Read Moroccan Standard Translation مَرْقُسْ 12 Bible Online

مَرْقُسْ 12 - Moroccan Standard Translation bible

مَرْقُسْ 12

¹الْفَصْلْ طْنَاشْ وْبْدَا يَسُوعْ كَيْتّْكَلّْمْ مْعَاهُمْ بْالْمْتُولْ وْݣَالْ: «هَادَا وَاحْدْ الرَّاجْلْ غْرَسْ جْنَانْ دْ الْعْنَبْ، وْضَوّْرْ بِيهْ الْحِيطْ، وْحْفَرْ فِيهْ مْعَصْرَة وْبْنَى بَرْجْ لْلْعْسَّة، وْكْرَاهْ لْشِي جْنَايْنِيَّة وْسَافْرْ.

²وْمْلِّي وْصَلْ الْوَقْتْ فَاشْ كَيْتّْجْنَى الْعْنَبْ، صِيفْطْ لِيهُمْ وَاحْدْ الْعَبْدْ بَاشْ يَاخُدْ الْغْلَّة دْ الْعْنَبْ.

³وْنَاضُو الجّْنَايْنِيَّة وْقْبْضُو الْعَبْدْ وْضْرْبُوهْ وْرْجّْعُوهْ بْيْدِّيهْ خَاوْيِينْ.

⁴وْعَاوْدْ صِيفْطْ لِيهُمْ عَبْدْ آخُرْ، وْضْرْبُوهْ عْلَى رَاسُه وْعَايْرُوهْ.

⁵وْعَاوْدْ صِيفْطْ لِيهُمْ عَبْدْ آخُرْ، وْهُمَ يْقْتْلُوهْ. وْمْنْ بَعْدْ صِيفْطْ لِيهُمْ وْحْدِينْ خْرِينْ كْتَارْ، شِي مْنّْهُمْ ضْرْبُوهُمْ وْالْخْرِينْ قْتْلُوهُمْ.

⁶وْبْقَى لِيهْ غِيرْ وَلْدُه الْعْزِيزْ، وْفْاللّْخْرْ صِيفْطُه لِيهُمْ وْݣَالْ: غَادِي يْحْتَرْمُو وْلْدِي.

⁷وَلَكِنْ هَادُوكْ الجّْنَايْنِيَّة ݣَالُو بِينَاتْهُمْ: هَا هُوَ اللِّي غَادِي يْوْرَتْ! يَالَّاهُو نْقْتْلُوهْ بَاشْ يْوَلِّي الْوَرْتْ دْيَالْنَا.

⁸وْهُمَ يْشَدُّوهْ وْقْتْلُوهْ وْخَرّْجُوهْ عْلَى بْرَّا دْ الجّْنَانْ».

⁹وْݣَالْ لِيهُمْ يَسُوعْ: «إِيوَا آشْ غَيْدِيرْ مُولْ الجّْنَانْ دْ الْعْنَبْ؟ رَاهْ غَادِي يْجِي وْيْقْتَلْ هَادُوكْ الجّْنَايْنِيَّة، وْغَادِي يْعْطِي الجّْنَانْ دْ الْعْنَبْ لْجْنَايْنِيَّة خْرِينْ.

¹⁰وَاشْ مَا قْرِيتُوشْ فْكْتَابْ اللَّهْ: الْحَجْرَة اللِّي مَا بْغَاوْهَاشْ الْبْنَّايَا، هِيَ اللِّي وْلَّاتْ حَجْرَةْ السَّاسْ؟

¹¹هَادْشِّي جَا مْنْ عَنْدْ الرَّبّْ، وْهُوَ عْجِيبْ فْنَضَرْنَا!».

¹²وْفْهْمُو الرُّؤَسَا دْ رْجَالْ الدِّينْ وْالْعُلَمَا دْ الشّْرَعْ وْالشّْيُوخْ بْلِّي الْمْتَالْ كَانْ عْلِيهُمْ، دَاكْشِّي عْلَاشْ بْدَاوْ كَيْقَلّْبُو كِيفَاشْ يْشَدُّو يَسُوعْ. وَلَكِنْ كَانُو خَايْفِينْ مْنْ الجّْمَاعَة دْ النَّاسْ، وْخْلَّاوْهْ، وْمْشَاوْ بْحَالْهُمْ.

