Read Moroccan Standard Translation مَتَّى 2 Bible Online

مَتَّى 2 - Moroccan Standard Translation bible

مَتَّى 2

¹الْفَصْلْ التَّانِي وْمْلِّي تّْزَادْ يَسُوعْ فْبِيتْ لَحْمْ اللِّي فْبْلَادْ الْيَهُودِيَّة، فْعَهْدْ الْمَلِكْ هِيرُودُسْ، جَاوْ مْنْ الشَّرْقْ لْأُورْشَلِيمْ شِي عُلَمَا دْ النّْجُومْ

²كَيْسْوّْلُو: «فِينْ هُوَ مَلِكْ لِيهُودْ اللِّي تّْزَادْ؟ حِيتْ شْفْنَا النّْجْمَة دْيَالُه طَالْعَة فْالشَّرْقْ وْجِينَا بَاشْ نْسَجْدُو لِيهْ».

³وْمْلِّي سْمَعْ الْمَلِكْ هِيرُودُسْ هَادْشِّي، خَافْ هُوَ وْݣَاعْ النَّاسْ اللِّي فْأُورْشَلِيمْ.

⁴وْنَاضْ جْمَعْ الرُّؤَسَا دْ رْجَالْ الدِّينْ وْالْعُلَمَا دْ الشّْرَعْ كُلّْهُمْ، وْسْوّْلْهُمْ: «فِينْ غَيْتّْوْلَدْ الْمَسِيحْ؟».

⁵وْجَاوْبُوهْ: «فْبِيتْ لَحْمْ اللِّي فْبْلَادْ الْيَهُودِيَّة، حِيتْ هَادْشِّي اللِّي كْتَبْ عْلِيهْ النّْبِي مْلِّي ݣَالْ:

⁶وْنْتِ آ بِيتْ لَحْمْ، اللِّي فْبْلَادْ يَهُودَا، رَاكِ مَاشِي نْتِ هِيَ الصّْغِيرَة فْمْدُونْ يَهُودَا، حِيتْ مْنّْكْ غَادِي يْخْرَجْ رَئِيسْ غَيْحْكَمْ الشَّعْبْ دْيَالِي إِسْرَائِيلْ».

⁷وْمْنْ بَعْدْ صِيفْطْ هِيرُودُسْ عْلَى الْعُلَمَا دْ النّْجُومْ فْالسِّرْ، وْتّْحَقّْقْ مْنّْهُمْ عْلَى الْوَقْتْ اللِّي بَانْتْ فِيهْ النّْجْمَة.

⁸وْمْنْ بَعْدْ صِيفْطْهُمْ لْبِيتْ لَحْمْ وْݣَالْ لِيهُمْ: «سِيرُو قَلّْبُو مْزْيَانْ عْلَى الْوَلْدْ. وْمْلِّي تْلْقَاوْهْ، أَجِيوْ خَبّْرُونِي بَاشْ حْتَّى أَنَا نْمْشِي وْنْسْجَدْ لِيهْ».

⁹وْمْلِّي سْمْعُو كْلَامْ الْمَلِكْ، مْشَاوْ. وْهِيَ تْبَانْ لِيهُمْ النّْجْمَة اللِّي كَانُو شَافُوهَا فْالشَّرْقْ، وْبْقَاتْ غَادْيَة قُدَّامْهُمْ حْتَّى وْصْلَاتْ لْلْمُوضْعْ فِينْ كَانْ الْوَلْدْ وْوَقْفَاتْ.

¹⁰وْغِيرْ شَافُو النّْجْمَة، فْرْحُو بْزَّافْ.

¹¹وْمْلِّي دَخْلُو لْلدَّارْ، شَافُو الْوَلْدْ وْمُّه مَرْيَمْ، وْهُمَ يْرَكْعُو وْسْجْدُو لِيهْ، وْحْلُّو صْنَادْقْهُمْ وْهْدَاوْ لِيهْ الدّْهَبْ وْالْلُّبَانْ وْالْمَسْكْ الْحُرّْ.

¹²وْمْلِّي نَبّْهُمْ الرَّبّْ فْالْمْنَامْ بَاشْ مَا يْرْجْعُوشْ لْعَنْدْ هِيرُودُسْ، شْدُّو طْرِيقْ خْرَى وْرْجْعُو لْبْلَادْهُمْ.

