Read Moroccan Standard Translation مَتَّى 20 Bible Online

مَتَّى 20 - Moroccan Standard Translation bible

مَتَّى 20

¹الْفَصْلْ عْشْرِينْ «رَاهْ مَمْلَكَةْ السَّمَاوَاتْ كَتْشْبَهْ لْوَاحْدْ الرَّاجْلْ عَنْدُه جْنَانْ دْ الْعْنَبْ، خْرَجْ فْالصّْبَاحْ بْكْرِي بَاشْ يْكْرِي خْدَّامَا لْلجّْنَانْ دْيَالُه.

²وْدَارْ مْعَاهُمْ دِينَارْ لْلنّْهَارْ وْصِيفْطْهُمْ لْلجّْنَانْ دْيَالُه.

³وْخْرَجْ جْوَايْهْ التّْسْعُودْ دْ الصّْبَاحْ وْلْقَا خْدَّامَا خْرِينْ وَاقْفِينْ فْالسُّوقْ بْلَا خْدْمَة.

⁴وْهُوَ يْݣُولْ لِيهُمْ: سِيرُو حْتَّى نْتُمَ لْلجّْنَانْ دْيَالِي، وْرَانِي غَادِي نْخَلّْصْكُمْ بْدَاكْشِّي اللِّي كَتْسْتَاهْلُوهْ،

⁵وْمْشَاوْ. وْخْرَجْ تَانِي جْوَايْهْ الطّْنَاشْ دْ النّْهَارْ، وْعَاوْدْ خْرَجْ فْالتّْلَاتَة دْ النّْهَارْ، وْزَادْ خْدَّامَا خْرِينْ.

⁶وْخْرَجْ مَرَّة خْرَى جْوَايْهْ الْخَمْسَة دْيَالْ الْعْشِيَّة، وْلْقَا خْدَّامَا خْرِينْ وَاقْفِينْ وْݣَالْ لِيهُمْ: عْلَاشْ وَاقْفِينْ هْنَا النّْهَارْ كُلُّه بْلَا خْدْمَة؟

⁷وْجَاوْبُوهْ: حِيتْ حْتَّى حَدّْ مَا خَدّْمْنَا عَنْدُه. وْݣَالْ لِيهُمْ: إِيوَا سِيرُو حْتَّى نْتُمَ لْلجّْنَانْ دْيَالِي.

⁸وْمْلِّي جَاتْ الْعْشِيَّة، ݣَالْ مُولْ الجّْنَانْ لْلْوْكِيلْ دْيَالُه: عَيّْطْ عْلَى الْخْدَّامَا كُلّْهُمْ وْعْطِيهُمْ الْخْلَاصْ دْيَالْهُمْ، وْبْدَا مْنْ اللّْخْرِينْ حْتَّى تْوْصَلْ لْلّْوّْلِينْ.

⁹وْجَاوْ هَادُوكْ اللِّي كْرَاهُمْ فْالْخَمْسَة دْ الْعْشِيَّة وْخْدَا كُلّْ وَاحْدْ مْنّْهُمْ دِينَارْ.

¹⁰وْمْلِّي جَاوْ اللّْوّْلِينْ، حْسَابْ لِيهُمْ بْلِّي غَادِي يْتّْخَلّْصُو بْتَمَنْ زَايْدْ، وَلَكِنْ حْتَّى هُمَ خْدَاوْ غِيرْ دِينَارْ لْلْوَاحْدْ.

¹¹وْمْلِّي كَانُو كَيْتّْخَلّْصُو، بْدَاوْ كَيْتّْشْكَّاوْ عْلَى مُولْ الْمْلْكْ،

¹²وْكَيْݣُولُو: هَادُوكْ اللّْخْرِينْ خْدْمُو غِيرْ سَاعَة وَحْدَة وْقَادِّيتِيهُمْ فْالْخُلْصَة مْعَانَا حْنَا اللِّي بْقِينَا خْدَّامِينْ النّْهَارْ كَامْلْ فْالشّْمْسْ.

¹³وْهُوَ يْجَاوْبْ مُولْ الْمْلْكْ وَاحْدْ فِيهُمْ، وْݣَالْ لِيهْ: أَنَا رَاهْ مَا ضْلَمْتْكْشْ أَصَاحْبِي، يَاكْ تَّافْقْتْ مْعَاكْ عْلَى دِينَارْ؟

¹⁴إِيوَا خُدْ حَقّْكْ وْسِيرْ بْحَالْكْ! وْهَادَا اللِّي جَا فْاللّْخْرْ، أَنَا اللِّي بْغِيتْ نْعْطِيهْ بْحَالْكْ.

¹⁵وَاشْ مَا عَنْدِيشْ الْحَقّْ نْتّْصَرّْفْ فْفْلُوسِي كِمَا بْغِيتْ؟ وْلَا نْتَ مْحْسَادْ حِيتْ أَنَا سْخِي؟».

¹⁶وْزَادْ ݣَالْ يَسُوعْ: «هَكَّا غَيْوَلِّيوْ اللّْخْرِينْ هُمَ اللّْوّْلِينْ، وْاللّْوّْلِينْ هُمَ اللّْخْرِينْ».

