Read Moroccan Standard Translation مَتَّى 4 Bible Online

مَتَّى 4 - Moroccan Standard Translation bible

مَتَّى 4

¹الْفَصْلْ الرَّابْعْ وْمْنْ بَعْدْ دَّا رُوحْ اللَّهْ يَسُوعْ لْلصَّحْرَا بَاشْ يْجَرّْبُه إِبْلِيسْ.

²وْصَامْ رْبْعِينْ يُومْ وْرْبْعِينْ لِيلَة، وْمْنْ بَعْدْ جَاهْ الجُّوعْ.

³وْجَا عَنْدُه إِبْلِيسْ اللِّي كَيْجَرّْبْ وْݣَالْ لِيهْ: «إِلَا كْنْتِ وَلْدْ اللَّهْ، ݣُولْ لْهَادْ الْحْجَرْ يْوَلِّي خُبْزْ».

⁴وْهُوَ يْرَدّْ عْلِيهْ يَسُوعْ: «مْكْتُوبْ فْكْتَابْ اللَّهْ: مَاشِي غِيرْ بْالْخُبْزْ بُوحْدُه كَيْعِيشْ بْنَادْمْ، وَلَكِنْ كَيْعِيشْ بْكُلّْ كْلْمَة كَيْݣُولْهَا اللَّهْ».

⁵وْمْنْ بَعْدْ، دَّاهْ إِبْلِيسْ لْمْدِينْةْ أُورْشَلِيمْ الْمْقَدّْسَة، وْوَقّْفُه عْلَى بْلَاصَة عَالْيَة فُوقْ بِيتْ اللَّهْ،

⁶وْݣَالْ لِيهْ: «إِلَا كْنْتِ وَلْدْ اللَّهْ، رْمِي رَاسْكْ لْلْتَحْتْ، عْلَاحْقَّاشْ مْكْتُوبْ فْكْتَابْ اللَّهْ: اللَّهْ غَادِي يْوَصِّي الْمَلَايْكَة دْيَالُه عْلِيكْ، وْعْلَى يْدِّيهُمْ غَيْهَزُّوكْ بَاشْ رْجْلَكْ مَا تّْضْرَبْشْ مْعَ الْحْجَرْ».

⁷وْجَاوْبُه يَسُوعْ: «مْكْتُوبْ فْكْتَابْ اللَّهْ تَانِي: مَا تْجَرّْبْشْ الرَّبّْ إِلَاهْكْ».

⁸وْمْنْ بَعْدْ طَلّْعُه إِبْلِيسْ لْوَاحْدْ الجّْبَلْ عَالِي بْزَّافْ، وْوْرَّاهْ ݣَاعْ الْمَمْلَكَاتْ دْيَالْ الدّْنْيَا وْالْعَزّْ دْيَالْهُمْ.

⁹وْݣَالْ لِيهْ: «ݣَاعْ هَادْشِّي غَادِي نْعْطِيهْ لِيكْ إِلَا سْجَدْتِي لِيَّ وْعْبَدْتِينِي».

¹⁰وْهُوَ يْرَدّْ عْلِيهْ يَسُوعْ: «سِيرْ بْحَالْكْ آ الشِّيطَانْ! عْلَاحْقَّاشْ مْكْتُوبْ فْكْتَابْ اللَّهْ: لْلرَّبّْ إِلَاهْكْ تْسْجَدْ وْهُوَ بُوحْدُه اللِّي تْعْبَدْ».

¹¹وْمْنْ بَعْدْ هَادْشِّي، خْلَّاهْ إِبْلِيسْ، وْجَاوْ شِي مَلَايْكَة كَيْتّْسَخّْرُو عْلِيهْ.

¹²وْمْلِّي سْمَعْ يَسُوعْ بْلِّي يُوحَنَّا الْمَعْمَدَانْ تّْشَدّْ فْالْحَبْسْ، رْجَعْ بْحَالُه لْلْجَلِيلْ.

¹³وْخْلَّا النَّاصِرَة وْمْشَى سْكَنْ فْكَفْرْنَاحُومْ اللِّي حْدَا بْحَرْ الْجَلِيلْ فْبْلَادْ زَبُولُونْ وْنَفْتَالِي.

