Read Moroccan Standard Translation مَرْقُسْ 11 Bible Online

مَرْقُسْ 11 - Moroccan Standard Translation bible

مَرْقُسْ 11

¹الْفَصْلْ حْضَاشْ وْمْلِّي قَرّْبُو لْأُورْشَلِيمْ جِهْةْ دُوَّارْ بَيْتْ فَاجِي وْدُوَّارْ بَيْتْ عَنْيَا، اللِّي حْدَا جْبَلْ الزِّيتُونْ، صِيفْطْ يَسُوعْ جُوجْ مْنْ التّْلَامْدْ دْيَالُه

²وْݣَالْ لِيهُمْ: «سِيرُو لْلدُّوَّارْ اللِّي كَايْنْ قُدَّامْكُمْ، وْغِيرْ غَتْدَخْلُو لِيهْ رَاكُمْ غَتْلْقَاوْ وَاحْدْ الدّْحْشْ مْرْبُوطْ عَمّْرْ شِي حَدّْ مَا رْكَبْ عْلِيهْ، حْلُّو الرّْبَاطْ دْيَالُه وْجِيبُوهْ.

³وْإِلَا ݣَالْ لِيكُمْ شِي وَاحْدْ: عْلَاشْ كَتْدِيرُو هَكَّا؟ ݣُولُو لِيهْ: رَاهْ الرَّبّْ مْحْتَاجْ لِيهْ وْرَاهْ غَيْرَدُّه دْغْيَا لّْهْنَا».

⁴وْمْشَاوْ وْلْقَاوْ الدّْحْشْ مْرْبُوطْ حْدَا وَاحْدْ الْبَابْ عْلَى الطّْرِيقْ، وْهُمَ يْحَلُّو لِيهْ الرّْبَاطْ.

⁵وْسْوّْلُوهُمْ شِي وْحْدِينْ كَانُو تْمَّ: «عْلَاشْ كَتْحَلُّو الرّْبَاطْ دْيَالْ الدّْحْشْ؟».

⁶وْجَاوْبُوهُمْ كِمَا وْصَّاهُمْ يَسُوعْ. وْخْلَّاوْهُمْ يَاخْدُوهْ.

⁷وْجَابُو التّْلَامْدْ الدّْحْشْ لْيَسُوعْ، وْحَطُّو عْلِيهْ حْوَايْجْهُمْ وْهُوَ يْرْكَبْ عْلِيهْ.

⁸وْفَرّْشُو بْزَّافْ دْ النَّاسْ حْوَايْجْهُمْ فْالطّْرِيقْ، وْوْحْدِينْ خْرِينْ قَطّْعُو الْعْرُوشْ دْ الشّْجَرْ مْنْ الْفْدَادْنْ.

⁹وْهَادُوكْ اللِّي سَابْقِينْ يَسُوعْ وْاللِّي تَابْعِينُه كَانُو كَيْغَوّْتُو وْكَيْݣُولُو: «الْعَزّْ لْلَّهْ! مْبْرُوكْ هَادَاكْ اللِّي جَايْ بْإِسْمْ الرَّبّْ!

¹⁰مْبَارْكَة مَمْلَكَةْ بُونَا دَاوُدْ اللِّي جَايَّة. الْعَزّْ لْلَّهْ فْالسّْمَا الْعَالْيَة!».

¹¹وْمْلِّي وْصَلْ يَسُوعْ لْأُورْشَلِيمْ دْخَلْ لْبِيتْ اللَّهْ، وْشَافْ فْݣَاعْ اللِّي ضَايْرْ بِيهْ، وْمْلِّي لْقَا الْحَالْ فَاتْ، خْرَجْ لْبَيْتْ عَنْيَا مْعَ تْلَامْدُه الطّْنَاشْ.

