Read Moroccan Standard Translation مَتَّى 15 Bible Online

مَتَّى 15 - Moroccan Standard Translation bible

مَتَّى 15

¹الْفَصْلْ خْمْسْطَاشْ وْمْنْ بَعْدْ، جَاوْ لْعَنْدْ يَسُوعْ شِي وْحْدِينْ مْنْ الْفْرِّيسِيِّينْ وْالْعُلَمَا دْ الشّْرَعْ مْنْ أُورْشَلِيمْ، وْهُمَ يْسْوّْلُوهْ:

²«عْلَاشْ تْلَامْدْكْ مَا كَيْتْبْعُوشْ الْعَادَة دْيَالْ الشّْيُوخْ؟ حِيتْ مَا كَيْغَسْلُوشْ يْدِّيهُمْ قْبَلْ مَا يَاكْلُو».

³وَلَكِنْ هُوَ جَاوْبْهُمْ وْݣَالْ: «وْعْلَاشْ حْتَّى نْتُمَ كَتْعْصَاوْ الْوْصِيَّة دْ اللَّهْ بَاشْ تّْبْعُو الْعَادَة دْيَالْكُمْ؟

⁴حِيتْ اللَّهْ كَيْݣُولْ: تّْهَلَّى فْبَّاكْ وْمُّكْ، وْاللِّي سْبّْ بَّاهْ وْلَا مُّه خَاصُّه يْتّْقْتَلْ.

⁵وَلَكِنْ نْتُمَ كَتْݣُولُو: اللِّي ݣَالْ لْبَّاهْ وْلَا مُّه: دَاكْشِّي اللِّي خَاصّْنِي نْعَاوْنْكُمْ بِيهْ رَاهْ عْطِيتُه هْدِيَّة لْلَّهْ،

⁶مَا بْقَاشْ وَاجْبْ عْلِيهْ يْتّْهَلَّى فْبَّاهْ. وْهَكَّا لْغِيتُو كْلَامْ اللَّهْ بَاشْ تّْبْعُو الْعَادَة دْيَالْكُمْ.

⁷آ الْمُنَافِقِينْ! رَاهْ إِشْعِيَا كَانْ عَنْدُه الْحَقّْ مْلِّي تّْنَبّْأْ عْلِيكُمْ وْݣَالْ:

⁸نَاسْ هَادْ الشَّعْبْ كَيْحَمْدُونِي غِيرْ بْفُمّْهُمْ، وَلَكِنْ قَلْبْهُمْ بْعِيدْ عْلِيَّ.

⁹وْبْلَا فَايْدَة كَيْعَبْدُونِي، حِيتْ كَيْعَلّْمُو التَّعَالِيمْ اللِّي هِيَ غِيرْ وْصِيَّاتْ دْ النَّاسْ».

¹⁰وْعَيّْطْ عْلَى الجّْمَاعَة دْ النَّاسْ وْݣَالْ لِيهُمْ: «سْمْعُو وْفْهْمُو:

¹¹مَاشِي دَاكْشِّي اللِّي كَيْدْخَلْ لْلْفُمّْ هُوَ اللِّي كَيْنَجّْسْ بْنَادْمْ، وَلَكِنْ دَاكْشِّي اللِّي كَيْخْرُجْ مْنْ الْفُمّْ هُوَ اللِّي كَيْنَجّْسُه».

¹²وْمْنْ بَعْدْ جَاوْ عَنْدُه التّْلَامْدْ وْݣَالُو لِيهْ: «وَاشْ عْرَفْتِي بْلِّي الْفْرِّيسِيِّينْ تْقَلّْقُو مْلِّي سْمْعُو كْلَامْكْ؟».

¹³وْجَاوْبْهُمْ وْݣَالْ: «ݣَاعْ الْغَرْسْ اللِّي مَا غَرْسُوشْ بَّا اللِّي فْالسّْمَا غَيْتّْݣَلَّعْ.

¹⁴خَلِّيوْهُمْ! هَادُوكْ رَاهُمْ عَمْيِينْ كَيْݣَوّْدُو عَمْيِينْ وْإِلَا كَانْ الْعْمَى كَيْݣَوّْدْ الْعْمَى، رَاهُمْ غَادِي يْطِيحُو بْجُوجْ فْحَفْرَة».

