Read Moroccan Standard Translation مَرْقُسْ 15 Bible Online

مَرْقُسْ 15 - Moroccan Standard Translation bible

مَرْقُسْ 15

¹الْفَصْلْ خْمْسْطَاشْ وْفْالصّْبَاحْ بْكْرِي، تَّافْقُو الرُّؤَسَا دْ رْجَالْ الدِّينْ وْالشّْيُوخْ وْالْعُلَمَا دْ الشّْرَعْ وْݣَاعْ الْكْبَارْ دْ الْمَحْكَمَة، وْكَتّْفُو يَسُوعْ وْدَّاوْهْ وْسَلّْمُوهْ لْبِيلَاطُسْ.

²وْسْوّْلْ بِيلَاطُسْ يَسُوعْ وْݣَالْ لِيهْ: «وَاشْ نْتَ هُوَ مَلِكْ لِيهُودْ؟» وْهُوَ يْجَاوْبُه: «رَاكْ ݣْلْتِيهَا بْنَفْسَكْ».

³وْكَانُو الرُّؤَسَا دْ رْجَالْ الدِّينْ كَيْتَّهْمُوهْ بْبْزَّافْ دْيَالْ التُّهَمْ.

⁴وْسْوّْلْ بِيلَاطُسْ يَسُوعْ مَرَّة خْرَى: «وَاشْ مَا عَنْدْكْ جْوَابْ؟ شُوفْ شْحَالْ مْنْ تُهْمَة كَيْتَّهْمُوكْ بِيهَا!».

⁵وَلَكِنْ يَسُوعْ مَا جَاوْبْ بْحْتَّى شِي حَاجَة خْرَى، وْعْلَى هَادْشِّي تّْعَجّْبْ بِيلَاطُسْ.

⁶وْكَانْ مْنْ الْعِيدْ لْلْعِيدْ كَيْطْلَقْ وَاحْدْ مْنْ الْمْسْجُونِينْ، اللِّي بْغَاوْ النَّاسْ.

⁷وْكَانْ وَاحْدْ الرَّاجْلْ سْمِيتُه بَارَابَاسْ فْالْحَبْسْ مْعَ هَادُوكْ اللِّي دَارُو الْفُوضَى وْقْتْلُو النَّاسْ فْوَقْتْ الْفُوضَى.

⁸وْمْشَاتْ جْمَاعَة دْ النَّاسْ عَنْدْ بِيلَاطُسْ وْطْلْبُو مْنُّه بَاشْ يْدِيرْ دَاكْشِّي اللِّي كَيْدِيرْ دِيمَا مْعَاهُمْ.

⁹وْݣَالْ لِيهُمْ: «وَاشْ بْغِيتُو نْطْلَقْ لِيكُمْ الْمَلِكْ دْيَالْ لِيهُودْ؟».

¹⁰حِيتْ بِيلَاطُسْ عْرَفْ بْلِّي مْنْ الْحْسَدْ اللِّي فْالرُّؤَسَا دْ رْجَالْ الدِّينْ قَدّْمُو لِيهْ يَسُوعْ.

¹¹وَلَكِنْ الرُّؤَسَا دْ رْجَالْ الدِّينْ حَرّْشُو الجّْمَاعَة دْ النَّاسْ بَاشْ يْطْلْبُو مْنْ بِيلَاطُسْ يْطْلَقْ لِيهُمْ بَارَابَاسْ.

¹²وْعَاوْدْ سْوّْلْهُمْ بِيلَاطُسْ: «آشْ بْغِيتُو نْدِيرْ بْهَادْ الرَّاجْلْ اللِّي كَتْݣُولُو عْلِيهْ مَلِكْ لِيهُودْ؟».

¹³وْجَاوْبُوهْ بْالْغْوَاتْ: «صْلْبُه!».

¹⁴وْݣَالْ لِيهُمْ: «آشْ مْنْ شَرّْ دَارْ؟»، وَلَكِنْ هُمَ زَادُو كَيْغَوّْتُو: «صْلْبُه!».

¹⁵وْحِيتْ بِيلَاطُسْ كَانْ كَيْبْغِي يْدِيرْ الْخَاطْرْ لْلنَّاسْ، طْلَقْ لِيهُمْ بَارَابَاسْ أَمَّا يَسُوعْ سَلّْمُه بَاشْ يْتّْصْلَبْ مْنْ بَعْدْمَا صَوْطُوهْ.

¹⁶وْدَّاوْ الْعَسْكَرْ يَسُوعْ لْدَاخْلْ دْيَالْ الدَّارْ اللِّي هِيَ قْصَرْ الْحَاكْمْ، وْتّْجَمْعَاتْ تْمَّ الْفَرْقَة دْ الْعَسْكَرْ كُلّْهَا.