¹⁴وْهَكَّا تْحَقّْقْ دَاكْشِّي اللِّي ݣَالْ النّْبِي إِشْعِيَا:

¹⁵«آ بْلَادْ زَبُولُونْ وْبْلَادْ نَفْتَالِي، اللِّي فْطْرِيقْ الْبْحَرْ مْنْ الجِّهَة لْخْرَى دْيَالْ وَادْ الْأُرْدُنْ، بْلَادْ الْجَلِيلْ دْيَالْ الشّْعُوبْ اللِّي مَاشِي يْهُودْ!

¹⁶الشَّعْبْ اللِّي ݣَالْسْ فْالضّْلَامْ شَافْ نُورْ عْظِيمْ، وْاللِّي كَيْعِيشُو فْبْلَادْ الْمُوتْ وْفْوَسْطْ مْنّْهَا، شْرَقْ عْلِيهُمْ وَاحْدْ النُّورْ».

¹⁷وْمْنْ دَاكْ الْوَقْتْ بْدَا يَسُوعْ كَيْخَبّْرْ النَّاسْ وْكَيْݣُولْ: «تُوبُو! رَاهْ الْوَقْتْ دْيَالْ مَمْلَكَةْ السَّمَاوَاتْ قَرّْبْ».

¹⁸وْمْلِّي كَانْ يَسُوعْ غَادِي عْلَى جَنْبْ بْحَرْ الْجَلِيلْ، شَافْ جُوجْ دْ الْخُوتْ، سِمْعَانْ اللِّي مْكَنِّي بُطْرُسْ وْخُوهْ أَنْدْرَاوُسْ كَيْرْمِيوْ الشّْبْكَة فْالْبْحَرْ، عْلَاحْقَّاشْ كَانُو صْيَّادَا دْ الْحُوتْ.

¹⁹وْݣَالْ لِيهُمْ يَسُوعْ: «تْبْعُونِي، وْأَنَا نْرَدّْكُمْ صْيَّادَا دْيَالْ النَّاسْ».

²⁰وْدِيكْ السَّاعَة خْلَّاوْ الشّْبَاكْ دْيَالْهُمْ وْتْبْعُوهْ.

²¹وْمْنْ بَعْدْ، مْشَى مْنْ تْمَّ وْشَافْ جُوجْ دْ الْخُوتْ خْرِينْ، هُمَ يَعْقُوبْ بْنْ زَبَدِي وْخُوهْ يُوحَنَّا، مْعَ بَّاهُمْ زَبَدِي فْوَاحْدْ الْفْلُوكَة كَيْصَلْحُو الشّْبَاكْ دْيَالْهُمْ. وْغِيرْ عَيّْطْ عْلِيهُمْ،

²²وْهُمَ يْخَلِّيوْ الْفْلُوكَة وْبَّاهُمْ وْتْبْعُو يَسُوعْ.

²³وْمْشَى يَسُوعْ لْكُلّْ مُوضْعْ فْبْلَادْ الْجَلِيلْ، كَيْعَلّْمْ فْدْيُورْ الصّْلَاة اللِّي تْمَّ وْكَيْخَبّْرْ بْالْبْشَارَة دْيَالْ مَمْلَكَةْ اللَّهْ، وْكَيْشَافِي النَّاسْ مْنْ كُلّْ مَرْضْ وْكُلّْ ضَعْفْ.

²⁴وْدَاعْتْ خْبَارُه فْسُورِيَا كُلّْهَا، وْجَابُو لِيهْ ݣَاعْ الْمَرْضَى اللِّي كَيْتّْوَجّْعُو بْسْبَابْ الْمَرْضْ: الْمْسْكُونِينْ، وْاللِّي فِيهُمْ لْرْيَاحْ، وْالزّْحَافَا، وْهُوَ يْشَافِيهُمْ.

²⁵وْتْبْعُوهْ بْزَّافْ دْ الجّْمَاعَاتْ مْنْ الْجَلِيلْ، وْالْمْدُونْ الْعَشْرَة، وْأُورْشَلِيمْ، وْبْلَادْ الْيَهُودِيَّة، وْمْنْ الجِّهَة لْخْرَى دْيَالْ وَادْ الْأُرْدُنْ.