¹⁵وْݣَالْ لِيهْ بُطْرُسْ: «بَيّْنْ لِينَا الْمَعْنَى دْيَالْ هَادْ الْمْتَالْ!».

¹⁶وْهُوَ يْرَدّْ عْلِيهْ: «وَاشْ حْتَّى نْتُمَ مَازَالْ ݣَاعْ مَا فْهَمْتُو؟

¹⁷وَاشْ مَا كَتْعَرْفُوشْ بْلِّي ݣَاعْ الْحَاجَة اللِّي كَتْدْخُلْ لْفُمّْ بْنَادْمْ كَتْمْشِي لْكَرْشُه، وْمْنْ تْمَّ كَتْخْرَجْ لْبَرَّا؟

¹⁸أَمَّا دَاكْشِّي اللِّي كَيْخْرُجْ مْنْ الْفُمّْ، رَاهْ كَيْخْرُجْ مْنْ الْقَلْبْ وْهُوَ اللِّي كَيْنَجّْسْ بْنَادْمْ.

¹⁹عْلَاحْقَّاشْ مْنْ الْقَلْبْ كَتْخْرَجْ الْأَفْكَارْ الْخَايْبَة: بْحَالْ الْقْتِيلَة، وْالْفْسَادْ دْيَالْ الْمْزَوّْجِينْ وْدْيَالْ اللِّي مَا مْزَوّْجِينْشْ، وْالسّْرْقَة، وْشْهَادَةْ الزُّورْ، وْالسّْبَّانْ.

²⁰وْهَادْشِّي هُوَ اللِّي كَيْنَجّْسْ بْنَادْمْ، وَلَكِنْ الْمَاكْلَة بْيْدِّينْ مَا مْغْسُولِينْشْ مَا كَتْنَجّْسْشْ بْنَادْمْ».

²¹وْخْرَجْ يَسُوعْ مْنْ تْمَّ وْمْشَى لْجْوَايْهْ صُورْ وْصَيْدَا.

²²وْهِيَ تْجِي عَنْدُه وَاحْدْ الْمْرَاة كَنْعَانِيَّة مْنْ هَادُوكْ الجّْوَايْهْ، وْغَوّْتَاتْ وْݣَالْتْ: «رْحَمْنِي آ سِيدِي آ بْنْ دَاوُدْ! رَاهْ بَنْتِي سَاكْنْهَا جْنّْ كَيْعَدّْبْهَا بْزَّافْ».

²³وَلَكِنْ مَا جَاوْبْهَا حْتَّى بْكْلْمَة. وْقَرّْبُو لِيهْ تْلَامْدُه وْطْلْبُوهْ وْݣَالُو: «صِيفْطْهَا بْحَالْهَا، عْلَاحْقَّاشْ تَابْعَانَا وْكَتْغَوّْتْ!».

²⁴وْجَاوْبْهُمْ يَسُوعْ وْݣَالْ: «مَا صِيفْطْنِي اللَّهْ غِيرْ لْلْخَرْفَانْ الْمُّوضّْرِينْ دْيَالْ شَعْبْ إِسْرَائِيلْ».

²⁵وَلَكِنْ جَاتْ دِيكْ الْمْرَاة وْسْجْدَاتْ لِيهْ وْݣَالْتْ: «عَاوْنِّي آ سِيدِي!»

²⁶وْجَاوْبْهَا وْݣَالْ: «مَاشِي مْعْقُولْ يْتّْخَادْ خُبْزْ الْوْلَادْ وْيْتّْرْمَى لْلْكْلَابْ»

²⁷وْݣَالْتْ لِيهْ الْمْرَاة: «إِيِّهْ آ سِيدِي! وَلَكِنْ رَاهْ حْتَّى الْكْلَابْ كَيَاكْلُو مْنْ الْفْرَاتْتْ اللِّي كَيْطِيحُو مْنْ الْمْيَادِي دْيَالْ مَّالِيهُمْ».

