Read Moroccan Standard Translation مَرْقُسْ 13 Bible Online

مَرْقُسْ 13 - Moroccan Standard Translation bible

مَرْقُسْ 13

¹الْفَصْلْ تْلْطَاشْ وْمْلِّي خْرَجْ يَسُوعْ مْنْ بِيتْ اللَّهْ، ݣَالْ لِيهْ وَاحْدْ مْنْ التّْلَامْدْ دْيَالُه: «آ سِيدِي، شُوفْ شْحَالْ كْبِيرْ هَادْ الْحْجَرْ، وْشْحَالْ كْبِيرْ هَادْ الْبْنِي!».

²وْهُوَ يْجَاوْبُه يَسُوعْ: «يَاكْ كَتْشُوفْ هَادْ الْبْنِي الْكْبِيرْ؟ رَاهْ حْتَّى حَجْرَة مْنُّه مَا غَتْبْقَى فْبْلَاصْتْهَا، كُلّْشِي غَيْرِيبْ».

³وْمْلِّي كَانْ يَسُوعْ ݣَالْسْ فْجْبَلْ الزِّيتُونْ مْقَابْلْ مْعَ بِيتْ اللَّهْ، سْوّْلُه بُطْرُسْ وْيَعْقُوبْ وْيُوحَنَّا وْأَنْدْرَاوُسْ بِينْهُمْ وْبِينُه:

⁴«ݣُولْ لِينَا إِيمْتَى غَيْوْقَعْ هَادْشِّي؟ وْأَشْنُو هِيَ الْعَلَامَة اللِّي غَتْبَيّْنْ بْلِّي هَادْشِّي كُلُّه قَرّْبْ يْوْقَعْ؟».

⁵وْجَاوْبْهُمْ يَسُوعْ وْبْدَا كَيْݣُولْ لِيهُمْ: «رْدُّو بَالْكُمْ لَيْغَلّْطْكُمْ شِي حَدّْ.

⁶حِيتْ غَيْجِيوْ بْزَّافْ دْ النَّاسْ وْغَيَاخْدُو الْإِسْمْ دْيَالِي وْغَيْݣُولُو: أَنَا هُوَ! وْغَيْغَلّْطُو نَاسْ كْتَارْ.

⁷مَا تّْخَلْعُوشْ مْلِّي تْسَمْعُو عْلَى الْحَرْبْ وْعْلَى خْبَارْ الْحَرْبْ، حِيتْ هَادْشِّي كُلُّه لَابْدَّ يْوْقَعْ، وَلَكِنْ مَا غَادِيشْ يْكُونْ هَادَا هُوَ اللّْخْرْ دْ الزّْمَانْ.

⁸غَادِي يْهْجَمْ شَعْبْ عْلَى شَعْبْ وْمَمْلَكَة عْلَى مَمْلَكَة، وْغَيْضْرَبْ الزّْلْزَالْ فْبْلَايْصْ كْتَارْ، وْغَيْجِي الجُّوعْ، وْهَادْشِّي كُلُّه غِيرْ الْبْدُو دْيَالْ الْوْجَعْ.

⁹وْنْتُمَ رْدُّو بَالْكُمْ: رَاهْ غَيْسَلّْمُوكُمْ لْلْمَحَاكِمْ، وْغَيْضَرْبُوكُمْ فْدْيُورْ الصّْلَاة، وْغَتْوَقْفُو قُدَّامْ الْحُكَّامْ وْالْمُلُوكْ عْلَى قْبْلِي بَاشْ تْشَهْدُو لِيَّ قُدَّامْهُمْ،

¹⁰وْرَاهْ خَاصّْ فْاللّْوّْلْ يْتْخَبّْرُو الشّْعُوبْ كُلّْهُمْ بْالْبْشَارَة.