¹⁷وْلَبّْسُوهْ لْبَاسْ مْدَادِي، وْضْفْرُو تَاجْ دْيَالْ الشُّوكْ وْحَطُّوهْ لِيهْ عْلَى رَاسُه،

¹⁸وْبْدَاوْ كَيْقَدّْمُو لِيهْ السّْلَامْ وْكَيْݣُولُو: «السّْلَامْ عْلِيكْ آ مَلِكْ لِيهُودْ!».

¹⁹وْضْرْبُوهْ عْلَى رَاسُه بْالْقْصْبَة وْدْفْلُو عْلِيهْ، وْبْدَاوْ كَيْرَكْعُو عْلَى رْكَابِيهُمْ وْكَيْسَجْدُو لِيهْ.

²⁰وْمْنْ بَعْدْمَا ضَحْكُو عْلِيهْ، حَيّْدُو لِيهْ اللّْبَاسْ الْمْدَادِي وْلَبّْسُوهْ حْوَايْجُه وْخَرّْجُوهْ بَاشْ يْصَلْبُوهْ.

²¹وْلَزّْمُو الْعَسْكَرْ عْلَى وَاحْدْ الرَّاجْلْ كَانْ رَاجْعْ مْنْ الْفْدَّانْ دْيَالُه بَاشْ يْهَزّْ الصّْلِيبْ دْيَالْ يَسُوعْ، وْهَادْ الرَّاجْلْ سْمِيتُه سِمْعَانْ مْنْ الْقَيْرَوَانْ، وْهُوَ الْبُو دْيَالْ إِسْكَنْدَرْ وْرُوفُسْ.

²²وْدَّاوْ يَسُوعْ لْوَاحْدْ الْمُوضْعْ سْمِيتُه الْجُلْجُتَة، وْاللِّي كَيْعْنِي مُوضْعْ الْجُمْجُمَة.

²³وْعْطَاوْهْ يْشْرَبْ الْخْمَرْ مْخَلّْطْ بْوَاحْدْ الْعْشْبَة سْمِيتْهَا الْمُرّْ، وَلَكِنْ هُوَ مَا بْغَاشْ.

²⁴وْصَلْبُوهْ، وْقْسْمُو بِينَاتْهُمْ حْوَايْجُه بَعْدْمَا ضْرْبُو عْلِيهُمْ الْعُودْ، بَاشْ يْشُوفُو كُلّْ وَاحْدْ أَشْنُو غَادِي يَاخُدْ.

²⁵وْمْلِّي صَلْبُوهْ كَانْتْ التّْسْعُودْ دْيَالْ الصّْبَاحْ.

²⁶وْكْتْبُو فْوَاحْدْ اللُّوحَة التُّهْمَة دْيَالُه: «مَلِكْ لِيهُودْ».

²⁷وْصَلْبُو مْعَاهْ جُوجْ دْيَالْ الشّْفَارَا، وَاحْدْ عْلَى لِيمْنْ دْيَالُه وْلَاخُرْ عْلَى لِيسْرْ. [

²⁸وْهَكَّا تْحَقّْقْ دَاكْشِّي اللِّي مْكْتُوبْ عْلِيهْ فْكْتَابْ اللَّهْ: «وْحْسْبُوهْ مْعَ الْمُجْرِمِينْ».][٧]

²⁹وْكَانُو النَّاسْ اللِّي دَايْزِينْ كَيْعَايْرُوهْ وْكَيْضَوّْرُو رَاسْهُمْ وْكَيْݣُولُو لِيهْ: «آ اللِّي غَتْرَيّْبْ بِيتْ اللَّهْ وْغَتْعَاوْدْ تْبْنِيهْ فْتْلْتْ يَّامْ!

³⁰نْجِّي رَاسْكْ وْنْزَلْ مْنْ فُوقْ الصّْلِيبْ!».

³¹وْكَانُو الرُّؤَسَا دْ رْجَالْ الدِّينْ وْالْعُلَمَا دْ الشّْرَعْ حْتَّى هُمَ كَيْضَحْكُو عْلِيهْ وْكَيْݣُولُو بِينَاتْهُمْ: «نْجَّا نَاسْ خْرِينْ وَلَكِنْ مَا قْدَرْشْ يْنَجِّي رَاسُه.

³²إِيوَا يْنْزَلْ دَابَا الْمَسِيحْ مَلِكْ إِسْرَائِيلْ مْنْ فُوقْ الصّْلِيبْ، بَاشْ إِلَا شْفْنَا هَادْشِّي نْآمْنُو بِيهْ!». وْحْتَّى الشّْفَارَا اللِّي تّْصْلْبُو مْعَاهْ عَايْرُوهْ بْحَالْ لْخْرِينْ.

³³وْطَاحْ الضّْلَامْ عْلَى الْبْلَادْ كُلّْهَا مْنْ الطّْنَاشْ دْ النّْهَارْ حْتَّى لْلتّْلَاتَة دْ الْعْشِيَّة.