¹⁷وْمْلِّي كَانْ يَسُوعْ طَالْعْ لْأُورْشَلِيمْ، عْزَلْ تْلَامْدُه الطّْنَاشْ بُوحْدْهُمْ وْݣَالْ لِيهُمْ فْالطّْرِيقْ:

¹⁸«هَا حْنَا طَالْعِينْ لْأُورْشَلِيمْ، وْرَاهْ شِي حَدّْ غَادِي يْسَلّْمْ وَلْدْ الْإِنْسَانْ لْلرُّؤَسَا دْ رْجَالْ الدِّينْ وْالْعُلَمَا دْ الشّْرَعْ، وْغَيْحَكْمُو عْلِيهْ بْالْمُوتْ

¹⁹وْغَادِي يْسَلّْمُوهْ لْلِّي مَا كَيْعَرْفُوشْ اللَّهْ اللِّي غَيْضَحْكُو عْلِيهْ وْيْضْرْبُوهْ وْيْصَلْبُوهْ، وْفْالنّْهَارْ التَّالْتْ غَادِي يْتّْبْعَتْ مْنْ الْمُوتْ».

²⁰وْجَاتْ أُمّْ وْلَادْ زَبَدِي هِيَ وْوْلَادْهَا لْعَنْدْ يَسُوعْ، وْسْجْدَاتْ لِيهْ وْطْلْبَاتْ مْنُّه بَاشْ يْقْضِي لِيهَا وَاحْدْ الْحَاجَة.

²¹وْسْوّْلْهَا: «شْنُو بْغِيتِي؟»، وْݣَالْتْ لِيهْ: «آمْرْ بَاشْ يْݣَلْسُو وْلَادِي بْجُوجْ، وَاحْدْ عْلَى لِيمْنْ دْيَالْكْ وْلَاخُرْ عْلَى لِيسْرْ دْيَالْكْ فْمَمْلَكْتَكْ».

²²وْهُوَ يْجَاوْبْ يَسُوعْ: «رَاكُمْ مَا عَارْفِينْشْ آشْ كَتْطْلْبُو، وَاشْ تْقَدْرُو تْشَرْبُو الْكَاسْ دْيَالْ الْمْحَايْنْ اللِّي غَنْشْرَبْ؟». وْݣَالُو لِيهْ: «إِيِّهْ نْقَدْرُو!».

²³وْݣَالْ لِيهُمْ: «بْالصَّحْ، كَاسِي غَادِي تْشَرْبُوهْ، وَلَكِنْ الْݣْلَاسْ عْلَى لِيمْنْ دْيَالِي وْلِيسْرْ دْيَالِي مَاشِي أَنَا اللِّي غَادِي نْعْطِيهْ، حِيتْ مَا غَادِي يْتّْعْطَى غِيرْ لْهَادُوكْ اللِّي وَجّْدُو لِيهُمْ بَّا».

²⁴وْمْلِّي سْمْعُو التّْلَامْدْ الْعَشْرَة هَادْ الْكْلَامْ، تّْقَلّْقُو بْزَّافْ عْلَى يَعْقُوبْ وْخُوهْ يُوحَنَّا.

²⁵وْعَيّْطْ لِيهُمْ يَسُوعْ وْݣَالْ: «كَتْعَرْفُو بْلِّي الرُّؤَسَا كَيْتّْحَكّْمُو فْالشّْعُوبْ دْيَالْهُمْ، وْالْمْسْؤُولِينْ الْكْبَارْ كَيْفَرْضُو السُّلْطَة دْيَالْهُمْ عْلَى كُلّْ وَاحْدْ تَحْتْ مْنّْهُمْ.

²⁶وْنْتُمَ هَادْشِّي مَا خَاصّْشْ يْكُونْ بِينَاتْكُمْ. وَلَكِنْ اللِّي بْغَا يْكُونْ كْبِيرْ فِيكُمْ، خَاصُّه يْوَلِّي الْخْدَّامْ دْيَالْكُمْ.

²⁷وْاللِّي بْغَا يْكُونْ اللّْوّْلْ فِيكُمْ، خَاصُّه يْوَلِّي الْعَبْدْ دْيَالْكُمْ.

²⁸وْهَكَّا وَلْدْ الْإِنْسَانْ مَا جَاشْ بَاشْ يْخَدْمُو عْلِيهْ النَّاسْ، وَلَكِنْ بَاشْ يْخْدَمْ وْيْفْدِي بْزَّافْ دْ النَّاسْ بْحْيَاتُه».

²⁹وْفْالْوَقْتْ فَاشْ كَانُو خَارْجِينْ مْنْ أَرِيحَا، تْبْعَاتْ يَسُوعْ وَاحْدْ الجّْمَاعَة كْبِيرَة دْ النَّاسْ.

³⁰وْكَانُو جُوجْ دْ الْعَمْيِينْ ݣَالْسِينْ فْجَنْبْ الطّْرِيقْ، وْغِيرْ سْمْعُو بْلِّي يَسُوعْ كَانْ دَايْزْ مْنْ تْمَّ، وْهُمَ يْبْدَاوْ كَيْغَوّْتُو وْكَيْݣُولُو: «رْحَمْنَا آ سِيدِي، آ بْنْ دَاوُدْ!».

³¹وْوَاخَّا خَاصْمُو عْلِيهُمْ النَّاسْ بَاشْ يْسَكْتُو، زَادُو كَيْغَوّْتُو كْتَرْ وْكَيْݣُولُو: «رْحَمْنَا آ سِيدِي، آ بْنْ دَاوُدْ!».

³²وْوْقَفْ يَسُوعْ وْعَيّْطْ عْلِيهُمْ وْسْوّْلْهُمْ: «آشْ بْغِيتُونِي نْدِيرْ لِيكُمْ!»

³³وْجَاوْبُوهْ: «بْغِينَا عِينِينَا يْتّْحَلُّو آ سِيدِي!».

³⁴وْحَنّْ عْلِيهُمْ يَسُوعْ، وْغِيرْ مْسّْ عِينِيهُمْ بْدَاوْ كَيْشُوفُو، وْهُمَ يْتْبْعُوهْ.