¹³وْصِيفْطُو لْيَسُوعْ شِي رْجَالْ مْنْ الْفْرِّيسِيِّينْ وْالْهِيرُودُسِيِّينْ، بَاشْ يْشَدُّو عْلِيهْ شِي غَلْطَة فْكْلَامُه.

¹⁴وْجَاوْ لْعَنْدُه وْݣَالُو لِيهْ: «آ سِيدِي، كَنْعَرْفُو بْلِّي رَاكْ صَادْقْ، مَا كَيْهَمّْكْشْ بْنَادْمْ كِمَا كَانْ شَانُه، وْمَا كَتْدِيرْشْ الْوْجْهِيَّاتْ، وَلَكِنْ كَتْعَلّْمْ طْرِيقْ اللَّهْ بْالْحَقّْ. وَاشْ حْلَالْ نْخَلّْصُو الضَّرِيبَة لْلْقَيْصَرْ وْلَا لَّا؟».

¹⁵وْعْرَفْ يَسُوعْ النِّفَاقْ دْيَالْهُمْ وْݣَالْ لِيهُمْ: «عْلَاشْ كَتْجَرّْبُونِي؟ جِيبُو لِيَّ وَاحْدْ الدِّينَارْ بَاشْ نْشُوفُه».

¹⁶وْجَابُوهْ لِيهْ، وْݣَالْ لِيهُمْ: «هَادْ التّْصْوِيرَة وْهَادْ الْكْتْبَة اللِّي فْالْفْلُوسْ دْيَالْ مْنْ؟»، وْݣَالُو لِيهْ: «دْيَالْ قَيْصَرْ».

¹⁷وْݣَالْ لِيهُمْ: «إِيوَا اللِّي هُوَ دْيَالْ قَيْصَرْ عْطِيوْهْ لْقَيْصَرْ وْاللِّي هُوَ دْيَالْ اللَّهْ عْطِيوْهْ لْلَّهْ!». وْتّْعَجّْبُو مْنْ كْلَامُه.

¹⁸وْجَاوْ لْعَنْدْ يَسُوعْ شِي وْحْدِينْ مْنْ الصّْدُّوقِيِّينْ اللِّي كَيْنَكْرُو بْلِّي الْمُوتَى كَيْتّْبَعْتُو، وْسْوّْلُوهْ وْݣَالُو لِيهْ:

¹⁹«آ سِيدِي، مُوسَى كْتَبْ لِينَا: إِلَا شِي وَاحْدْ مَاتْ وْخْلَّا مْرَاتُه بْلَا وْلَادْ، خَاصّْ خُوهْ يْتّْزَوّْجْ بِيهَا بَاشْ يْدِيرْ وْلَادْ عْلَى سْمِيّْةْ خُوهْ.

²⁰وْكَانُو سْبْعَة دْيَالْ الْخُوتْ، تّْزَوّْجْ اللّْوّْلْ بْوَاحْدْ الْمْرَاة وْمَاتْ، وْمَا خْلَّاشْ الْوْلَادْ.

²¹وْتّْزَوّْجْ بِيهَا التَّانِي، وْمَا وْلَدْشْ مْعَاهَا وْمَاتْ. وْالتَّالْتْ حْتَّى هُوَ.

²²وْهَكَّا تّْزَوّْجُو بِيهَا الْخُوتْ بْسَبْعَة، وْحْتَّى وَاحْدْ فِيهُمْ مَا خْلَّا وْلَادْ. وْفْاللّْخْرْ مْنْ بَعْدْمَا مَاتُو كُلّْهُمْ مَاتْتْ الْمْرَاة حْتَّى هِيَ.

²³إِيوَا، فْيُومْ الْبَعْتْ، مْلِّي غَيْتّْبَعْتُو مْنْ الْمُوتْ، لَمّْنْ فِيهُمْ غَادِي تْكُونْ هَادْ الْمْرَاة؟ حِيتْ كَانْتْ مْزَوّْجَة بِيهُمْ بْسَبْعَة».

