Read Moroccan Standard Translation مَتَّى 22 Bible Online

مَتَّى 22 - Moroccan Standard Translation bible

مَتَّى 22

¹الْفَصْلْ تْنِينْ وْعْشْرِينْ وْعَاوْدْ يَسُوعْ تّْكَلّْمْ بْالْمْتُولْ مَرَّة خْرَى مْعَ الجّْمَاعَة دْ النَّاسْ وْݣَالْ:

²«كَتْشْبَهْ مَمْلَكَةْ السَّمَاوَاتْ لْوَاحْدْ الْمَلِكْ دَارْ الْعَرْسْ لْوَلْدُه.

³وْصِيفْطْ الْعْبِيدْ دْيَالُه يْعَيْطُو عْلَى الْمْعْرُوضِينْ، وَلَكِنْ هُمَ مَا بْغَاوْشْ يْجِيوْ.

⁴وْعَاوْدْ صِيفْطْ عْبِيدْ خْرِينْ وْݣَالْ لِيهُمْ: ݣُولُو لْلْمْعْرُوضِينْ: رَانِي وَجّْدْتْ الْعَرْسْ وْدْبَحْتْ الْبْݣَرْ وْالْعْجُولْ السّْمَانْ وْكُلّْشِي رَاهْ مُوجُودْ، إِيوَا أَجِيوْ لْلْعَرْسْ!

⁵وَلَكِنْ هُمَ مَا دَّاوْهَاشْ فِيهْ، فِيهُمْ اللِّي خْرَجْ لْلْفْدَّانْ دْيَالُه، وْفِيهُمْ اللِّي مْشَى يْبِيعْ وْيْشْرِي،

⁶وْوْحْدِينْ خْرِينْ مْنْ الْمْعْرُوضِينْ شْدُّو الْعْبِيدْ دْيَالُه وْعَايْرُوهُمْ وْقْتْلُوهُمْ.

⁷وْتّْقَلّْقْ الْمَلِكْ وْصِيفْطْ الْعَسْكَرْ دْيَالُه وْهْلَكْ هَادُوكْ الْقْتَّالَة وْحْرَقْ مْدِينْتْهُمْ.

⁸وْهُوَ يْݣُولْ لْلْعْبِيدْ دْيَالُه: الْعَرْسْ هَا هُوَ مُوجُودْ وَلَكِنْ هَادُوكْ اللِّي عْرَضْنَا عْلِيهُمْ مَا يْسْتَاهْلُوشْ.

⁹إِيوَا سِيرُو دَابَا لْفِينْ كَيْتّْلَاقَاوْ الطّْرْقَانْ وْعَرْضُو عْلَى كُلّْ وَاحْدْ لْقِيتُوهْ لْلْعَرْسْ.

¹⁰وْخَرْجُو الْعْبِيدْ لْلطّْرْقَانْ وْجْمْعُو ݣَاعْ اللِّي لْقَاوْهْ، لَا النَّاسْ الْمْزْيَانِينْ وَلَا الْخَايْبِينْ حْتَّى عَمْرَاتْ دَارْ الْعَرْسْ بْالضّْيَافْ.

¹¹وْمْلِّي دْخَلْ الْمَلِكْ بَاشْ يْشُوفْ الضّْيَافْ، بَانْ لِيهْ وَاحْدْ الرَّاجْلْ مَا لَابْسْشْ الْحْوَايْجْ دْيَالْ الْعَرْسْ

¹²وْهُوَ يْݣُولْ لِيهْ: كِي دْرْتِي أَصَاحْبِي حْتَّى دْخَلْتِي لّْهْنَا وْنْتَ مَا لَابْسْشْ الْحْوَايْجْ دْيَالْ الْعَرْسْ؟ وْسْكَتْ الرَّاجْلْ حِيتْ مَا عَنْدُه مَا يْݣُولْ.

¹³وْهُوَ يْݣُولْ الْمَلِكْ لْلْخْدَّامَا: كَتّْفُوهْ مْنْ يْدِّيهْ وْرْجْلِيهْ وْرْمِيوْهْ عْلَى بْرَّا فْالضّْلَامْ، تْمَّ فِينْ غَادِي يْكُونْ الْبْكَا وْتْغْزَازْ السّْنَانْ.

¹⁴حِيتْ كْتَارْ اللِّي تْعَرْضُو وَلَكِنْ اللِّي تّْخْتَارُو قْلَالْ».

