Read Moroccan Standard Translation مَتَّى 24 Bible Online

مَتَّى 24 - Moroccan Standard Translation bible

مَتَّى 24

¹الْفَصْلْ رْبْعَة وْعْشْرِينْ وْخْرَجْ يَسُوعْ وْمْشَى لْبِيتْ اللَّهْ، وْهُمَ يْجِيوْ لْعَنْدُه تْلَامْدُه بَاشْ يْوْرِّيوْهْ الْبْنِي دْيَالْ بِيتْ اللَّهْ.

²وْݣَالْ لِيهُمْ يَسُوعْ: «وَاشْ شْفْتُو هَادْشِّي كُلُّه؟ رَانِي نْݣُولْ لِيكُمْ الْحَقّْ: مَا غَتْبْقَى هْنَا حْتَّى حَجْرَة فُوقْ حَجْرَة، إِلَّا وْغَتْرِيبْ».

³وْمْلِّي كَانْ يَسُوعْ ݣَالْسْ فْجْبَلْ الزِّيتُونْ، جَاوْ لْعَنْدُه تْلَامْدُه وْسْوّْلُوهْ بِينْهُمْ وْبِينُه وْݣَالُو: «ݣُولْ لِينَا آ سِيدِي، وْقْتَاشْ غَيْوْقَعْ هَادْشِّي؟ وْأَشْنُو هِيَ الْعَلَامَة دْيَالْ الْمْجِي دْيَالْكْ وْدْيَالْ اللّْخْرْ دْ الزّْمَانْ؟».

⁴وْهُوَ يْجَاوْبْهُمْ يَسُوعْ وْݣَالْ: «رْدُّو بَالْكُمْ لَيْغَلّْطْكُمْ شِي حَدّْ!

⁵حِيتْ غَيْجِيوْ بْزَّافْ دْ النَّاسْ وْغَيَاخْدُو الْإِسْمْ دْيَالِي وْغَيْݣُولُو: أَنَا هُوَ الْمَسِيحْ! وْغَيْغَلّْطُو نَاسْ كْتَارْ.

⁶وْرَاهْ غَتْسَمْعُو بْالْحَرْبْ وْبْخْبَارْ الْحَرْبْ، وْعَنْدَاكُمْ تّْخَلْعُو! حِيتْ هَادْشِّي كُلُّه لَابْدَّ يْوْقَعْ، وَلَكِنْ مَا غَادِيشْ يْكُونْ هَادَا هُوَ اللّْخْرْ دْ الزّْمَانْ.

⁷حِيتْ غَادِي يْهْجَمْ شَعْبْ عْلَى شَعْبْ، وْمَمْلَكَة عْلَى مَمْلَكَة، وْغَيْجِي الجُّوعْ، وْغَيْضْرَبْ الزّْلْزَالْ فْبْلَايْصْ كْتَارْ.

⁸وَلَكِنْ هَادْشِّي كُلُّه غِيرْ الْبْدُو دْيَالْ الْوْجَعْ.

⁹دِيكْ السَّاعَة غَيْسَلّْمُوكُمْ لْلِّي غَادِي يْعَدّْبُوكُمْ وْيْقْتْلُوكُمْ. وْالشّْعُوبْ دْيَالْ الدّْنْيَا كُلّْهُمْ غَيْكَرْهُوكُمْ عْلَى وْدّْ الْإِسْمْ دْيَالِي.

¹⁰وْدِيكْ السَّاعَة بْزَّافْ دْ النَّاسْ غَيْرْجْعُو عْلَى إِيمَانْهُمْ وْغَيْبَيّْعُو بْبَعْضِيَّاتْهُمْ وْغَيْكَرْهُو بْعْضِيَّاتْهُمْ.

¹¹وْغَيْبَانُو بْزَّافْ دْ الْأَنْبِيَا الْكْدَّابِينْ وْغَيْغَلّْطُو بْزَّافْ دْ النَّاسْ.