¹³وْمْنْ بَعْدْمَا مْشَاوْ الْعُلَمَا، بَانْ مَلَاكْ الرَّبّْ لْيُوسْفْ فْالْمْنَامْ وْݣَالْ لِيهْ: «نُوضْ وْخُدْ الْوَلْدْ وْمُّه وْهْرَبْ لْمِصْرْ، وْبْقَى تْمَّ حْتَّى نْݣُولْ لِيكْ وْقْتَاشْ خَاصّْكْ تْرْجَعْ، حِيتْ هِيرُودُسْ غَادِي يْقَلّْبْ عْلَى الْوَلْدْ بَاشْ يْقْتْلُه».

¹⁴وْنَاضْ يُوسْفْ وْخْدَا الْوَلْدْ وْمُّه بْاللِّيلْ وْمْشَاوْ لْمِصْرْ.

¹⁵وْبْقَى تْمَّ حْتَّى مَاتْ هِيرُودُسْ بَاشْ يْتّْحَقّْقْ كْلَامْ الرَّبّْ عْلَى لْسَانْ النّْبِي اللِّي ݣَالْ: «مْنْ مِصْرْ عَيّْطْتْ عْلَى وْلْدِي».

¹⁶وْمْلِّي شَافْ هِيرُودُسْ بْلِّي الْعُلَمَا دْ النّْجُومْ لَعْبُو بِيهْ، تْقَلّْقْ بْزَّافْ وْآمْرْ بَاشْ يْتّْقْتْلُو ݣَاعْ الدّْرَارِي اللِّي فْبِيتْ لَحْمْ وْالنَّوَاحِي دْيَالْهَا مْنْ وَلْدْ عَامَيْنْ لْلْتَحْتْ، حِيتْ هَادِي هِيَ الْمُدَّة اللِّي دَازْتْ عْلَى الْوَقْتْ اللِّي عَرْفُه مْنْ الْعُلَمَا دْ النّْجُومْ،

¹⁷وْهَكَّا تْحَقّْقْ كْلَامْ الرَّبّْ عْلَى لْسَانْ النّْبِي إِرْمِيَا اللِّي ݣَالْ:

¹⁸«مْنْ الرَّامَة تّْسْمَعْ غْوَاتْ، بْكَا وْنْوَاحْ كْتِيرْ، رَاحِيلْ كَتْبْكِي عْلَى وْلَادْهَا وْمَا بْغَاتْشْ اللِّي يْعَزِّيهَا، حِيتْ وْلَادْهَا مَاتُو».

¹⁹وْمْلِّي مَاتْ هِيرُودُسْ بَانْ مَلَاكْ الرَّبّْ لْيُوسْفْ فْالْمْنَامْ وْهُوَ فْمِصْرْ،

²⁰وْݣَالْ لِيهْ: «نُوضْ خُدْ الْوَلْدْ وْمُّه وْرْجَعْ لْبْلَادْ إِسْرَائِيلْ، حِيتْ هَادُوكْ اللِّي كَانُو بَاغْيِينْ يْقْتْلُو الْوَلْدْ مَاتُو».

²¹وْنَاضْ يُوسْفْ وْخْدَا الْوَلْدْ وْمُّه وْرْجَعْ لْبْلَادْ إِسْرَائِيلْ.

²²وَلَكِنْ مْلِّي سْمَعْ بْلِّي أَرْخِيلَاوْسْ وْلَّى كَيْحْكَمْ فْبْلَادْ الْيَهُودِيَّة فْبْلَاصْةْ هِيرُودُسْ بَّاهْ، خَافْ يْرْجَعْ لْتْمَّ. وْحِيتْ نَبّْهُه اللَّهْ فْالْمْنَامْ مْشَى لْجْوَايْهْ الْجَلِيلْ.

²³وْجَا لْوَاحْدْ الْمْدِينَة سْمِيتْهَا النَّاصِرَة وْسْكَنْ فِيهَا، بَاشْ يْتّْحَقّْقْ كْلَامْ اللَّهْ عْلَى لْسَانْ الْأَنْبِيَا اللِّي ݣَالُو: «غَادِي يْتّْسَمَّى نَاصِرِي».