Read Morisien Rev 16 Bible Online

Rev 16 - Morisien bible

Rev 16

¹Apre sa mo tann enn lavwa for sorti depi dan tanp ki ti pe dir sa set anz la, “Al vers set koup lakoler Bondie lor later.”

²Premie anz ale e li vers so koup lor later. Lerla enn ilser malsin tom lor bann dimoun ki ti ena mark bebet ek ki ti ador so zimaz.

³Deziem anz ti vers so koup dan lamer e li ti vinn kouma disan dimoun mor e tou seki vivan dan lamer ti mor.

⁴Trwaziem anz ti vers so koup dan bann larivier ek lasours e zot ti vinn disan.

⁵Alor mo tann anz ki ena lotorite lor dilo dir, “Twa ki exis, e ki ti existe, twa ki zis, twa ki sin, To finn toultan azir ar lazistis.

⁶Parski zot finn vers disan lepep Bondie ek profet, to finn donn zot disan pou bwar. Samem ki zot merite!”

⁷Apre sa mo tann enn lavwa sorti kot lotel ki dir, “Wi, Segner Bondie Toupwisan, to bann zizman, zot vre ek zis.”

⁸Katriem anz vers so koup lor soley, e soley gagn permision pou bril dimoun par so saler dife.

⁹Dimoun ti pe brile par enn saler terib. Zot ti modi nom Bondie ki ena lotorite lor sa bann fleo la, e zot pa ti sanz zot konportman pou glorifie Bondie.

¹⁰Sinkiem anz ti vers so koup lor tronn bebet la, e marenwar ti anvayir so rwayom. Dan zot lagoni dimoun ti mord-mord zot lalang,

¹¹e akoz zot douler ek bann ple, zot ti modi Bondie lesiel. Me zot pa ti aret zot move aksion.

¹²Siziem anz ti vers so koup lor sa gran larivier ki apel Lefrat e larivier la ti sek pou prepar pasaz bann lerwa ki sorti kot soley leve.

¹³Lerla mo trouv trwa move lespri koumadir krapo sorti dan lagel dragon, dan lagel bebet la e dan labous fos profet.

¹⁴Sa ti bann lespri demon ki fer bann mirak. Zot al rod bann lerwa lemonn antie, pou rasanble zot pou lager kan gran zour Bondie Toupwisan arive.

¹⁵Rapel seki Kris ti dir, “Ala, mo pe vini parey enn voler! Ere sa dimoun ki res eveye, so linz pare pou li mete, pouki li pa mars touni, e gagn onte.”

¹⁶Zot rasanble zot dan enn landrwa ki apel Armagedon.

¹⁷Setiem anz vid so koup dan lezer e enn lavwa for sorti kot tronn ki dan tanp, li dir, “Tou finn fini!”

¹⁸Alor ti ena zekler, tapaz lavwa, loraz e enn gran tranblemandeter telman violan ki zame sa pa finn arive depi kreasion bann imin lor later.

¹⁹Sa gran lavil la ti divize an-trwa e bann lavil dan tou pei ti tom anrwinn. Bondie ti rapel Gran Babilonn e ti donn li bwar koup divin so lakoler.

²⁰Tou bann zil ti disparet e bann montagn ti fonn.

²¹Boul lagrel ki pez ziska san liv ti tom lor bann dimoun depi lesiel. Bann dimoun ti insilte Bondie akoz sa fleo lagrel la telman ki li ti redoutab.