Read Moroccan Standard Translation مَرْقُسْ 10 Bible Online

مَرْقُسْ 10 - Moroccan Standard Translation bible

مَرْقُسْ 10

¹الْفَصْلْ الْعَاشْرْ وْخْرَجْ يَسُوعْ مْنْ تْمَّ وْمْشَى لْجْوَايْهْ الْيَهُودِيَّة اللِّي مْنْ الجِّهَة لْخْرَى دْيَالْ وَادْ الْأُرْدُنْ، وْعَاوْدْ تّْجَمْعُو عْلِيهْ بْزَّافْ دْ الجّْمَاعَاتْ دْ النَّاسْ وْكِمَا الْعَادَة دْيَالُه بْدَا كَيْعَلّْمْهُمْ عَاوْتَانِي.

²وْقَرّْبُو لْعَنْدُه الْفْرِّيسِيِّينْ وْسْوّْلُوهْ بَاشْ يْجَرّْبُوهْ: «وَاشْ حْلَالْ يْطَلّْقْ الرَّاجْلْ مْرَاتُه؟».

³وْهُوَ يْجَاوْبْهُمْ وْݣَالْ: «بْآشْ وْصَّاكُمْ مُوسَى؟»،

⁴وْݣَالُو لِيهْ: «مُوسَى سْمَحْ لْلرَّاجْلْ بَاشْ يْعْطِي لْمْرَاتُه وَرْقَةْ الطّْلَاقْ وْيْصِيفْطْهَا».

⁵وْهُوَ يْݣُولْ لِيهُمْ يَسُوعْ: «رَاهْ عْلَى وْدّْ قْسُوحِيَّةْ قْلُوبْكُمْ كْتَبْ لِيكُمْ مُوسَى هَادْ الْوْصِيَّة،

⁶وَلَكِنْ رَاهْ مْنْ الْبْدُو، مْلِّي خْلَقْ اللَّهْ الدّْنْيَا، خْلَقْ بْنَادْمْ دْكَرْ وْنْتْوَى.

⁷هَادْشِّي عْلَاشْ غَيْخَلِّي الرَّاجْلْ بَّاهْ وْمُّه وْغَيْتَّاحْدْ مْعَ مْرَاتُه،

⁸وْغَيْوَلِّيوْ بْجُوجْ دَاتْ وَحْدَة، يَعْنِي مَا غَيْبْقَاوْشْ جُوجْ وَلَكِنْ غَيْوَلِّيوْ دَاتْ وَحْدَة.

⁹وْاللِّي جْمْعُه اللَّهْ مَا يْقْدَرْشْ يْفَرّْقُه بْنَادْمْ».

¹⁰وْمْلِّي رْجْعُو لْلدَّارْ، عَاوْدُو سْوّْلُوهْ التّْلَامْدْ دْيَالُه عْلَى هَادْ الْقَضِيَّة،

¹¹وْݣَالْ لِيهُمْ يَسُوعْ: «اللِّي طَلّْقْ مْرَاتُه وْتّْزَوّْجْ بْوَحْدَة خْرَى، رَاهْ كَيْفْسَدْ مْعَاهَا،

¹²وْإِلَا طَلّْقَاتْ الْمْرَاة رَاجْلْهَا وْتّْزَوّْجَاتْ بْرَاجْلْ آخُرْ، رَاهَا كَتْفْسَدْ».

¹³وْجَابُو لِيهْ النَّاسْ شِي وْلَادْ صْغَارْ بَاشْ يْحَطّْ يْدِّيهْ عْلِيهُمْ، وَلَكِنْ التّْلَامْدْ خَاصْمُو عْلَى اللِّي جَابُوهُمْ.

¹⁴وْشَافْ يَسُوعْ دَاكْشِّي وْتّْقَلّْقْ وْݣَالْ: «خَلِّيوْ الدّْرَارِي يْجِيوْ لْعَنْدِي وْمَا تْحَبْسُوهُمْشْ، عْلَاحْقَّاشْ بْحَالْ هَادُو اللِّي لِيهُمْ مَمْلَكَةْ اللَّهْ.

¹⁵وْرَانِي نْݣُولْ لِيكُمْ الْحَقّْ: اللِّي مَا كَيْقْبَلْشْ مَمْلَكَةْ اللَّهْ بْحَالْ شِي وَلْدْ صْغِيرْ، عَمّْرُه مَا غَيْدْخَلْ لِيهَا».

¹⁶وْعَنّْقْ يَسُوعْ الدّْرَارِي وْحَطّْ يْدِّيهْ عْلِيهُمْ وْبَارْكْهُمْ.

