Read Morisien Rev 19 Bible Online

Rev 19 - Morisien bible

Rev 19

¹Apre sa mo tann koumadir enn lavwa for, bann lafoul dan lesiel ki pe dir, “Alelouya! Laglwar ek pwisans pou nou Bondie, ki sov nou.

²So zizman vre ek zis, li finn ziz sa gran prostitie la, ki finn sali later avek so bann konportman imoral. Li finn vanz kont li akoz disan so bann serviter.”

³Ankor enn fwa li repete, “Alelouya! Lafime so dife pe monte pou touzour.”

⁴Sa vennkat ansien ek kat kreatir vivan tom azenou pou ador Bondie ki pe asiz lor tronn, zot dir; “Amen Alelouya!”

⁵Enn lavwa sorti depi tronn ki dir, “Loue nou Bondie, zot ki so bann serviter, gran kouma piti, ki respekte li.”

⁶Lerla mo tann enn lavwa koumadir enn gran lafoul dimoun, ondire tapaz vag lamer ek loraz, ki pe kriye, pe dir, “Alelouya! parski nou Segner Bondie Toupwisan, li regne.

⁷Anou rezwir, anou selebre, anou rann laglwar Bondie! parski maryaz Annyo finn arive, nouvel-marye finn fini prepar li.

⁸Pou so linz maryaz, zot finn donn li enn tisi fin an lin pir, ki briye.” (Ofet tisi lin reprezant bann aksion zis sorti kot pep Bondie ki sin.)

⁹Apre sa enn anz ti dir mwa, “Ekrir sa: Zot pou ere, bann ki invite dan maryaz Annyo.” Lerla li dir mwa, “Samem vre parol Bondie.”

¹⁰Alor mo tom azenou pou ador li, me li dir mwa, “To pa fer sa! Mo enn koleg serviter avek twa ek to bann kamarad, bann temwin fidel Zezi. Bondie ki to bizin adore parski temwagnaz Zezi samem lespri ki inspir bann profet.”

¹¹Lerla mo trouv lesiel ouver e enn seval blan paret. So kavalie ti apel Fidel ek Verite. Li drwat dan so zizman e li konbat avek lazistis.

¹²So lizie kouma laflam dife; lor so latet ti ena plizir kouronn. Lor li ti finn ekrir enn nom ki li tousel kone.

¹³Li ti met enn rob tranpe dan disan, e li ti apel “Parol Bondie.”

¹⁴E bann larme lesiel abiye an lin fin ek pir, kouler blan ti pe swiv li lor bann seval blan.

¹⁵Enn lepe transan sorti dan so labous e tap bann nasion. Li pou diriz zot avek enn baton lasie; li pou kraz rezin dan preswar kot divin lakoler Bondie Toupwisan pe bouyone.

¹⁶Lor so linz ek lor so lazam ena enn nom ki finn ekrir: “Lerwa bann lerwa, Segner bann segner.”

¹⁷Lerla mo trouv enn anz ki pe dibout dan soley, avek enn lavwa bien for, li pe kriy ar bann zwazo ki pe anvol dan lezer, li dir, “Vini, rasanble zot pou sa gran festin Bondie.

¹⁸Vini, vinn manz laser bann lerwa, laser bann zeneral, laser bann gran sef, laser seval ek kavalie, laser tou dimoun, seki lib ek esklav, tipti kouma gran.”

¹⁹Lerla mo trouv bebet la ek lerwa later avek so bann larme finn rasanble pou lager kont kavalie ek so larme.

²⁰Alor zot finn trap bebet la anmemtan ki sa fos profet ki ti fer bann mirak dan so prezans; ki ti sedwir tou bann ki ti ena mark bebet e ti ador so zimaz. Ti zet bebet la ek fos profet dan enn landrwa ranpli ar dife ki brile kouma souf.

²¹Lezot ti mor avek lepe ki ti sorti dan labous kavalie ki ti lor seval. Tou bann zwazo ti manz zot laser, ziska zot rasazie.