²⁸وْجَاوْبْهَا يَسُوعْ وْݣَالْ: «إِيمَانْكْ كْبِيرْ آ هَادْ الْمْرَاة! غَادِي يْكُونْ لِيكْ دَاكْشِّي اللِّي بْغِيتِي». وْدِيكْ السَّاعَة تّْشَافَاتْ لِيهَا بَنْتْهَا.

²⁹وْمْنْ بَعْدْ، مْشَى يَسُوعْ مْنْ تْمَّ لْجَنْبْ الْبْحَرْ دْيَالْ الْجَلِيلْ، وْطْلَعْ لْلجّْبَلْ وْݣْلَسْ تْمَّ.

³⁰وْجَاوْ لْعَنْدُه جْمَاعَاتْ كْتَارْ دْ النَّاسْ وْمْعَاهُمْ عْرْجِينْ وْعَمْيِينْ وْزْحَّافَا وْزْيَازْنْ وْنَاسْ خْرِينْ كْتَارْ، وْحَطُّوهُمْ عَنْدْ رْجْلِيهْ وْشْفَاهُمْ.

³¹وْتّْعَجّْبُو الجّْمَاعَاتْ دْ النَّاسْ حِيتْ شَافُو الزّْيَازْنْ كَيْتّْكَلّْمُو، وْالْعَرْجِينْ كَيْتّْشَافَاوْ، وْالزّْحَافَا كَيْمْشِيوْ، وْالْعَمْيِينْ كَيْشُوفُو، وْعْطَاوْ الْعَزّْ لْإِلَاهْ إِسْرَائِيلْ.

³²وْعَيّْطْ يَسُوعْ عْلَى تْلَامْدُه وْݣَالْ لِيهُمْ: «بْقَاوْ فِيَّ هَادْ النَّاسْ، عْلَاحْقَّاشْ تْلْتْ يَّامْ هَادِي وْهُمَ مْعَايَ، وْمَا عَنْدْهُمْ مَا يَاكْلُو. وْمَا بْغِيتْشْ نْصِيفْطْهُمْ جِيعَانِينْ بَاشْ مَا يْسَخْفُوشْ فْالطّْرِيقْ».

³³وْهُمَ يْݣُولُو لِيهْ تْلَامْدُه: «مْنِينْ غَادِي نْجِيبُو فْهَادْ الْخْلَا الْخُبْزْ اللِّي يْشَبّْعْ جْمَاعَة كْبِيرَة بْحَالْ هَادِي؟»،

³⁴وْݣَالْ لِيهُمْ يَسُوعْ: «شْحَالْ مْنْ خُبْزَة عَنْدْكُمْ؟»، وْجَاوْبُوهْ: «سْبْعَة دْ الْخُبْزَاتْ وْشِي حُوتَاتْ صْغَارْ».

³⁵وْآمْرْ يَسُوعْ الجّْمَاعَة دْ النَّاسْ بَاشْ يْݣَلْسُو لْلْأَرْضْ،

³⁶وْخْدَا هَادُوكْ سْبْعَة دْ الْخُبْزَاتْ وْالْحُوتَاتْ، وْشْكَرْ اللَّهْ وْقَطّْعْهُمْ وْعْطَى لْتْلَامْدُه، وْتْلَامْدُه عْطَاوْ لْلجّْمَاعَاتْ دْ النَّاسْ.

³⁷وْكْلَاوْ كُلّْهُمْ حْتَّى شْبْعُو، وْهْزُّو سْبْعَة دْ الْݣُفَّاتْ عَامْرِينْ بْالطّْرُوفَ دْ الْخُبْزْ اللِّي شَاطُو.

³⁸وْكَانُو النَّاسْ اللِّي كْلَاوْ رَبْعَالَافْ وَاحْدْ مْنْ غِيرْ الْعْيَالَاتْ وْالْوْلَادْ.

³⁹وْمْلِّي صِيفْطْ يَسُوعْ الجّْمَاعَاتْ دْ النَّاسْ، رْكَبْ فْالْفْلُوكَة وْجَا لْجْوَايْهْ بْلَادْ مَجْدَانْ.