¹²وْفْالصّْبَاحْ مْلِّي خَرْجُو مْنْ بَيْتْ عَنْيَا جَاهْ الجُّوعْ،

¹³وْهُوَ يْشُوفْ مْنْ بْعِيدْ وَاحْدْ الْكَرْمَة عَامْرَة بْالْوْرَاقْ، وْمْشَى يْشُوفْ وَاشْ غَيْلْقَا فِيهَا شِي حَاجَة. وْمْلِّي قَرّْبْ لِيهَا، لْقَا غِيرْ الْوْرَاقْ، حِيتْ وَقْتْ الْكَرْمُوسْ مَازَالْ مَا وْصَلْ.

¹⁴وْݣَالْ لِيهَا يَسُوعْ: «عَمّْرْ شِي وَاحْدْ مَا يْعَاوْدْ يَاكُلْ غَلّْتْكْ عْلَى الدّْوَامْ». وْكَانُو التّْلَامْدْ دْيَالُه كَيْسَمْعُوهْ.

¹⁵وْوَصْلُو لْأُورْشَلِيمْ، وْدْخَلْ يَسُوعْ لْبِيتْ اللَّهْ وْبْدَا كَيْجَرِّي عْلَى هَادُوكْ اللِّي كَيْبِيعُو وْيْشْرِيوْ تْمَّ، وْقْلَبْ الطّْبَالِي دْيَالْ اللِّي كَيْصَرّْفُو الْفْلُوسْ وْالْكْرَاسَى دْيَالْ بِيَّاعِينْ الْحْمَامْ،

¹⁶وْمَا خْلَّا حَدّْ مْنْ هَادُوكْ اللِّي كَيْهَزُّو السّْلْعَة يْدُوزُو مْنْ بِيتْ اللَّهْ.

¹⁷وْبْدَا كَيْعَلّْمْ النَّاسْ وْكَيْݣُولْ: «وَاشْ مَا مْكْتُوبْشْ فْكْتَابْ اللَّهْ: الدَّارْ دْيَالِي غَادِي تّْسَمَّى دَارْ لْلصّْلَاة لْݣَاعْ الشّْعُوبْ؟ وَلَكِنْ نْتُمَ رْدِّيتُوهَا غَارْ دْيَالْ الشّْفَارَا!».

¹⁸وْالرُّؤَسَا دْ رْجَالْ الدِّينْ وْالْعُلَمَا دْ الشّْرَعْ سَاقُو الْخْبَارْ، وْبْدَاوْ كَيْقَلّْبُو كِيفَاشْ يْقْتْلُوهْ، وَلَكِنْ كَانُو خَايْفِينْ مْنُّه عْلَاحْقَّاشْ النَّاسْ كَامْلِينْ تْبَهْضُو مْنْ التَّعْلِيمْ دْيَالُه.

¹⁹وْفْالْعْشِيَّة خْرَجْ يَسُوعْ وْالتّْلَامْدْ دْيَالُه مْنْ الْمْدِينَة.

²⁰وْفْالصّْبَاحْ بْكْرِي، مْلِّي كَانُو دَايْزِينْ فْالطّْرِيقْ شَافُو الْكَرْمَة يْبْسَاتْ مْنْ الجّْدَرْ دْيَالْهَا.

²¹وْتّْفَكّْرْ بُطْرُسْ دَاكْشِّي اللِّي جْرَا، وْݣَالْ لْيَسُوعْ: «شُوفْ آ سِيدِي، رَاهْ الْكَرْمَة اللِّي لْعَنْتِيهَا يْبْسَاتْ».

²²وْهُوَ يْجَاوْبْهُمْ يَسُوعْ وْݣَالْ: «خَاصّْكُمْ تْآمْنُو بْاللَّهْ.