¹⁷وْمْلِّي خْرَجْ يَسُوعْ لْلطّْرِيقْ، جْرَّى لْعَنْدُه وَاحْدْ الرَّاجْلْ وْطَاحْ قُدَّامُه عْلَى رْكَابِيهْ وْسْوّْلُه: «آ الْمُعَلِّمْ الْمْزْيَانْ، أَشْنُو اللِّي يْمْكَنْ لِي نْدِيرْ بَاشْ نْوْرَتْ الْحَيَاةْ الدَّايْمَة؟».

¹⁸وْجَاوْبُه يَسُوعْ: «عْلَاشْ كَتْݣُولْ لِيَّ آ الْمْزْيَانْ؟ رَاهْ مَا كَايْنْ حْتَّى شِي وَاحْدْ مْزْيَانْ مْنْ غِيرْ اللَّهْ بُوحْدُه.

¹⁹الْوْصِيَّاتْ رَاكْ كَتْعَرْفْهُمْ: مَا تْقْتَلْ، مَا تْفْسَدْ، مَا تْسْرَقْ، مَا تْشْهَدْ بْالزُّورْ، مَا تْغَشّْ، تّْهَلَّى فْبَّاكْ وْمُّكْ».

²⁰وْهُوَ يْݣُولْ لِيهْ الرَّاجْلْ: «آ الْمُعَلِّمْ، رَانِي دْرْتْ بْهَادْ الْوْصِيَّاتْ كُلّْهُمْ مْنْ صُغْرِي».

²¹وْشَافْ فِيهْ يَسُوعْ بْالْمْحَبَّة وْݣَالْ لِيهْ: «نَاقْصَاكْ حَاجَة وَحْدَة: سِيرْ بِيعْ ݣَاعْ دَاكْشِّي اللِّي كَتْمْلَكْ وْعْطِي تَمَنُه لْلْمَسَاكِينْ وْغَيْكُونْ عَنْدْكْ كَنْزْ فْالسّْمَا، وْأَجِي تْبَعْنِي».

²²وْتّْصْدَمْ الرَّاجْلْ مْلِّي سْمَعْ هَادْ الْكْلَامْ وْمْشَى حْزِينْ حِيتْ كَانْ لَبَاسْ عْلِيهْ بْزَّافْ.

²³وْشَافْ يَسُوعْ فْاللِّي ضَايْرِينْ بِيهْ وْݣَالْ لْتْلَامْدُه: «شْحَالْ صْعِيبْ عْلَى النَّاسْ اللِّي لَبَاسْ عْلِيهُمْ يْدَخْلُو لْمَمْلَكَةْ اللَّهْ!».

²⁴وْتّْعَجّْبُو التّْلَامْدْ مْنْ كْلَامُه، وْعَاوْدْ ݣَالْ لِيهُمْ: «آ وْلَادِي، شْحَالْ صْعِيبْ عْلَى الْوَاحْدْ بَاشْ يْدْخَلْ لْمَمْلَكَةْ اللَّهْ.

²⁵رَاهْ دْخُولْ الجّْمَلْ مْنْ عِينْ لِيبْرَة سْهَلْ مْنْ الدّْخُولْ دْيَالْ اللِّي لَبَاسْ عْلِيهْ لْمَمْلَكَةْ اللَّهْ».

²⁶وْتّْعَجّْبُو التّْلَامْدْ بْزَّافْ وْݣَالُو لْبَعْضِيَّاتْهُمْ: «إِيوَا عْلَى هَادْ الْحْسَابْ شْكُونْ اللِّي غَيْقْدَرْ يْنْجَا؟».

²⁷وْشَافْ فِيهُمْ يَسُوعْ وْݣَالْ: «رَاهْ النَّاسْ مَا يْقَدْرُوشْ عْلَى هَادْشِّي، وَلَكِنْ اللَّهْ يْقْدَرْ، حِيتْ اللَّهْ قَادْرْ عْلَى كُلّْشِي».

²⁸وْبْدَا بُطْرُسْ كَيْݣُولْ لِيهْ: «هَا حْنَا خَلِّينَا كُلّْشِي وْتْبَعْنَاكْ».