¹²وْمْنْ كْتْرَةْ الدّْنُوبْ غَتْبْرَدْ الْمْحَبَّة دْيَالْ نَاسْ كْتَارْ.

¹³وَلَكِنْ اللِّي بْقَى تَابْتْ حْتَّى لْلّْخْرْ هَادَاكْ غَيْنْجَا.

¹⁴وْغَيْتّْخَبّْرْ بْهَادْ الْبْشَارَة دْيَالْ مَمْلَكَةْ اللَّهْ فْالدّْنْيَا كُلّْهَا، وْغَادِي تْكُونْ شْهَادَة لْشْعُوبْ الدّْنْيَا كُلّْهُمْ، وْدِيكْ السَّاعَة غَيْجِي اللّْخْرْ دْ الزّْمَانْ».

¹⁵«وْمْلِّي تْشُوفُو فْالْمُوضْعْ الْمْقَدّْسْ النَّجَاسَة دْيَالْ الْخَرَابْ اللِّي تّْكَلّْمْ عْلِيهَا النّْبِي دَانْيَالْ -اللِّي كَيْقْرَا، يْفْهَمْ!-

¹⁶دِيكْ السَّاعَة اللِّي فْبْلَادْ الْيَهُودِيَّة يْهَرْبُو لْلجّْبَالْ،

¹⁷وْاللِّي فُوقْ السّْطَحْ مَا يْنْزَلْشْ بَاشْ يَاخُدْ دَاكْشِّي اللِّي فْدَارُه.

¹⁸وْاللِّي كَانْ فْالْفْدَّانْ مَا يْرْجَعْشْ بَاشْ يَاخُدْ اللّْبَاسْ دْيَالُه.

¹⁹وْيَا وِيلْ الْعْيَالَاتْ الْحَامْلَاتْ وْالْعْيَالَاتْ اللِّي كَيْرَضّْعُو فْدِيكْ لِيَّامْ.

²⁰صْلِّيوْ بَاشْ مَا يْكُونْشْ هْرُوبْكُمْ فْالشّْتَا وْلَا فْنْهَارْ السّْبْتْ.

²¹وْفْدَاكْ الْوَقْتْ غَتْوْقَعْ مُصِيبَة كْبِيرَة عَمّْرْ مَا كَانْتْ بْحَالْهَا مْنْ الْوَقْتْ اللِّي خْلَقْ فِيهْ اللَّهْ الدّْنْيَا حْتَّى لْدَابَا، وْعَمّْرْهَا مَا غَتْعَاوْدْ تْوْقَعْ مْنْ بَعْدْ.

²²وْكُونْ مَا قَصّْرْشْ اللَّهْ دِيكْ لِيَّامْ، كُونْ حْتَّى وَاحْدْ مَا يْنْجَا مْنْ الْبَشَرْ، وَلَكِنْ بْسْبَابْ هَادُوكْ اللِّي خْتَارْهُمْ اللَّهْ دِيكْ لِيَّامْ غَتّْقَصّْرْ.

²³وْدِيكْ السَّاعَة إِلَا ݣَالْ لِيكُمْ شِي حَدّْ: هَا الْمَسِيحْ هْنَا، وْلَا رَاهْ لْهِيهْ! مَا تِيّْقُوهْشْ،

²⁴حِيتْ غَيْبَانُو نَاسْ كَيْكْدْبُو وْكَيْݣُولُو بْاللِّي هُمَ الْمَسِيحْ، وْنَاسْ خْرِينْ بْاللِّي هُمَ أَنْبِيَا، وْغَيْدِيرُو عَلَامَاتْ وْأُمُورْ عْجِيبَة، بَاشْ يْغَلّْطُو إِلَا قَدْرُو حْتَّى هَادُوكْ اللِّي خْتَارْهُمْ اللَّهْ.

²⁵إِيوَا، هَانِي عْلَمْتْكُمْ مْنْ قْبَلْ.