²⁴وْݣَالْ لِيهُمْ يَسُوعْ: «نْتُمَ رَاكُمْ غَالْطِينْ حِيتْ مَا كَتْعَرْفُو لَا كْتَابْ اللَّهْ وَلَا قُوَّةْ اللَّهْ.

²⁵عْلَاحْقَّاشْ مْلِّي غَيْتّْبَعْتُو النَّاسْ مْنْ الْمُوتْ رَاهْ مَا غَيْتّْزَوّْجُوشْ وْمَا غَيْزَوّْجُوهُمْشْ، وَلَكِنْ غَيْعِيشُو بْحَالْ الْمَلَايْكَة فْالسَّمَاوَاتْ.

²⁶أَمَّا مْنْ جِهْةْ الْمُوتَى اللِّي غَيْتّْبَعْتُو مْنْ الْمُوتْ، وَاشْ مَا قْرِيتُوشْ فْالْكْتَابْ دْيَالْ مُوسَى الْقْصَّة دْ السّْدْرَة مْلِّي ݣَالْ لِيهْ اللَّهْ: أَنَا هُوَ إِلَاهْ إِبْرَاهِيمْ، وْإِلَاهْ إِسْحَاقْ، وْإِلَاهْ يَعْقُوبْ؟

²⁷رَاهْ هُوَ مَاشِي إِلَاهْ الْمُوتَى، وَلَكِنْ إِلَاهْ الْحَيِّينْ. نْتُمَ رَاكُمْ غَالْطِينْ بْزَّافْ!».

²⁸وْجَا وَاحْدْ الْعَالِمْ دْ الشّْرَعْ وْسْمَعْهُمْ كَيْتّْنَاقْشُو. وْشَافْ بْلِّي يَسُوعْ كَيْجَاوْبْهُمْ مْزْيَانْ، وْهُوَ يْسْوّْلُه: «أَشْنُو هِيَ الْوْصِيَّة اللّْوّْلَى فْݣَاعْ الْوْصِيَّاتْ؟».

²⁹وْجَاوْبُه يَسُوعْ: «الْوْصِيَّة اللّْوّْلَى هِيَ: سْمَعْ آ شَعْبْ إِسْرَائِيلْ، رَاهْ الرَّبّْ إِلَاهْنَا هُوَ رَبّْ وَاحْدْ.

³⁰تْبْغِي الرَّبّْ إِلَاهْكْ مْنْ قَلْبَكْ كُلُّه، وْمْنْ نْفْسَكْ كُلّْهَا، وْمْنْ عَقْلَكْ كُلُّه، وْمْنْ قُوّْتْكْ كُلّْهَا.

³¹وْالْوْصِيَّة التَّانْيَة هِيَ: تْبْغِي اللِّي قْرِيبْ لِيكْ كِيفْ كَتْبْغِي رَاسْكْ. مَا كَايْنْ حْتَّى شِي وْصِيَّة خْرَى مُهِمَّة كْتَرْ مْنْ هَادُو».

³²وْݣَالْ لِيهْ الْعَالِمْ دْ الشّْرَعْ: «مْزْيَانْ آ الْمُعَلِّمْ! عَنْدْكْ الْحَقّْ. رَاهْ اللَّهْ وَاحْدْ، وْمَا كَايْنْ حْتَّى وَاحْدْ آخُرْ مْنْ غِيرُه،

³³وْخَاصّْ الْوَاحْدْ يْبْغِي اللَّهْ مْنْ قَلْبُه كُلُّه، وْمْنْ عَقْلُه كُلُّه، وْمْنْ قُوّْتُه كُلّْهَا، وْخَاصُّه يْبْغِي اللِّي قْرِيبْ لِيهْ كِيفْ كَيْبْغِي رَاسُه، هَادْ الْوْصِيَّاتْ مُهِمِّينْ كْتَرْ مْنْ ݣَاعْ الدّْبَايْحْ اللِّي كَتّْحْرَقْ لْلَّهْ وْالتَّقْدِمَاتْ».

³⁴وْمْلِّي شَافْ يَسُوعْ بْلِّي الرَّاجْلْ جَاوْبُه بْالْحْكْمَة ݣَالْ لِيهْ: «نْتَ رَاكْ مَاشِي بْعِيدْ عْلَى مَمْلَكَةْ اللَّهْ». وْمَا زْعَمْ حْتَّى وَاحْدْ يْعَاوْدْ يْسْوّْلُه أَسْئِلَة خْرَى.