²³وْنْݣُولْ لِيكُمْ الْحَقّْ: اللِّي ݣَالْ لْهَادْ الجّْبَلْ: يْتْحَرّْكْ وْيْتْلَاحْ فْالْبْحَرْ وْمَا شْكّْشْ فْقَلْبُه وْآمْنْ بْلِّي دَاكْشِّي اللِّي ݣَالْ غَادِي يْطْرَا، رَاهْ غَادِي يْكُونْ لِيهْ.

²⁴وْعْلَى هَادْشِّي كَنْݣُولْ لِيكُمْ: ݣَاعْ اللِّي كَتْطْلْبُوهْ فْالصّْلَاة، آمْنُو بْلِّي خْدِيتُوهْ وْغَيْكُونْ لِيكُمْ.

²⁵وْمْلِّي تْوَقْفُو بَاشْ تْصَلِّيوْ، غْفْرُو لْلنَّاسْ إِلَا بِينْكُمْ وْبِينْهُمْ شِي حَاجَة، بَاشْ حْتَّى بَّاكُمْ اللِّي فْالسّْمَا يْغْفَرْ لِيكُمْ دْنُوبْكُمْ». [

²⁶وْإِلَا مَا غْفَرْتُوشْ لْلنَّاسْ الْغَلْطَاتْ دْيَالْهُمْ، حْتَّى نْتُمَ مَا غَيْغْفَرْشْ لِيكُمْ بَّاكُمْ اللِّي فْالسّْمَا الْغَلْطَاتْ دْيَالْكُمْ.][٤]

²⁷وْرْجْعُو لْأُورْشَلِيمْ عَاوْتَانِي. وْمْلِّي كَانْ يَسُوعْ كَيْمْشِي فْبِيتْ اللَّهْ، جَاوْ لْعَنْدُه الرُّؤَسَا دْ رْجَالْ الدِّينْ وْالْعُلَمَا دْ الشّْرَعْ وْالشّْيُوخْ،

²⁸وْݣَالُو لِيهْ: «بْآشْ مْنْ سُلْطَة كَتْدِيرْ هَادْ الْأُمُورْ؟ وْشْكُونْ اللِّي عْطَاكْ هَادْ السُّلْطَة بْآشْ تْدِيرْهُمْ؟».

²⁹وَلَكِنْ يَسُوعْ جَاوْبْهُمْ وْݣَالْ: «حْتَّى أَنَا بْغِيتْ نْسْوّْلْكُمْ سُؤَالْ وَاحْدْ. جَاوْبُونِي، وْنْݣُولْ لِيكُمْ بْآشْ مْنْ سُلْطَة كَنْدِيرْ هَادْشِّي:

³⁰مْنِينْ جَاتْ الْمَعْمُودِيَّة دْيَالْ يُوحَنَّا؟ وَاشْ مْنْ اللَّهْ وْلَا مْنْ النَّاسْ؟ إِيوَا جَاوْبُونِي!».

³¹وْبْدَاوْ كَيْتّْشَاوْرُو مْعَ بْعْضِيَّاتْهُمْ وْݣَالُو: «إِلَا ݣْلْنَا جَاتْ مْنْ اللَّهْ، غَادِي يْݣُولْ لِينَا: عْلَاشْ مَا آمْنْتُوشْ بْيُوحَنَّا؟

³²إِيوَا وَاشْ نْݣُولُو بْاللِّي جَاتْ مْنْ عَنْدْ النَّاسْ؟» -وَلَكِنْ كَانُو خَايْفِينْ مْنْ الجّْمَاعَة دْ النَّاسْ، حِيتْ كُلّْهُمْ كَانُو مْتْأَكّْدِينْ بْلِّي يُوحَنَّا نْبِي-

³³وْهُمَ يْجَاوْبُو يَسُوعْ وْݣَالُو لِيهْ: «مَا كَنْعَرْفُوشْ!»، وْݣَالْ لِيهُمْ: «حْتَّى أَنَا مَا نْݣُولْشْ لِيكُمْ بْآشْ مْنْ سُلْطَة كَنْدِيرْ هَادْشِّي».