile.

¹¹Lerla ti dir mwa, “To pou bizin profetiz ankor ar boukou bann lepep ek nasion, langaz ek lerwa.”