²⁶إِلَا ݣَالُو لِيكُمْ: رَاهْ هُوَ فْالصَّحْرَا! مَا تْخَرْجُوشْ، وْلَا هَا هُوَ فْالْبْيُوتْ الدّْخْلَانِيَّة! مَا تِّيقُوشْ بِيهُمْ.

²⁷حِيتْ كِيفْ كَيْضْرَبْ الْبَرْقْ فْالشَّرْقْ وْكَيْبَانْ فْالْغَرْبْ، هَكَّاكْ غَيْكُونْ الْمْجِي دْيَالْ وَلْدْ الْإِنْسَانْ.

²⁸فِينْ مَا كَتْكُونْ الجِّيفَة، تْمَّ كَيْتّْجَمْعُو النّْسُورَ».

²⁹«وْمْنْ بَعْدْ الْمْصَايْبْ دْيَالْ دِيكْ لِيَّامْ، دْغْيَا غَتْضْلَامْ الشّْمْسْ، وْمَا غَيْضَوِّيشْ الْقَمَرْ، وْالنّْجُومْ غَتْطِيحْ مْنْ السّْمَا، وْغَتّْزَعْزَعْ الْقُوَّاتْ دْيَالْ السَّمَاوَاتْ.

³⁰وْفْدِيكْ السَّاعَة غَتْبَانْ الْعَلَامَة دْيَالْ وَلْدْ الْإِنْسَانْ فْالسّْمَا، وْمْنْ بَعْدْ غَيْنَدْبُو قْبَايْلْ الْأَرْضْ كُلّْهُمْ وْغَيْشُوفُو وَلْدْ الْإِنْسَانْ جَايْ فُوقْ سْحَابْ السّْمَا بْقُوَّة وْعَزّْ كْبِيرْ.

³¹وْغَيْصِيفْطْ الْمَلَايْكَة دْيَالُه وْمْعَاهُمْ بُوقْ صُوتُه قْوِي، بَاشْ يْجَمْعُو اللِّي تّْخْتَارُو لِيهْ مْنْ رْبْعَة دْ الجِّهَاتْ مْنْ كُلّْ مُوضْعْ تَحْتْ السّْمَا».

³²«وْتْعَلّْمُو هَادْ الْمْتَالْ مْنْ الْكَرْمَة: مْلِّي كَيْرْطَابُو عْرُوشْهَا وْكَيْوَلِّيوْ خَضْرِينْ وْكَتْخَرّْجْ الْوْرَاقْ دْيَالْهَا، كَتْعَرْفُو بْلِّي الصِّيفْ رَاهْ قَرّْبْ.

³³وْهَكَّا حْتَّى نْتُمَ، مْلِّي تْشُوفُو هَادْ الْأُمُورْ كُلّْهَا كَتْوْقَعْ، عَرْفُو بْلِّي رَاهْ قَرّْبْ يْجِي، وْرَاهْ حْدَا الْبِيبَانْ.

³⁴نْݣُولْ لِيكُمْ الْحَقّْ: مَا غَيْجِي فِينْ يْتْقَادَا هَادْ الْجِيلْ حْتَّى تْوْقَعْ هَادْ الْأُمُورْ كُلّْهَا.

³⁵رَاهْ السّْمَا وْالْأَرْضْ غَيْفْنَاوْ وَلَكِنْ كْلَامِي عَمّْرُه مَا غَيْفْنَى».

³⁶«أَمَّا دَاكْ النّْهَارْ وْدِيكْ السَّاعَة، مَا كَيْعْرَفْهُمْ حَدّْ، لَا الْمَلَايْكَة دْ السَّمَاوَاتْ وْلَا الْوَلْدْ، مْنْ غِيرْ الْآبْ بُوحْدُه.

³⁷وْكِمَا وْقَعْ فْيَّامْ نُوحْ، هَكَّا غَيْكُونْ الْمْجِي دْيَالْ وَلْدْ الْإِنْسَانْ.

