Read Moroccan Standard Translation مَرْقُسْ 1 Bible Online

مَرْقُسْ 1 - Moroccan Standard Translation bible

مَرْقُسْ 1

¹الْفَصْلْ اللّْوّْلْ هَادَا هُوَ الْبْدُو دْيَالْ الْبْشَارَة بْيَسُوعْ الْمَسِيحْ وَلْدْ اللَّهْ،

²كِمَا مْكْتُوبْ فْكْتَابْ النّْبِي إِشْعِيَا: «هَانِي غَنْصِيفْطْ الرَّسُولْ دْيَالِي قُدَّامْكْ اللِّي غَادِي يْوَجّْدْ لِيكْ الطّْرِيقْ.

³صُوتْ كَيْبَرّْحْ فْالصَّحْرَا وْكَيْݣُولْ: وَجّْدُو طْرِيقْ الرَّبّْ، وْقَادُّو طْرْقَانُه».

⁴وْهَكَّا جَا يُوحَنَّا لْلصَّحْرَا كَيْعَمّْدْ النَّاسْ وْكَيْخَبّْرْهُمْ عْلَى مَعْمُودِيَّةْ التُّوبَة بَاشْ يْغْفَرْ لِيهُمْ اللَّهْ دْنُوبْهُمْ.

⁵وْخَرْجُو لْعَنْدُه النَّاسْ كُلّْهُمْ اللِّي مْنْ بْلَادْ الْيَهُودِيَّة وْأُورْشَلِيمْ، وْتّْعَمّْدُو عْلَى يْدِّيهْ فْوَادْ الْأُرْدُنْ وْهُمَ كَيْعْتَرْفُو بْدْنُوبْهُمْ.

⁶وْكَانْ يُوحَنَّا كَيْلْبَسْ حْوَايْجْ مْصَايْبِينْ مْنْ شْعَرْ الجّْمَلْ، وْكَيْتّْحَزّْمْ بْحْزَامْ دْيَالْ الجّْلْدْ، وْكَيَاكُلْ الجّْرَادْ وْالْعْسَلْ الْحُرّْ.

⁷وْكَانْ كَيْخَبّْرْ النَّاسْ وْكَيْݣُولْ: «غَادِي يْجِي مْنْ بَعْدْ مْنِّي وَاحْدْ اللِّي هُوَ قْوَى مْنِّي، وْمَا نْسْتَاهْلْشْ نْتّْحْنَى حْتَّى بَاشْ نْحَلّْ لِيهْ سْيُورْ صْبَّاطُه.

⁸أَنَا عَمّْدْتْكُمْ بْالْمَا، وَلَكِنْ هُوَ غَيْعَمّْدْكُمْ بْالرُّوحْ الْقُدُسْ».

⁹وْفْدِيكْ لِيَّامْ جَا يَسُوعْ مْنْ النَّاصِرَة اللِّي فْالْجَلِيلْ، وْتّْعَمّْدْ عْلَى يْدّْ يُوحَنَّا فْوَادْ الْأُرْدُنْ.

¹⁰وْفْدِيكْ السَّاعَة اللِّي طْلَعْ فِيهَا مْنْ الْمَا شَافْ السّْمَا تّْحَلَّاتْ وْرُوحْ اللَّهْ نَازْلْ عْلِيهْ بْحَالْ الْحْمَامَة.

¹¹وْتّْسْمَعْ وَاحْدْ الصُّوتْ مْنْ السَّمَاوَاتْ كَيْݣُولْ: «نْتَ هُوَ وْلْدِي الْعْزِيزْ اللِّي بِيهْ فْرَحْتْ بْزَّافْ».

¹²وْفْدَاكْ الْوَقْتْ خَرّْجْ رُوحْ اللَّهْ يَسُوعْ لْلصَّحْرَا،

¹³وْبْقَى تْمَّ رْبْعِينْ يُومْ وْالشِّيطَانْ كَيْجَرّْبْ فِيهْ. وْكَانْتْ الْوْحُوشْ ضَايْرَة بِيهْ وْالْمَلَايْكَة كَيْتّْسَخّْرُو عْلِيهْ.

¹⁴وْمْنْ بَعْدْمَا تّْشَدّْ يُوحَنَّا فْالْحَبْسْ، جَا يَسُوعْ لْبْلَادْ الْجَلِيلْ كَيْخَبّْرْ بْالْبْشَارَة دْيَالْ اللَّهْ،

¹⁵وْݣَالْ: «هَا الْوَقْتْ كْمَلْ وْمَمْلَكَةْ اللَّهْ قَرّْبَاتْ، إِيوَا تُوبُو وْآمْنُو بْالْبْشَارَة».