¹⁵وْمْشَاوْ الْفْرِّيسِيِّينْ دِيكْ السَّاعَة كَيْتّْشَاوْرُو بِينَاتْهُمْ بَاشْ يْشَدُّو عْلَى يَسُوعْ شِي غَلْطَة فْكْلَامُه.

¹⁶وْهُمَ يْصِيفْطُو لِيهْ التّْلَامْدْ دْيَالْهُمْ مْعَ الْهِيرُودُسِيِّينْ وْݣَالُو لِيهْ: «آ سِيدِي، كَنْعَرْفُو بْلِّي رَاكْ صَادْقْ، وْكَتْعَلّْمْ طْرِيقْ اللَّهْ بْالْحَقّْ، وْمَا كَتْدِيرْشْ الْوْجْهِيَّاتْ، حِيتْ مَا كَيْهَمّْكْشْ بْنَادْمْ كِمَا كَانْ شَانُه.

¹⁷إِيوَا ݣُولْ لِينَا آشْ ضْهَرْ لِيكْ؟ وَاشْ حْلَالْ نْخَلّْصُو الضَّرِيبَة لْلْقَيْصَرْ وْلَا لَّا؟».

¹⁸وْعْرَفْ يَسُوعْ التَّحْرَمِيَّاتْ دْيَالْهُمْ وْݣَالْ لِيهُمْ: «عْلَاشْ كَتْجَرّْبُونِي آ هَادْ الْمُنَافِقِينْ؟

¹⁹وْرِّيوْنِي الْفْلُوسْ بْآشْ كَتْخَلّْصُو الضَّرِيبَة!». وْجَابُو لِيهْ دِينَارْ.

²⁰وْسْوّْلْهُمْ: «هَادْ التّْصْوِيرَة وْهَادْ الْكْتْبَة اللِّي فْالْفْلُوسْ دْيَالْ مْنْ؟»،

²¹ݣَالُو لِيهْ: «دْيَالْ قَيْصَرْ!»، وْهُوَ يْݣُولْ لِيهُمْ: «إِيوَا اللِّي هُوَ دْيَالْ قَيْصَرْ عْطِيوْهْ لْقَيْصَرْ وْاللِّي هُوَ دْيَالْ اللَّهْ عْطِيوْهْ لْلَّهْ!».

²²وْمْلِّي سْمْعُوهْ تّْعَجّْبُو، وْخْلَّاوْهْ وْمْشَاوْ.

²³وْفْدَاكْ النّْهَارْ جَاوْ لْعَنْدْ يَسُوعْ شِي وْحْدِينْ مْنْ الصّْدُّوقِيِّينْ اللِّي كَيْنَكْرُو بْلِّي الْمُوتَى كَيْتّْبَعْتُو، وْسْوّْلُوهْ:

²⁴«آ سِيدِي، ݣَالْ مُوسَى: إِلَا مَاتْ شِي رَاجْلْ وْمَا خْلَّاشْ الْوْلَادْ، خَاصّْ خُوهْ يْتّْزَوّْجْ بْمْرَاتُه بَاشْ يْدِيرْ وْلَادْ عْلَى سْمِيّْةْ خُوهْ.

²⁵وْكَانُو عَنْدْنَا سْبْعَة دْيَالْ الْخُوتْ، تّْزَوّْجْ اللّْوّْلْ فِيهُمْ وْمَاتْ، وْحِيتْ مَا كَانُو عَنْدُه وْلَادْ، خْلَّا مْرَاتُه لْخُوهْ بَاشْ يْتّْزَوّْجْ بِيهَا.

²⁶وْهَكَّا وْقَعْ لْلتَّانِي وْلْلتَّالْتْ حْتَّى لْلسَّابْعْ.

²⁷وْفْاللّْخْرْ مْنْ بَعْدْمَا مَاتُو كُلّْهُمْ، مَاتْتْ الْمْرَاة حْتَّى هِيَ.

²⁸إِيوَا شْكُونْ فْهَادْ السّْبْعَة اللِّي غَيْكُونْ رَاجْلْ هَادْ الْمْرَاة فْيُومْ الْبَعْتْ؟ حِيتْ كُلّْهُمْ كَانُو رْجَالْهَا».

²⁹وْجَاوْبْ يَسُوعْ وْݣَالْ لِيهُمْ: «نْتُمَ رَاكُمْ غَالْطِينْ، حِيتْ مَا كَتْعَرْفُو لَا كْتَابْ اللَّهْ وَلَا قُوَّةْ اللَّهْ.