²⁹وْݣَالْ لِيهْ يَسُوعْ: «نْݣُولْ لِيكُمْ الْحَقّْ، كُلّْ وَاحْدْ سْمَحْ فْدَارُه، وْلَا خُوتُه، وْلَا خْوَاتَاتُه، وْلَا مُّه، وْلَا بَّاهْ، وْلَا وْلَادُه، وْلَا الْأَرَاضِي دْيَالُه عْلَى قْبْلِي وْعْلَى قْبَلْ الْبْشَارَة،

³⁰رَاهْ غَادِي يْتّْرَدّْ لِيهْ فْهَادْ الدّْنْيَا -وَاخَّا غَيْكُونْ التَّعَدُّو- دَاكْشِّي اللِّي سْمَحْ فِيهْ عْلَى مْيَةْ مَرَّة، مْنْ الدّْيُورْ، وْالْخُوتْ، وْالْخْوَاتَاتْ، وْالْمَّاوَاتْ، وْالْوْلَادْ، وْالْأَرَاضِي. وْفْالْآخِرَة غَتْكُونْ لِيهْ الْحَيَاةْ الدَّايْمَة.

³¹رَاهْ بْزَّافْ مْنْ هَادُوكْ اللِّي كَانُو هُمَ اللّْوّْلِينْ غَادِي يْوَلِّيوْ هُمَ اللّْخْرِينْ، وْبْزَّافْ اللِّي كَانُو اللّْخْرِينْ غَادِي يْوَلِّيوْ هُمَ اللّْوّْلِينْ».

³²وْكَانْ يَسُوعْ وْالتّْلَامْدْ دْيَالُه مْسَافْرِينْ لْأُورْشَلِيمْ وْيَسُوعْ قُدَّامْهُمْ، وْكَانُو التّْلَامْدْ حَايْرِينْ، وْالنَّاسْ اللِّي تَابْعِينُه كَانُو خَايْفِينْ. وْجْمَعْ يَسُوعْ مَرَّة خْرَى التّْلَامْدْ الطّْنَاشْ وْبْدَا كَيْخَبّْرْهُمْ عْلَى دَاكْشِّي اللِّي غَادِي يْوْقَعْ لِيهْ،

³³وْݣَالْ لِيهُمْ: «هَا حْنَا طَالْعِينْ لْأُورْشَلِيمْ، وْوَلْدْ الْإِنْسَانْ غَيْسَلّْمُوهْ لْلرُّؤَسَا دْ رْجَالْ الدِّينْ وْالْعُلَمَا دْ الشّْرَعْ، وْغَيْحَكْمُو عْلِيهْ بْالْمُوتْ وْغَيْسَلّْمُوهْ لْلشّْعُوبْ اللِّي مَاشِي يْهُودْ،

³⁴وْغَيْضَحْكُو عْلِيهْ وْغَيْدْفْلُو عْلِيهْ وْغَيْصَوّْطُوهْ وْغَيْقْتْلُوهْ، وْمْنْ بَعْدْ تْلْتْ يَّامْ غَيْتّْبْعَتْ مْنْ الْمُوتْ».

³⁵وْقَرّْبْ يَعْقُوبْ وْيُوحَنَّا وْلَادْ زَبَدِي لْعَنْدْ يَسُوعْ وْݣَالُو لِيهْ: «آ الْمُعَلِّمْ، بْغِينَاكْ تْدِيرْ لِينَا ݣَاعْ دَاكْشِّي اللِّي غَنْطْلْبُوهْ مْنّْكْ».

³⁶وْسْوّْلْهُمْ يَسُوعْ: «آشْ بْغِيتُونِي نْدِيرْ لِيكُمْ؟».

³⁷وْجَاوْبُوهْ: «وَافْقْ لِينَا بَاشْ يْݣْلَسْ وَاحْدْ مْنَّا عْلَى لِيمْنْ دْيَالْكْ وْوَاحْدْ آخْرْ عْلَى لِيسْرْ دْيَالْكْ مْلِّي تْكُونْ فْالْعَزّْ دْيَالْكْ».

³⁸وْݣَالْ لِيهُمْ يَسُوعْ: «رَاكُمْ مَا كَتْعَرْفُوشْ آشْ كَتْطْلْبُو: وَاشْ تْقَدْرُو تْشَرْبُو مْنْ الْكَاسْ اللِّي غَنْشْرَبْ مْنُّه أَنَا، وْلَا وَاشْ تْقَدْرُو تْتْعَمّْدُو بْالْمَعْمُودِيَّة اللِّي غَنْتْعَمّْدْ بِيهَا أَنَا؟».

³⁹وْݣَالُو لِيهْ: «إِيِّهْ نْقَدْرُو!». وْݣَالْ لِيهُمْ: «الْكَاسْ اللِّي غَنْشْرَبْ مْنُّه أَنَا، غَتْشَرْبُو مْنُّه حْتَّى نْتُمَ، وْالْمَعْمُودِيَّة اللِّي غَنْتْعَمّْدْ بِيهَا أَنَا، غَتّْعَمْدُو بِيهَا حْتَّى نْتُمَ.