¹⁶وْمْلِّي كَانْ يَسُوعْ كَيْتّْمَشَّى فْجَنْبْ الْبْحَرْ اللِّي سْمِيتُه بْحَرْ الْجَلِيلْ، شَافْ سِمْعَانْ وْخُوهْ أَنْدْرَاوُسْ كَيْرْمِيوْ الشّْبْكَة فْالْبْحَرْ، عْلَاحْقَّاشْ كَانُو صْيَّادَا دْ الْحُوتْ.

¹⁷وْهُوَ يْݣُولْ لِيهُمْ يَسُوعْ: «تْبْعُونِي، وْأَنَا نْرَدّْكُمْ صْيَّادَا دْيَالْ النَّاسْ».

¹⁸وْدِيكْ السَّاعَة خْلَّاوْ الشّْبَاكْ دْيَالْهُمْ وْتْبْعُوهْ.

¹⁹وْزَادْ شِي شْوِيَّة وْهُوَ يْشُوفْ يَعْقُوبْ وَلْدْ زَبَدِي، وْيُوحَنَّا خُوهْ فْالْفْلُوكَة كَيْصَلْحُو الشّْبَاكْ دْيَالْهُمْ.

²⁰وْغِيرْ عَيّْطْ عْلِيهُمْ يَسُوعْ، وْهُمَ يْخَلِّيوْ بَّاهُمْ زَبَدِي مْعَ الْخْدَّامَا فْالْفْلُوكَة وْتْبْعُوهْ.

²¹وْمْشَاوْ لْكَفْرْنَاحُومْ. وْغِيرْ وْصَلْ السّْبْتْ، مْشَى يَسُوعْ لْدَارْ الصّْلَاة وْبْدَا كَيْعَلّْمْ.

²²وْتّْعَجّْبُو النَّاسْ مْنْ التَّعْلِيمْ دْيَالُه، حِيتْ كَانْ كَيْعَلّْمْهُمْ بْحَالْ شِي وَاحْدْ عَنْدُه السُّلْطَة مَاشِي بْحَالْ الْعُلَمَا دْ الشّْرَعْ.

²³وْكَانْ فْدَارْ الصّْلَاة وَاحْدْ الرَّاجْلْ سَاكْنُه جْنّْ، بْدَا كَيْغَوّْتْ

²⁴وْكَيْݣُولْ: «أَشْنُو بْغِيتِي عَنْدْنَا آ يَسُوعْ النَّاصِرِي؟ وَاشْ جِيتِي بَاشْ تْهْلَكْنَا؟ أَنَا كَنْعْرَفْ شْكُونْ نْتَ: نْتَ هُوَ الْمْقَدّْسْ دْيَالْ اللَّهْ!».

²⁵وْنْهَضْ يَسُوعْ فْالجّْنّْ وْݣَالْ لِيهْ: «سْكُتْ وْخْرُجْ مْنْ الرَّاجْلْ!».

²⁶وْطِيّْحْ الجّْنْ الرَّاجْلْ لْلْأَرْضْ وْبْدَا كَيْتّْمَرّْغْ، وْغَوّْتْ الجّْنْ بْالجّْهْدْ وْخْرَجْ مْنُّه.

²⁷وْتّْعَجّْبُو النَّاسْ كُلّْهُمْ وْبْدَاوْ كَيْسْوّْلُو بْعْضِيَّاتْهُمْ: «آشْ هَادْشِّي؟ هَادَا تَعْلِيمْ جْدِيدْ كَيْعَلّْمُه بْالسُّلْطَة، حْتَّى الجّْنُونْ كَيْطِيعُوهْ مْلِّي كَيْآمْرْهُمْ!».

²⁸وْدْغْيَا دَاعْتْ خْبَارْ يَسُوعْ فْكُلّْ جْوَايْهْ الْجَلِيلْ.

²⁹وْغِيرْ خْرَجْ يَسُوعْ مْعَ يَعْقُوبْ وْيُوحَنَّا مْنْ دَارْ الصّْلَاة وْهُمَ يْمْشِيوْ لْدَارْ سِمْعَانْ وْأَنْدْرَاوُسْ.

³⁰وْكَانْتْ نْسِيبْةْ سِمْعَانْ طَايْحَة فْالْفْرَاشْ حِيتْ فِيهَا السّْخَانَة، وْهُمَ يْخَبّْرُو يَسُوعْ عْلِيهَا.