³⁰حِيتْ فْيُومْ الْبَعْتْ، النَّاسْ مَا غَيْتّْزَوّْجُوشْ وْمَا غَيْزَوّْجُوهُمْشْ وَلَكِنْ غَيْكُونُو بْحَالْ الْمَلَايْكَة فْالسّْمَا.

³¹أَمَّا مْنْ جِهْةْ الْبَعْتْ دْيَالْ الْمُوتَى، وَاشْ مَا قْرِيتُوشْ كْلَامْ اللَّهْ لِيكُمْ مْلِّي ݣَالْ:

³²أَنَا هُوَ إِلَاهْ إِبْرَاهِيمْ وْإِلَاهْ إِسْحَاقْ وْإِلَاهْ يَعْقُوبْ؟ اللَّهْ رَاهْ مَاشِي إِلَاهْ الْمُوتَى وَلَكِنْ إِلَاهْ الْحَيِّينْ».

³³وْمْلِّي سْمْعُو الجّْمَاعَاتْ دْ النَّاسْ هَادْ الْكْلَامْ، تّْعَجّْبُو مْنْ التَّعْلِيمْ دْيَالُه.

³⁴وْمْلِّي سَاقُو الْفْرِّيسِيِّينْ الْخْبَارْ بْلِّي يَسُوعْ سَكّْتْ الصّْدُّوقِيِّينْ، تّْجَمْعُو مْعَ بْعْضِيَّاتْهُمْ.

³⁵وْنَاضْ وَاحْدْ مْنّْهُمْ كَانْ مْنْ الْعُلَمَا دْ الشّْرَعْ، سْوّْلْ يَسُوعْ بَاشْ يْجَرّْبُه وْݣَالْ:

³⁶«آ سِيدِي، أَشْنُو هِيَ الْوْصِيَّة الْكْبِيرَة فْالشّْرَعْ؟».

³⁷وْجَاوْبُه يَسُوعْ وْݣَالْ لِيهْ: «تْبْغِي الرَّبّْ إِلَاهْكْ مْنْ قَلْبَكْ كُلُّه وْمْنْ نْفْسَكْ كُلّْهَا وْمْنْ عَقْلَكْ كُلُّه.

³⁸هَادِي هِيَ الْوْصِيَّة الْكْبِيرَة وْاللّْوّْلَى.

³⁹وْالْوْصِيَّة التَّانْيَة بْحَالْهَا: تْبْغِي اللِّي قْرِيبْ لِيكْ كِيفْ كَتْبْغِي رَاسْكْ.

⁴⁰وْعْلَى هَادْ الجُّوجْ دْيَالْ الْوْصِيَّاتْ كَيْتّْبْنَى الشّْرَعْ كُلُّه وْكْتُبْ الْأَنْبِيَا».

⁴¹وْمْلِّي كَانُو الْفْرِّيسِيِّينْ مْجْمُوعِينْ، سْوّْلْهُمْ يَسُوعْ وْݣَالْ:

⁴²«آشْ كَتْݣُولُو عْلَى الْمَسِيحْ؟ وَلْدْ مْنْ هُوَ؟» وْجَاوْبُوهْ: «وَلْدْ دَاوُدْ!».

⁴³وْهُوَ يْسْوّْلْهُمْ: «إِيوَا كِيفَاشْ دَاوُدْ بْالْوَحْيْ دْيَالْ رُوحْ اللَّهْ عَيّْطْ لِيهْ رَبِّي مْلِّي ݣَالْ:

⁴⁴ݣَالْ الرَّبّْ لْرَبِّي: ݣْلَسْ عْلَى لِيمْنْ دْيَالِي حْتَّى نْدِيرْ عْدْيَانْكْ تَحْتْ رْجْلِيكْ.

⁴⁵إِيوَا إِلَا دَاوُدْ كَيْعَيّْطْ لْلْمَسِيحْ رَبِّي، كِيفَاشْ غَيْكُونْ الْمَسِيحْ وَلْدُه؟».

⁴⁶وْمَا قْدَرْ حْتَّى وَاحْدْ يْجَاوْبُه بْشِي كْلْمَة، وَلَا زْعَمْ حْتَّى وَاحْدْ مْنْ دَاكْ النّْهَارْ بَاشْ يْسْوّْلُه أَسْئِلَة خْرَى.