¹¹وْمْلِّي يْشَدُّوكُمْ بَاشْ يْسَلّْمُوكُمْ لْلْمَحْكَمَة، مَا تْرَفْدُوشْ الْهَمّْ لْدَاكْشِّي اللِّي غَتْݣُولُو، وَلَكِنْ جَاوْبُو بْالْكْلَامْ اللِّي غَيْعْطِيكُمْ اللَّهْ فْدَاكْ الْوَقْتْ، عْلَاحْقَّاشْ الرُّوحْ الْقُدُسْ هُوَ اللِّي غَيْتّْكَلّْمْ فِيكُمْ مَاشِي نْتُمَ.

¹²الْخُو غَيْسَلّْمْ خُوهْ بَاشْ يْتّْقْتَلْ، وْالْبُو غَيْسَلّْمْ وَلْدُه بَاشْ يْتّْقْتَلْ، وْالْوْلَادْ غَيْنُوضُو ضْدّْ وَالِدِيهُمْ وْغَيْقْتْلُوهُمْ،

¹³وْغَيْكَرْهُوكُمْ ݣَاعْ النَّاسْ عْلَى وْدّْ الْإِسْمْ دْيَالِي. وَلَكِنْ اللِّي بْقَى تَابْتْ حْتَّى لْلّْخْرْ غَيْنْجَا».

¹⁴«وْمْلِّي تْشُوفُو النَّجَاسَة دْيَالْ الْخَرَابْ فْالْبْلَاصَة فِينْ مَا خَاصّْهَاشْ تْكُونْ -اللِّي كَيْقْرَا هَادْشِّي يْفْهَمْ!- دِيكْ السَّاعَة اللِّي فْبْلَادْ الْيَهُودِيَّة يْهَرْبُو لْلجّْبَالْ،

¹⁵وْاللِّي فُوقْ السّْطَحْ[٥]، مَا يْنْزَلْشْ وَلَا يْدْخَلْ لْدَارُه بَاشْ يَاخُدْ دَاكْشِّي اللِّي فِيهَا.

¹⁶وْاللِّي فْالْفْدَّانْ، مَا خَاصُّوشْ يْرْجَعْ لْدَارُه بَاشْ يْدِّي لْبَاسُه!

¹⁷يَا وِيلْ الْعْيَالَاتْ الْحَامْلَاتْ وْاللِّي كَيْرَضّْعُو فْدِيكْ لِيَّامْ!

¹⁸وْصَلِّيوْ لْلَّهْ بَاشْ مَا يْوْقَعْشْ هَادْشِّي فْالشّْتْوَة،

¹⁹حِيتْ فْدِيكْ لِيَّامْ غَتْكُونْ وَاحْدْ الْمْحْنَة عَمّْرْ مَا كَانْتْ بْحَالْهَا مْنْ النّْهَارْ اللِّي خْلَقْ اللَّهْ الدّْنْيَا حْتَّى لْدَابَا، وْعَمّْرْهَا مَا غَتْعَاوْدْ تْكُونْ.

²⁰وْإِلَا مَا قَصّْرْشْ الرَّبّْ مْنْ دِيكْ لِيَّامْ، رَاهْ حْتَّى وَاحْدْ مَا غَيْنْجَا. وَلَكِنْ عْلَى وْدّْ النَّاسْ دْيَالُه اللِّي خْتَارْهُمْ هُوَ، رَاهْ قَصّْرْ مْنْ دِيكْ لِيَّامْ.

²¹وْرَاهْ إِلَا ݣَالْ لِيكُمْ شِي وَاحْدْ: هَا الْمَسِيحْ هْنَا! وْلَا: رَاهْ هُوَ تْمَّ! مَا تِّيقُوشْ بِيهْ.

²²حِيتْ غَادِي يْجِيوْ نَاسْ اللِّي غَيْكَدْبُو وْغَيْݣُولُو بْلِّي هُمَ الْمَسِيحْ وْغَيْجِيوْ أَنْبِيَا كْدَّابِينْ، غَيْدِيرُو عَلَامَاتْ وْعْجَايْبْ، بَاشْ يْوَضّْرُو إِلَا قَدْرُو حْتَّى النَّاسْ اللِّي خْتَارْهُمْ اللَّهْ.

²³إِيوَا رْدُّو بَالْكُمْ نْتُمَ. هَانِي خَبّْرْتْكُمْ بْكُلّْشِي قْبَلْ مَا يْوْقَعْ».