³⁸حِيتْ كَانُو النَّاسْ فْلِيَّامْ اللِّي قْبَلْ مْنْ الطُّوفَانْ، كَيَاكْلُو وْكَيْشَرْبُو وْكَيْتّْزَوّْجُو وْكَيْزَوّْجُو حْتَّى لْلنّْهَارْ اللِّي دْخَلْ فِيهْ نُوحْ لْلسّْفِينَة.

³⁹وْمَا كَانُوشْ عَارْفِينْ أَشْ غَيْجْرَا، حْتَّى جَا الطُّوفَانْ وْدَّاهُمْ كُلّْهُمْ. هَكَّا غَيْكُونْ الْمْجِي دْيَالْ وَلْدْ الْإِنْسَانْ.

⁴⁰دِيكْ السَّاعَة غَيْكُونُو جُوجْ فْالْفْدَّانْ، غَيْتّْخَادْ وَاحْدْ وْغَيْبْقَى لَاخُرْ.

⁴¹وْغَيْكُونُو جُوجْ عْيَالَاتْ كَيْطَحْنُو فْالرّْحَى، غَتّْخَادْ وَحْدَة وْغَتْبْقَى لْخْرَى.

⁴²إِيوَا سْهْرُو، حِيتْ مَا كَتْعَرْفُوشْ فَاشْ مْنْ وَقْتْ غَيْجِي الرَّبّْ دْيَالْكُمْ.

⁴³وْخَاصّْكُمْ تْعَرْفُو بْلِّي كُونْ كَانْ مُولْ الدَّارْ كَيْعْرَفْ آشْ مْنْ سَاعَة فْاللِّيلْ غَيْجِي الشّْفَارْ، كُونْ يْسْهَرْ وْمَا يْخَلِّيهْشْ يْسْرَقْ لِيهْ دَارُه.

⁴⁴عْلَى هَادْشِّي حْتَّى نْتُمَ كُونُو مُوجُودِينْ عْلَاحْقَّاشْ وَلْدْ الْإِنْسَانْ غَيْجِي فْوَاحْدْ الْوَقْتْ مَا غَيْكُونْشْ عْلَى بَالْكُمْ».

⁴⁵«وْشْكُونْ هُوَ الْعَبْدْ الْأَمِينْ الْحْكِيمْ اللِّي كَلّْفُه سِيدُه بْالْعْبِيدْ دْيَالْ دَارُه بَاشْ يْعْطِيهُمْ الْمَاكْلَة فْالْوَقْتْ؟

⁴⁶سْعْدَاتْ هَادَاكْ الْعَبْدْ اللِّي فْالْوَقْتْ فَاشْ غَيْجِي سِيدُه غَيْلْقَاهْ كَيْدِيرْ الْخْدْمَة اللِّي وْصَّاهْ عْلِيهَا.

⁴⁷نْݣُولْ لِيكُمْ الْحَقّْ: رَاهْ غَادِي يْكَلّْفُه بْكُلّْ مَا كَيْمْلَكْ.

⁴⁸أَمَّا إِلَا كَانْ دَاكْ الْعَبْدْ قْبِيحْ وْݣَالْ فْخَاطْرُه: سِيدِي غَيْتّْعَطّْلْ فْالرّْجُوعْ دْيَالُه،

⁴⁹وْبْدَا كَيْضْرَبْ صْحَابُه الْعْبِيدْ وْكَيَاكُلْ وْيْشْرَبْ مْعَ السّْكَايْرِيَة،

⁵⁰غَيْجِي سِيدْ هَادَاكْ الْعَبْدْ فْوَاحْدْ النّْهَارْ مَا عْوَّالْشْ عْلِيهْ وْفْسَاعَة مَا كَيْعْرَفْهَاشْ،

⁵¹وْغَيْعَاقْبُه بْزَّافْ وْيْدِيرُه مْعَ الْمُنَافِقِينْ. تْمَّ فِينْ غَيْكُونْ الْبْكَا وْتْغْزَازْ السّْنَانْ».