³⁴وْمْعَ جْوَايْهْ التّْلَاتَة دْيَالْ الْعْشِيَّة، غَوّْتْ يَسُوعْ بْصُوتْ عَالِي: «إِيلِي، إِيلِي، لِمَا شَبَقْتَنِي؟» اللِّي كَتْعْنِي: «إِلَاهِي، إِلَاهِي، عْلَاشْ سْمَحْتِي فِيَّ؟».

³⁵وْسْمْعُوهْ شِي وْحْدِينْ مْنْ هَادُوكْ اللِّي كَانُو وَاقْفِينْ تْمَّ وْݣَالُو: «رَاهْ كَيْعَيّْطْ عْلَى إِيلِيَّا!».

³⁶وْجْرَّى وَاحْدْ مْنّْهُمْ وْخْدَا طَرْفْ دْيَالْ التُّوبْ وْفَزّْݣُه بْالْخْلّْ وْدَارُه فْالرَّاسْ دْيَالْ وَاحْدْ الْقْصْبَة وْمْدُّه لِيهْ بَاشْ يْشْرَبْ وْݣَالْ: «خَلِّيهْ حْتَّى نْشُوفُو وَاشْ غَادِي يْجِي إِيلِيَّا يْنَزّْلُه مْنْ فُوقْ الصّْلِيبْ».

³⁷وْغَوّْتْ يَسُوعْ مَرَّة خْرَى بْصُوتْ عَالِي وْمَاتْ.

³⁸وْتْشَرّْݣَاتْ الْخَامِيَّة دْيَالْ بِيتْ اللَّهْ مْنْ الْفُوقْ لْلْتَحْتْ.

³⁹وْمْلِّي الْقَايْدْ دْ الْعَسْكَرْ اللِّي كَانْ وَاقْفْ قُدَّامْ يَسُوعْ، شَافْ الْمُوتْ دْيَالُه كِيفَاشْ وْقْعَاتْ، ݣَالْ: «فْالْحَقِيقَة هَادْ الرَّاجْلْ كَانْ وَلْدْ اللَّهْ».

⁴⁰وْكَانُو تْمَّ شِي عْيَالَاتْ كَيْشُوفُو مْنْ بْعِيدْ، اللِّي مْنْ بِينَاتْهُمْ مَرْيَمْ الْمَجْدَلِيَّة، وْمَرْيَمْ أُمّْ يَعْقُوبْ الصّْغِيرْ وْيُوسِي، وْسَالُومَة.

⁴¹هَادُو كَانُو كَيْتْبْعُو يَسُوعْ وْكَيْتّْسَخّْرُو عْلِيهْ مْلِّي كَانْ فْالْجَلِيلْ، وْكَانُو حَاضْرِينْ بْزَّافْ دْ الْعْيَالَاتْ خْرِينْ اللِّي جَاوْ لْأُورْشَلِيمْ مْعَ يَسُوعْ.

⁴²وْفْالْعْشِيَّة دْ النّْهَارْ اللِّي كَيْوَجّْدُو فِيهْ لِيهُودْ لْلسّْبْتْ.

⁴³جَا يُوسْفْ اللِّي هُوَ مْنْ الرَّامَة، وْهُوَ مْنْ كْبَارْ الْمَحْكَمَة، وْكَانْ مْنْ النَّاسْ اللِّي كَيْتّْسْنَّاوْ مَمْلَكَةْ اللَّهْ، زْعَمْ وْمْشَى عَنْدْ بِيلَاطُسْ وْطْلْبُه بَاشْ يْعْطِيهْ الدَّاتْ دْيَالْ يَسُوعْ.

⁴⁴وْهُوَ يْتّْعَجّْبْ بِيلَاطُسْ مْلِّي سْمَعْ بْلِّي يَسُوعْ مَاتْ دْغْيَا. وْعَيّْطْ عْلَى الْقَايْدْ دْ الْعَسْكَرْ وْسْوّْلُه: «وَاشْ دْغْيَا مَاتْ يَسُوعْ؟».

⁴⁵وْمْلِّي تْحَقّْقْ مْنْ الْخْبَارْ مْنْ عَنْدْ الْقَايْدْ دْ الْعَسْكَرْ، عْطَى الدَّاتْ دْيَالْ يَسُوعْ لْيُوسْفْ.

⁴⁶وْشْرَا يُوسْفْ الْكْتَّانْ، وْنَزّْلْ يَسُوعْ وْكَفّْنُه بْالْكْتَّانْ وْدَارُه فْوَاحْدْ الْقْبَرْ اللِّي كَانْ حَفْرُه فْالصّْخَرْ، وْرَدّْ حَجْرَة كْبِيرَة عْلَى بَابْ الْقْبَرْ.

⁴⁷وْشَافْتْ مَرْيَمْ الْمَجْدَلِيَّة وْمَرْيَمْ أُمّْ يُوسِي فِينْ تّْدْفَنْ يَسُوعْ.