²⁴«وَلَكِنْ فْدِيكْ لِيَّامْ، مْنْ بَعْدْ دِيكْ الْمْحْنَة، غَتْضْلَامْ الشّْمْسْ وْالْقَمَرْ مَا غَيْضَوِّيشْ.

²⁵وْغَيْطِيحُو نْجُومْ السّْمَا وْالْقُوَّاتْ اللِّي فْالسّْمَا غَيْتّْزَعْزْعُو.

²⁶وْفْدِيكْ السَّاعَة، غَيْشُوفُو النَّاسْ وَلْدْ الْإِنْسَانْ جَايْ فْالسّْحَابْ بْقُوَّة كْبِيرَة وْبْالْعَزّْ.

²⁷وْغَيْصِيفْطْ دْغْيَا الْمَلَايْكَة دْيَالُه بَاشْ يْجَمْعُو اللِّي تّْخْتَارُو لِيهْ مْنْ الشَّرْقْ حْتَّى لْلْغَرْبْ، وْمْنْ الشَّمَالْ حْتَّى لْلْجَنُوبْ، مْنْ الدّْنْيَا كُلّْهَا».

²⁸«تْعَلّْمُو مْنْ الْكَرْمَة هَادْشِّي: مْلِّي كَيْخْضَارُو الْعْرُوشْ وْكَيْخَرّْجُو الْوْرَاقْ، كَتْعَرْفُو بْلِّي الصِّيفْ قَرّْبْ.

²⁹وْهَكَّا حْتَّى نْتُمَ مْلِّي تْشُوفُو هَادْشِّي كَيْوْقَعْ، عَرْفُو بْلِّي وَلْدْ الْإِنْسَانْ رَاهْ قَرّْبْ يْجِي وْرَاهْ هُوَ حْدَا الْبِيبَانْ.

³⁰وْنْݣُولْ لِيكُمْ الْحَقّْ: مَا يْجِي فِينْ يْتْقَادَا هَادْ الْجِيلْ حْتَّى تْوْقَعْ هَادْ الْأُمُورْ كُلّْهَا.

³¹رَاهْ السّْمَا وْالْأَرْضْ غَيْفْنَاوْ وَلَكِنْ كْلَامِي عَمّْرُه مَا غَيْفْنَى.

³²أَمَّا دَاكْ النّْهَارْ وْدِيكْ السَّاعَة مَا كَيْعْرَفْهُمْ حَدّْ، لَا مَلَايْكَةْ السّْمَا وَلَا الْوَلْدْ، مْنْ غِيرْ الْآبْ بُوحْدُه».

³³«رْدُّو بَالْكُمْ وْبْقَاوْ سْهْرَانِينْ! حِيتْ نْتُمَ مَا كَتْعَرْفُوشْ إِيمْتَى غَيْجِي هَادْ الْوَقْتْ.

³⁴رَاهْ بْحَالْ وَاحْدْ الرَّاجْلْ سَافْرْ وْخْلَّا دَارُه وْكَلّْفْ بِيهَا الْخْدَّامَا دْيَالُه، كُلّْ وَاحْدْ وْخْدَمْتُه، وْوْصَّى الْعْسَّاسْ دْيَالْ الْبَابْ بَاشْ يْعَسّْ مْزْيَانْ.

³⁵إِيوَا بْقَاوْ سْهْرَانِينْ! حِيتْ مَا كَتْعَرْفُوشْ إِيمْتَى غَيْجِي مُولْ الدَّارْ، وَاشْ فْالْعْشِيَّة، وْلَا فْنَصّْ اللِّيلْ، وْلَا قْبَلْ مَا يْصْبَحْ الْحَالْ، وْلَا فْالصّْبَاحْ،

³⁶بَاشْ إِلَا جَا عْلَى غَفْلَة مَا يْلْقَاكُمْشْ نَاعْسِينْ.

³⁷وْاللِّي كَنْݣُولُه لِيكُمْ، كَنْݣُولُه لْݣَاعْ النَّاسْ: بْقَاوْ سْهْرَانِينْ».