⁴⁰وَلَكِنْ الْݣْلَاسْ عْلَى لِيمْنْ دْيَالِي وْلَا عْلَى لِيسْرْ دْيَالِي مَاشِي أَنَا اللِّي غَادِي نْعْطِيهْ، وَلَكِنْ غَادِي يْتّْعْطَى لْهَادُوكْ اللِّي وَجّْدُو لِيهُمْ اللَّهْ».

⁴¹وْمْلِّي سْمْعُو التّْلَامْدْ الْعَشْرَة هَادْ الْكْلَامْ، تْقَلّْقُو بْزَّافْ عْلَى يَعْقُوبْ وْيُوحَنَّا.

⁴²وْعَيّْطْ لِيهُمْ يَسُوعْ وْݣَالْ: «كَتْعَرْفُو بْلِّي هَادُوكْ اللِّي كَيْحَسْبُو رَاسْهُمْ الرُّؤَسَا دْ الشّْعُوبْ هُمَ سْيَادْ هَادْ الشّْعُوبْ، وْالْمْسْؤُولِينْ الْكْبَارْ كَيْفَرْضُو السُّلْطَة دْيَالْهُمْ عْلَى كُلّْ وَاحْدْ تَحْتْ مْنّْهُمْ.

⁴³وَلَكِنْ نْتُمَ بِينَاتْكُمْ مَا خَاصّْكُمْشْ تْكُونُو بْحَالْهُمْ، اللِّي بْغَا يْكُونْ كْبِيرْ فِيكُمْ، خَاصُّه يْوَلِّي الْخْدَّامْ دْيَالْكُمْ.

⁴⁴وْاللِّي بْغَا يْكُونْ اللّْوّْلْ فِيكُمْ، خَاصُّه يْوَلِّي الْعَبْدْ دْيَالْ كُلّْشِي.

⁴⁵حِيتْ حْتَّى وَلْدْ الْإِنْسَانْ مَا جَاشْ بَاشْ يْخَدْمُو عْلِيهْ النَّاسْ، وَلَكِنْ جَا بَاشْ يْخْدَمْ وْيْفْدِي بْزَّافْ دْ النَّاسْ بْحْيَاتُه».

⁴⁶وْوْصَلْ يَسُوعْ هُوَ وْالتّْلَامْدْ دْيَالُه لْأَرِيحَا. وْمْلِّي كَانُو خَارْجِينْ مْنّْهَا مْعَ جْمَاعَة كْبِيرَة دْ النَّاسْ، كَانْ وَاحْدْ الْعْمَى سْمِيتُه بَارْتِيمَاوُسْ وَلْدْ تِيمَاوُسْ ݣَالْسْ فْجَنْبْ الطّْرِيقْ كَيْسْعَى.

⁴⁷وْمْلِّي سْمَعْ بْلِّي يَسُوعْ اللِّي مْنْ النَّاصِرَة كَانْ دَايْزْ مْنْ تْمَّ، بْدَا كَيْغَوّْتْ وْكَيْݣُولْ: «آ يَسُوعْ بْنْ دَاوُدْ، رْحَمْنِي!».

⁴⁸وْخَاصْمُو عْلِيهْ بْزَّافْ دْ النَّاسْ بَاشْ يْسْكُتْ، وَلَكِنْ زَادْ كَيْغَوّْتْ كْتَرْ وْكَيْݣُولْ: «آ بْنْ دَاوُدْ، رْحَمْنِي!».

⁴⁹وْوْقَفْ يَسُوعْ وْݣَالْ لِيهُمْ: «عَيْطُو عْلِيهْ!». وْهُمَ يْعَيْطُو عْلَى الْعْمَى وْݣَالُو لِيهْ: «تْشَجّْعْ، نُوضْ! رَاهْ كَيْعَيّْطْ عْلِيكْ!».

⁵⁰وْحَيّْدْ الْعْمَى جْلَّابْتُه وْنَقّْزْ وْجَا لْعَنْدْ يَسُوعْ.

⁵¹وْسْوّْلُه يَسُوعْ: «آشْ بْغِيتِي نْدِيرْ لِيكْ؟»، وْهُوَ يْجَاوْبُه الْعْمَى: «بْغِيتْ نْوَلِّي نْشُوفْ آ سِيدِي!».

⁵²وْݣَالْ لِيهْ يَسُوعْ: «سِيرْ، الْإِيمَانْ دْيَالْكْ هُوَ اللِّي شْفَاكْ». وْفْدِيكْ السَّاعَة بْدَا كَيْشُوفْ مْنْ جْدِيدْ. وْتْبَعْ يَسُوعْ فْالطّْرِيقْ.