³¹وْقَرّْبْ لْعَنْدْهَا وْشْدّْهَا مْنْ يْدّْهَا وْنَاضْتْ. وْتّْحَيّْدَاتْ مْنّْهَا السّْخَانَة، وْضَايْفَاتْهُمْ.

³²وْفْدِيكْ الْعْشِيَّة مْلِّي غْرْبَاتْ الشّْمْسْ، جَابُو النَّاسْ لْيَسُوعْ ݣَاعْ الْمَرْضَى وْاللِّي مْسْكُونِينْ بْالجّْنُونْ.

³³وْݣَاعْ النَّاسْ دْ الْمْدِينَة كَانُو تّْجَمْعُو حْدَا الْبَابْ.

³⁴وْشْفَى يَسُوعْ بْزَّافْ دْ الْمَرْضَى مْنْ بْزَّافْ دْ الْأَمْرَاضْ، وْخَرّْجْ بْزَّافْ دْ الجّْنُونْ مْنْ النَّاسْ، وْمَا خْلَّاشْ الجّْنُونْ يْهَضْرُو حِيتْ عَرْفُوهْ.

³⁵وْنَاضْ يَسُوعْ بْكْرِي قْبَلْ مَا يْصْبَحْ الْحَالْ وْخْرَجْ وْمْشَى لْوَاحْدْ الْمُوضْعْ خَالِي، وْتْمَّ بْدَا كَيْصَلِّي.

³⁶وْبْدَا سِمْعَانْ وْاللِّي كَانُو مْعَاهْ كَيْقَلّْبُو عْلِيهْ،

³⁷وْمْلِّي لْقَاوْهْ ݣَالُو لِيهْ: «رَاهْ ݣَاعْ النَّاسْ كَيْقَلّْبُو عْلِيكْ!».

³⁸وْهُوَ يْݣُولْ لِيهُمْ يَسُوعْ: «أَجِيوْ نْمْشِيوْ لْلدّْوَاوْرْ اللِّي قْرَابْ بَاشْ نْخَبّْرْ حْتَّى تْمَّ بْالْبْشَارَة، حِيتْ عْلَى هَادْشِّي جِيتْ».

³⁹وْمْشَى كَيْخَبّْرْ بْالْبْشَارَة فْدْيُورْ الصّْلَاة دْيَالْهُمْ، وْكَيْخَرّْجْ الجّْنُونْ فْالجّْوَايْهْ دْ الْجَلِيلْ كُلّْهَا.

⁴⁰وْجَا عَنْدْ يَسُوعْ وَاحْدْ الرَّاجْلْ مْجْدَامْ وْطَاحْ عْلَى رْكَابِيهْ وْرَغْبُه وْݣَالْ لِيهْ: «آ سِيدِي، إِلَا بْغِيتِي رَاكْ تْقْدَرْ تْرَدّْنِي طَاهْرْ».

⁴¹وْحَنّْ عْلِيهْ وْمْدّْ يْدُّه وْمْسُّه وْݣَالْ لِيهْ: «أَنَا بْغِيتْ، إِيوَا كُونْ طَاهْرْ!».

⁴²وْدِيكْ السَّاعَة تْحَيّْدْ مْنُّه الجّْدَامْ وْوْلَّى طَاهْرْ.

⁴³وْنْهَاهْ يَسُوعْ بْزَّافْ بَاشْ مَا يْخَبّْرْشْ النَّاسْ، وْصِيفْطُه بْحَالُه وْݣَالْ لِيهْ:

⁴⁴«رَدّْ بَالْكْ بَاشْ مَا تْݣُولْ حْتَّى حَاجَة لْشِي حَدّْ! وَلَكِنْ سِيرْ وْرِّي دَاتْكْ لْرَاجْلْ الدِّينْ وْعْطِي عْلَى التَّطْهِيرْ دْيَالْكْ دَاكْشِّي اللِّي وْصَّى بِيهْ مُوسَى، بَاشْ يْكُونْ شْهَادَة لِيهُمْ».

⁴⁵وَلَكِنْ هَادَاكْ الرَّاجْلْ خْرَجْ وْبْدَا كَيْخَبّْرْ النَّاسْ بْݣَاعْ دَاكْشِّي اللِّي جْرَا وْدَيّْعْ هَادْ الْخْبَارْ، حْتَّى وْلَّى يَسُوعْ مَا قَادْرْشْ يْدْخَلْ لْشِي مْدِينَة قُدَّامْ النَّاسْ، وْكَيْبْقَى عْلَى بْرَّا فْالْبْلَايْصْ الْخَالْيَة. وْالنَّاسْ كَيْجِيوْ لْعَنْدُه مْنْ كُلّْ جِهَة.