³⁵وْمْلِّي كَانْ يَسُوعْ كَيْعَلّْمْ فْبِيتْ اللَّهْ سْوّْلْهُمْ: «كِيفَاشْ كَيْݣُولُو الْعُلَمَا دْ الشّْرَعْ بْلِّي الْمَسِيحْ هُوَ وَلْدْ دَاوُدْ؟

³⁶حِيتْ دَاوُدْ بْرَاسُه مْلِّي وْحَى لِيهْ الرُّوحْ الْقُدُسْ ݣَالْ: ݣَالْ الرَّبّْ لْرَبِّي: ݣْلَسْ عْلَى لِيمْنْ دْيَالِي حْتَّى نْدِيرْ عْدْيَانْكْ تَحْتْ رْجْلِيكْ.

³⁷رَاهْ دَاوُدْ بْرَاسُه كَيْعَيّْطْ لْلْمَسِيحْ رْبِّي، إِيوَا كِيفَاشْ غَيْكُونْ الْمَسِيحْ وَلْدُه؟». وْكَانُو الجّْمَاعَاتْ دْ النَّاسْ كَيْسَمْعُو لْيَسُوعْ وْهُمَ فْرْحَانِينْ.

³⁸وْزَادْ كَيْعَلّْمْهُمْ وْݣَالْ: «رْدُّو بَالْكُمْ مْنْ الْعُلَمَا دْ الشّْرَعْ! رَاهْ كَيْبْغِيوْ يْتّْسَارَاوْ بْالسّْلَاهْمْ وْكَيْبْغِيوْ يْسَلّْمُو عْلِيهُمْ النَّاسْ فْالسّْوَاقْ،

³⁹وْكَيْبْغِيوْ يْكُونُو فْالْبْلَايْصْ اللّْوّْلِينْ فْدْيُورْ الصّْلَاة، وْيْݣَلْسُو فْالْبْلَايْصْ الْمْخَيّْرِينْ فْالْحَفَلَاتْ.

⁴⁰وْكَيَاكْلُو رْزَقْ الْهْجَّالَاتْ، وْكَيْطَوّْلُو فْصْلَاتْهُمْ غِيرْ بَاشْ يْبَانُو. هَادُو غَيْتّْعَاقْبُو بْزَّافْ».

⁴¹وْݣْلَسْ يَسُوعْ فْبِيتْ اللَّهْ قُدَّامْ صْنْدُوقْ التَّقْدِمَاتْ، كَيْشُوفْ فْالنَّاسْ وْهُمَ كَيْحَطُّو فِيهْ الْفْلُوسْ. وْكَانُو بْزَّافْ دْ النَّاسْ اللِّي لَبَاسْ عْلِيهُمْ كَيْحَطُّو فْلُوسْ كْتِيرَة.

⁴²وْجَاتْ وَاحْدْ الْمْرَاة هْجَّالَة مَا فْحَالْهَاشْ، وْحْطَّاتْ غِيرْ جُوجْ شْقْفَاتْ دْيَالْ الْفْلُوسْ اللِّي هِيَ جُوجْ رْيَالَاتْ.

⁴³وْعَيّْطْ يَسُوعْ عْلَى التّْلَامْدْ دْيَالُه وْݣَالْ لِيهُمْ: «نْݣُولْ لِيكُمْ الْحَقّْ: هَادْ الْهْجَّالَة اللِّي مَا فْحَالْهَاشْ حْطَّاتْ كْتَرْ مْنْ دَاكْشِّي اللِّي حَطُّو ݣَاعْ النَّاسْ فْالصّْنْدُوقْ.

⁴⁴عْلَاحْقَّاشْ هُمَ حَطُّو مْنْ دَاكْشِّي اللِّي شَايْطْ عْلِيهُمْ، وَلَكِنْ هِيَ وَاخَّا مَا فْحَالْهَاشْ حْطَّاتْ ݣَاعْ دَاكْشِّي اللِّي عَنْدْهَا وْاللِّي بِيهْ كَتْعِيشْ».